ORANJESTAD (AAN)— E interes a bira mas grandi pa atletanan participa na e “30th Turibana 10-k cu ta tuma lugar diadomingo awor dia 6 di september 2009. Tur participante ta concentra for di trempan caba na Panaderia del Campo na Turibana na Noord, for di unda e ta sali pa finalisa den oranan mas laat na Centro Deportivo Betico Croes na Santa Cruz.
Inscripcion
IDEFRE ta informa na comunidad cu tin oportunidad ainda pa inscribi, awe Diabierna 4 di September 2009 durante dia for di 8:00 di mainta te cu 4:00 di atardi y mayan Diasabra 5 di September 2009 for di 9:00 di mainta pa 1:00 di merdia na oficina di IDEFRE situa na e di dos piso di Certified Mega Mall riba boulevard.
Inscripcion ta inclui bo T-Shirt, sport-bottle y tambe bo number di participacion. Cada atleta ta ricibi dos number, di cual e color blau ta bin pa dilanti di e T-Shirt y e color cora na e parti patras. IDEFRE ta recorda cada atleta pa tene esaki na cuenta y percura pa e number ta visibel.
Ta importante pa tur atleta ta na ora na e punto di salida, pa e evento por cuminsa. For di 4:30 a.m. ta cuminsa cu registracion di tur participante. Salida di e grupo di canado ta tuma lugar pa 5:30 a.m., mientras cu e grupo di coredo ta sali pa 6:00 a.m. Riba e mainta di e evento no ta tuma inscripcion.
Participacion y premiacion
E “30th Turibana 10-k 2009” ta conta cu participacion di coredo y canado local y internacional cu ya caba a inscribi na oficina di IDEFRE. Si bo no a inscribi ainda pa participa, probecha y haci esaki awe y mayan Diasabra ainda.
Na final di e evento ta entrega premio na tur ganador. Ta premia e 5 prome canado femenino y e 5 prome canado masculino cu logra yega final. Pa e coredonan masculino y femenino, ta premia e prome, di dos y di tres lugar segun categoria di edad cu ta conoci for di momento di inscripcion.
