Home Editorial Carta abierta na Rudy Lampe

Carta abierta na Rudy Lampe

2
5
SHARE
- Advertisement -

jossy_mansur_picextensivo na Monica!
No ta cuestion di democracia, ta cuestion di principio y di honestidad!
Den tur bo argumentonan tocante cu ken bo ta dispuesto di goberna si bo saca asiento, bo a lubida riba e punto mas importante: principio! Bo mester stop di haci uso di un palabreo sin conviccion, pasobra bo credibilidad mes ta den wega. Permitimi splicabo pakico abo y e otro dosnan ta ekiboca den boso postura lora den e papel celofan di “democracia” y/o e populismo di cu ta “Pueblo ta dicidi”, cu cua partido bo ta dispuesto di goberna si bo saca asiento! Un persona cu ta respeta su mes y ta fiel na su principionan mester ta dispuesto di bisa:

 mi no ta bay sinta den un Gobierno cu un set di delincuente, abusador y criminal manera e cinco candidatonan cu ta ripiti cu prominencia riba e lista di MEP y ta e candidatonan principal pa bolbe ocupa puestonan di Ministro den e proximo gabinete, si cu bo(so) ayuda nan logra forma un coalicion pa bolbe den Gobierno pa caba di desgracia Aruba pa semper, cu bo(so) apoyo!

Ta con bo por pensa mes di sinta den un gobierno cu e mesun hendenan cu a comete corupcion tras di corupcion den dia cla, cu a castiga Pueblo cu medidanan inhusto y inhumano, cu a persegui sin clemencia tur nan contrincantenan politico, amen di democracia o cualke otro excusa, y bo ta cla pa exonera nan di cualke culpabilidad? Y ta unda bo kier sconde bo principionan? Tras di e cortina di “democracia” o “ta Pueblo ta dicidi”? Bo por papia esey cu esnan cu no kier tuma e tempo pa analiza pa nan mes e situacion real den cual e man yen di delincuentenan ey a hinca Aruba, pero no presenta bo(so) opinion como un dogma splicativo di bo(so) posicion intragable! Por lo menos, cerca mi e no tin bida!

Ta con bo por pensa mes, Rudy, di sinta den un Gobierno banda di esnan cu a yamabo pa pedofil, cu a lanza un awacero sushi di atakenan verbal y personal contra bo? Tur esey bo ta dispuesto di pone un banda djis pa purba convence esnan cu ta bandonando MEP na granel, deposita nan votonan riba bo o bo partido? Ta con intacto bo ta kere cu bo principionan lo keda si esey mester sosode? Un persona cu no tin nada di teme, mester por ta dispuesto di declara: mi no ta bay goberna cu esnan cu a comete tanto fechoria, a regala e propiedadnan mas valioso di Pueblo na compinchinan financiero; cu a hinca delaster ruman y famia den Gobierno, privando otro yiunan di Pueblo mas capaz y mihor prepara pa sirbi como candidato pa e puestonan ey; cu ta regala na huur un bon parti di e presupuesto di Gobierno na amigonan y famianan, bandonando espacionan util y destina pa Ministronan den Bestuurskantoor; cu a traha brug pa famia usando placanan cu mester a ser asigna na crea e mayor bon pa e mayor cantidad di hende; cu ta predica violencia y omnipotencia for di puestonan temporalmente di poder, na momento cu tur nan argumentonan, ideanan y creatividadnan a desaparece; cu a core cu mas di un pilar economico di nos isla cu nan arogancia y nan prepotencia; cu kier e independencia di Aruba djis pa prolonga nan mes eternamente den Gobierno, pa prolonga nan fechorianan ‘per secula seculorum’ y implanta un dictadura feroz riba nos isla!

E unico cos cu mi ta respeta den bo, Rudy, y e otro dosnan menciona den e cabez di e mensahe aki, ta boso inteligencia, boso preparacion y boso disposicion pa traha pa un mihor Aruba. Pero, pa loke ta trata boso postura politico disfraza cu un capa di ‘democracia’ y/o ‘Pueblo ta dicidi’, mi ta haye condenable bao tur punto di bista.

