Celebrando mas di 50 aña di Turismo
E exposicion ta enfoca ariba historia, desaroyo, esfuerzo & logronan
ORANJESTAD (AAN): Diamars mainta Señora Myrna Jansen-Feliciano den compania di henter e staff y personal di Aruba Tourism Authority, a inaugura oficialmente e exposition di Turismo pa recorda y aprecia kico turismo a significa pa nos isla y su economia.
Mester bisa cu e prome bishitante nan di e exposición tabata un klas di School Duna un Man, kendenan a keda masha impresiona cu e potretnan y e splicacion cu Señora Myrna Jansen-Feliciano a duna personalmente na e studiante nan aki.
Otro grupo cu tambe a acudi caba na e exposicion, ta grupo di periodistanan di Alemania y UK cu ta di bishita na nos isla pa haci un reportaje special enguanto di Aruba.
Manera ya ta conoci, luna di september ta luna di turismo. Aruba Tourism Authority lo continua cu e celebracion di mas di 50 aňa di hospitalidad y turismo na Museo Archeologico National Aruba. ATA ta organiza un exposicion pa celebra e desaroyo di turismo desde su infancia.
E beneficio di un exposicion asina ta pa e comunidad Arubano admira kico nos turismo a representa, con esaki a desaroya den locual nos ta awe y ken ta tur esnan cu a aporta pa e grandioso logro aki.
Durante e exposicion, Aruba Tourism Authority ta ilustra diferente potret y otro articulo cu a worde huza pa promociona nos isla tanto localmente como den exterior. E exposición lo brinda nos comunidad e oportunidad pa disfruta di un recorido den e historia di turismo.
ATA ta spera di conta cu sosten y participacion di henter e pueblo Arubano y especialmente esnan cu a forma parti di e 50 aña di Aruba su turismo. Tambe ATA y AHATA ta pidi tur socio den turismo pa encurasha e bishitantenan pa acudi na e expo aki durante nan estadia na nos isla.
E exposicion lo ta habri pa publico general for di dia 22 di september te cu 2 di october 2009. E horarionan lo ta for di 10:00 am pa 5:00 pm di diamars pa diabierna y tambe riba diasabra y diadomingo for di 10:00 am pa 2:00 pm. E exposicion lo ser teni na nos Museo Archeologico National Aruba situa na Schelpstraat.
