Arthur Dowers:
ORANJESTAD (AAN): Segun Arthur Dowers di AVP, pueblo por jena pagina tras di pagina pa mustra pueblo motibonan cu VALERO ta bay for di Aruba. Pero tur e paginanan ta worde jena cu un solo nomber, esta esun di Nelson Orlando Oduber. No por otro tampoco si nos considera tur locual a worde trece dilanti caba.Pero nos no mester cansa di trece nan dilanti pa pueblo compronde cu si tabata tin un otro lider of Gobierno cu vision, nunca nos lo ta para akinan na vispera di 11 di September,
ora gran cantidad di nos amigonan cu ta labora den Valero lo ta ariba caya. Ya caba nos ta hayando hendenan cu ta yama nos cu nan a bini afor caba y cu futuro ta mustra scur pa nan y nan famia.
Segun Dowers, e cos aki ta simpel pa splica: E proposicion di Valero ta: Entrega e Tax holiday cuatro aña prome cu e vence y paga un 50 miyon Florin pa aña na winstbelasting a cambio di kita BBO ariba exportacion.
Esaki a garantisa permanencia di Valero pa hopi aña mas, si nos considera cu Valero a inverti 500 miyon Dollar e ultimo añanan aki y tabata dispuesto of tabata tin plannan pa inverti 1 biyon di Dollar den e añanan cu ta bini.
Pero Valero a topa cu un Nelson Orlando Oduber cu a mustra di no por negocia cu ningun hende, pasobra e ta terco y arogante y intransigente. Si ariba bo nomber bo tin proyectonan fracasa y bo no tabata capas pa negocia cu KLM, Carnaval Cruises, American Airlines y awor aki Valero, pa kico bo ta bay negocia cu Petro China.
Falta algun dia so mas pa pueblo pasa bo factura y pesey den nomber di Pueblo di Aruba mi ta pidi bo encaresidamente pa laga negosacion tanto cu Valero como cu Petro China pa hendenan capas y cu vision.
Imagina bo cu si Petro China kier bini mes, ta kico Nelson Orlando Oduber lo duna nan. Porta cu nan mag trece 1000 chines aki na Aruba pa traha den refenederia enbes di nos propio Arubiananan? Of nan lo haya tax-holiday te aña 3000.
Si un hende a mustra bo caba cu track record resultado di su negociacionan, ki speranza nos por tin ainda den persona di Nelson Orlando Oduber den porta di eleccion? Mi ta spera cu ariba dia 11 di September awor ora cu mas di 700 tata di famia ta laga e main gate pa ultimo biaha, nan realisa cu esaki ta pa motibo di un solo nomber, esta Nelson Orlando Oduber.
Dowers a finaliza bisando: “Mi mes ta combensi cu ora nos Gobierno nobo cu pueblo lo elegi dia 25 di September proximo sinta, nos lo start negociacionan no solamente cu Valero, pero tambe cu KLM, Carnaval Cruises y American Airlines, y asina trece e partnernan aki pa Aruba back y alavez cuminsa e caminda di recuperacion despues di disaster cu partido MEP y su lider a hinca nos aden.”