Claro cu nos tur sa cu ta Pueblo ta dicidi; cu ta e ta e soberano, y cu ta su voz “vox populi, vox dei” mester ser respeta; pero banda di dje, ban compronde otro bon riba e factor di ‘principio’. E ultimo aki den ningun sentido ta viola e prome o sikiera ta contradicie! E ta cana man cu man cune, pasobra ta precisamente nos democracia ta den peligro si e hendenan ey mester bolbe den Gobierno pa continua cu nan perversidad contra e bienestar di Aruba. Ta ki clase di democracia por hustifica e actonan corupto di un Marisol, di su miyon misterioso, di e soborno di Namdar, di su complicidad cu financiadornan? Ta cua democracia por hustifica e nepotismo exagera di Nel, ademas di su odio y rencor contra tur esnan cu no ta pensa mescos cune? E desastrenan di Booshi? E incapacidad di Eddy? E mentiranan di Nilo pa purba presenta cifranan positivo unda nan ta berdaderamente negativo? E atakenan personal lanza contra bo, y pa cual nunca ningun di nan a pidibo disculpa te cu bo mester a bay Huez pa haya razon? Pero, bo ta considera cu e sentencia ey so por anula e palabranan ofensivo lanza contra bo cu alevosia, pa bo join nan den Gobierno?
Keremi, Rudy, cu pa mi ningun di bosonan merece mi confianza. Traha riba esun di otronan cu no ta dispuesto manera mi di bisabo bo berdadnan, y menos ainda ta tuma e tempo necesario pa analiza e postura hipocrita cu bo(so) a asumi y kier hustifica cu dos concepto totalmente aheno na e contienda!
Bo por sigui haci cuanto politica barata cu bo kier cu e materia, pero conta cu cada biaha cu bo hacie mi ta bay dunabo mi opinion y tur e argumentonan contrario, pasobra e eleccion aki ta demasiado importante pa e futuro di Aruba y su (y mi y boso) Pueblo. Nunca mi a hesita pa sali na defensa di mi isla, aunke mescos cu bo mi mester a wanta un letania di insinuacionnan, insultonan y menazanan. Pero, mi tin e deber, o mas bien e obligacion, di defende loke mi ta kere aden, y loke mas mi ta stima ta e isla unda mi a nace, y pa cual mi ta dispuesto di cana cualke caminda yen di sumpiña pa yuda crea e ambiente di paz, di trankilidad y di comprension cu por garantiza nos e recuperacion verdadero di e progreso y dignidad di mi (y boso) patria.

- Advertisement -

5 COMMENTS

  1. Ami tin un bon verzoek pa Sr. Jossy ……PLEASE drenta politika of traha buki pa skolnan pa duna les di papiamento ….NUNKA tempo di nos tempo nos a hanja les di papiamento pero ora mi lesa loke Sr. Jossy ta skirbi mi ta keda boka habri kuanto palabra ta nobo pa mi. Un papiamento asina bunita y di un haltura haltisimo …Un papiamento masha elegante y duidelijk !!! Petje af pa Sr. Jossy su papiamento ……….Y tokante loke Jossy a skirbi mi ta 200% su tras !!!

  2. “El Beso Traisionero”
    Di Pastor pa Parlamentario. Cristo Jesús, e Yu di Dios Todopoderoso mes a haña un cuchui den su lomba pa un stoel den Parlamento di Aruba. Kiko mas Pueblo di Aruba por spera di un TRAIDOR??? Pa su frutanan “TRAISIONERO” bo ta conoce!!! Union cu CRIMINALNAN, LADRONNAN, CORRUPTONAN den un gobierno CORRUPTO.

  3. Den un Democracia ta keda na PUEBLO pa huzga ken nan ta considera corrupto of no, ken nan ta considera cu por defende nan interesnan si of no.
    No ta pa ningun partido dicidi di antemano, prome cu pueblo mes a duna nan veredicto riba e partidonan cu ta participa, si nan ta traha cu otro.
    Prueba di esaki ta loke a sosode na Hulanda, unda awe e dos partidonan rival cu hamas a confia otro
    a wordo forza pa e pueblo pa bai traha hunto y hasta buska sosten di un partido chikito y pa nan insignificante. Esey ta e Democracia segun e sistema hulandes/europeo cu nos ta hinka cu n’e.
    Y den e DEMOCRACIA aki ta e decision y veredicto di e PUEBLO ta conta, maske cuanto dolor di cabez esaki por causa pa nos politiconan y maske cuanto nos ke sapatia di desilusion.
    Locual hamas mester ripiti ta e berguenza di loke a sosode na 1985, ora cu no kier a respeta e decision y eleccion di e pueblo, y cu a kita e partido cu a gana e eleccion e derecho pa a forma un coalicion.
    Nan a perde e oportunidad pa a mustra nos pueblo con politiconan por laga tur rencor un banda pa sirbi nan pais y uni nos pueblo cu e unico meta di pone semper e interes di Aruba na prome lugar.

  4. E partidonan, manera MPA,PDR,RED, mester pensa dos biaha prome cu nan forma un gobierno cu AVP,
    Unda e partidonan cu a yega di forma gobierno AVP unda nan ta awe,
    Peey forma gobierno cu AVP ta un morto sigur pabo partido Ojoooo

  5. Arturo,

    TUR partido no AVP so pero tur a hasi hopi kambio ariba nan lista dus loke bo ta bisando no tin NIUN base !!!

    AWORRRRR no antes AWOOORRRRRR AVP tin un lista 100% capacita y prepara pa defende e PUEBLO su interes !!!

DUNA COMENTARIO

Please enter your comment!
Please enter your name here