(CBB) ta spera cu autoridad lo actua contra Edmond Croes…….

Instigacion y agitacion di parti di Edmond Croes via Top FM y Solo di Pueblo Oranjestad -Comision Bon Boluntad (CBB) a constata cu den e ultimo fin di siman y den e dianan despues ta reinando un ambiente negativo cu ta fruto di instigacion y agitacion contra orden y seguridad publico di banda di un emisora radial y un corant ambos estableci na Santa Cruz. Den fin di siman a tuma lugar intento pa tene evento riba caminda publico sin cu tabata conta cu e debido permiso pa esaki.

Cuerpo Policial a sa di evita cu esaki a desemboca den incidente cu e dos paradanan cu
a tuma lugar diadomingo 13 september, cu tabata conta cu e debido permiso di e
autoridad corespondiente.

A keda constata tambe cu via e emisora TOP FM 95.1 na Santa Cruz a ser haci yamado
na sostenedornan di partido MEP pa apoya e accion ilicito aki.

Como cu ta trata di yamado verbal y no por escrito, CBB no por establece cu certeza den ki palabra exacto esaki a tuma lugar y si esaki ta constitui e delito di “opruiing”, violacion di articulo 137 di Codigo Penal di Aruba. CBB ta di opinion cu esaki mester ta obheto di investigacion di banda di autoridadnan hudicial.

Dialuna 14 di september e corant Solo Di Pueblo a publica un articulo unda sr. Edmond
Croes, propietario di e corant aki y di e radio emisora menciona, den palabranan cla ta
lanza un menaza contra Ministerio Publico, unda e ta dirigi palabra na e institucion
hudicial aki cu e siguiente frase: “Un denuncia ta bay na Ministerio Publico:

NO COMETE E EROR PA TRATA NA SILENCIA E VOZ DI PUEBLO! Esun cu detene un di nos
hendenan pa motibo di campaña, lo bay ta responsabel pa lantamento di pueblo. Y
MEP a lanta na 1977 y ta dispuesto pa lanta atrobe na 2009!”

Pa CBB, e contenido y tono di e articulo aki, especialmente e frase menciona, ta
sobrepasa grandemente limite di loke ta permisible den nos sociedad y por lo tanto
CBB a haci un apelacion riba nos Promer Ministro, den su calidad di responsable
maximo pa Orden y Seguridad Publico, pa tuma e pasonan cu ta necesario pa e tipo di
instigacionnan aki no sigui venena e ambiente den nos comunidad, y tambe solicita e
autoridadnan hudicial investiga e actonan aki, cu sigur den caso di e articulo menciona
ta contene indicacion serio di instigacion y agitacion (opruiing) contra orden y
seguridad publico.

CBB ta considera cu en general, pero sigur den e ultimo simannan promer cu dia di
eleccion, ta intolerable cu di e forma aki ta trata na hiba nos pais na un situacion di
desorden y discordia, loke ningun persona cu sano juicio lo por desea.

Como agravante mester constata cu e persona responsable pa e accion aki ta actua
asina, despues cu lider politico di partido MEP, a yega na un entendimiento cu Alto
Mando di Cuerpo Policial y partido AVP cu no ta tene parada di auto dia 20 di
september ni tampoco otro parada te dia di eleccion.

Mester ta mas cu obvio cu e acuerdo aki no por habri caminda pa ningun hende organiza evento riba caminda publico sin e debido permiso di autoridad concerni, alegando cu e acuerdo no ta
conta pa nan.

CBB ta kere cu ta importante pa enfatiza cu entre e responsabilidad di lider politico y
esun di Ministro Presidente, encarga cu orden y seguridad publico, den e tipo di
situacion aki semper esun di Ministro Presidente mester prevalece, y ta spera cu nos
Promer Ministro lo duna e claridad aki na henter comunidad.

CBB ta spera cu e autoridadnan lo actua cu man fuerte den e asunto aki, pa evita cu
nos bay den direccion di caos y intimidacion, y tambe pa garantiza cu eleccion pa
Staten dia 25 di september por tuma lugar den un ambiente di paz y trankilidad,
manera tur ciudadano consciente y cumplidor cu ley ta desea.

Tambe nos mester considera cu despues di eleccion, irespecto e gobierno cu tuma rienda di e pais, ta necesario cu ta existi un base di cooperacion sosteni pa tur, pa guia nos pais den e
direccion di progreso y prosperidad pa tur ciudadano, independiente di nan color
politico.