Home Deporte Campeonato AA 2009 dedica na Robbie Briesen y Juvenal Nava a inicia

Campeonato AA 2009 dedica na Robbie Briesen y Juvenal Nava a inicia

4
0
SHARE
- Advertisement -

baseball1ORANJESTAD (AAN)— Campeonato di baseball AA a inicia y nos tabata contento cu e publico presente cu apesar di tantisimo actividadnan y eventonan politico a decidi di bai wak e apertura di baseball AA na tereno di Dragon Hitters na Barcadera. Despues di e apertura oficial y entrega di plakaat na dos baluarte di nos baseball local cu durante e añanan 70 y 80 refieriendo na Robbie Briesen y Juvenal Nava a inicia e campeonato cu e tremendo wega entre Red Machine y ATCO Indians.


Un Red Machine cu a bolbe reforza cu dos hungador di Braves esta Jair Thompson y Marcson Castro cu a suma un total di cuater hungador cu ta milita den Braves awe, a la vez durante e ultimo añanan Red Machine a adkiri Javier Croes di e organizacion di Rockets y Sergio Laurent y Gleford Tromp di equipo di Valero.

Aki nos ta papia di adkisicion di no menos cu siete hungador di otro organizacionan pa overschrijving solamente.

Manera ya ta conoci cu e suma di overscrijving pa hungadornan di AA a subi drasticamente, ABBA a introduci e regla pa asina proteha e organizacion al caso cu ta traha cu e pelotero for di su infancia.

Den pasado esaki tabata e causa cu equiponan tabata traha pelotero pa equiponan paga tiki placa pa bay cu talento y prospectonan di otro equiponan. E filosofia ta awe cu e organizacion cu a traha aña den aña afor cu e pelotero ta ricibi por lo menos un suma cu cual nan por cumpra material y otro necesidadnan pa nan organizacion.

Pues e organizacion cu no kier traha riba su farm-system awe lo mester paga pa hungador cu otro ta traha cune. Esaki ta un di e maneranan a la estilo Yankees pa domina baseball y esaki tambe ta contribui na un sistema semi-professional.

Sin embargo Red Machine a hunga e playoff final aña pasa contra ATCO Indians y a perde e playoff final mediante sweep pues cuater wega sigui.

Cu yegada di e peloteronan cu Red Machine a haya di Braves ta haci e equipo aki uno mas fuerte y por spera un payoff final entire e dos equiponan aki atrobe. En fin Diabierna e dos equiponan aki a topa y aki ATCO Indians a demostra superioridad pa gana e prome encuentro cu score di 8-5.

Jair Thompson a conecta e prome homerun di e campeonato, mientras cu Eldrick Dijkhoff a conecta e di dos pa e equipo di ATCO Indians.

Cu e victoria aki y e hecho cu ATCO a cuminza e partido cu un equipo hopi hoben organzacion aki cu si a uno cu ta hunga cu su farm naturalmente ta candidato serio pa e playoff seminal sikiera.

ATCO Indians a titula campeon pa 4 biaha durante e ultimo seis añanan y den combersacion cu dos hungador clave di ATCO Indians esta Joshua Ramada y Eldrick Dijkhoff nan a declara cu no ta importa cuanto hungador Red Machine of otro equipo cumpra ta ATCO Indians ta e equipo campeon.

A la vez a declara cu awor cu Braves y Sero Preto bay join cu otro ta haci e campeonato 2009 ainda mas interesante pa e fanaticada di baseball en general.

Pues e campeonato 2009 AA a start sali y e weganan di e siman aki ta como lo siguiente: Diaranson lo enfrenta otro San Nicolaas Braves y Polar Ice/Cushina di mi Mama Sluggers,
Diahuebs ATCO Indians lo topa cu Oranjestad BBO mientras cu Diabierna Red Machine lo enfrenta Valero.

 Tur e weganan lo tuma lugar pa 7:45 na tereno di Dragon Hitters na Barcadera.
Entre otro informacionnan nos tin tambe cu Valero a derota A.I.B. Rockets cu score di 3-2 den un partido cu a dura solamente 2 ora, esaki por ta kisas e partido mas rapido di e ultimo añanan. Valero y Rockets a deleita e public presente Dialuna anochi.

Un tremendo wega aunque cu varios equipo tabata erratico, e dos pitchernan esta Alfred van der Linden di Valero, e hoben Eduard Villanueva di Rockets y Carlos Wester a duna un demostracion di pitcheo.

Un total di 25 ponche tira den e partido di cual 8 pa Edward, 12 pa Alfred y 5 pa Carlos cu a bin di relevo den e di siete inning.Durante e a partido por a disfruta di no menos di cuater hoben firma of cla pa firma den e partido.

Kelvin Silvania cu a demostra subimento di velocidad, Darwin Ruiz hungando un segunda base trankil y naturalemente e dos rumanan Boogaerts cu tabata e sensacionan durante weganan di reino. Pues un partido pa disfruta y e score final ta bias esaki tambe.

Alfred van der Linden a resulta picher ganador mientras cu Carlos Wester a sufri su prome derota como pitcher. Pues un duelo di pitcheo cu a percura pa e partido aki termina den dos hora.

E victoria aki di Valero di 3-2 ta un señal cu e baseball por bay bira hopi interesante e aña aki. Sidney Curiel y Kelvin Silvania ambos a conecta dos hit den cuater oportunidad.

- Advertisement -

DUNA COMENTARIO

Please enter your comment!
Please enter your name here