Home Editorial E xenofobia di Nel!

E xenofobia di Nel!

1
5
SHARE
- Advertisement -

jossy_mansur_picNel ta un persona adicto na xenofobia, o sea aversion of odio pa tur loke ta stranhero. Su gritamentonan na Radio Riool, y su zundramentonan den Solo di Corupcion ta demostra claramente su falta di clase, y te con leu su ordinariez politico ta yega. Como Ministro e por a comporta su mes cu mas dignidad, usando moderacion den su lenguahe. Y si e tabata un persona honesto cu su mes, o por lo menos doño di un tiki honestidad di criterio, e por a reconoce su responsabilidad personal den e derota mahos di MEP, asumi e culpa pa e perdida di 4 asiento den Parlamento, y prepara su mes pa aki 4 aña su partido, cune o sin dje, presenta su mes cu algun posibilidad di recuperacion.

Pero, comprobando e odio ilimita cu tine obsesiona, y ratificando e pobreza di su carácter, e no a haci nada otro cu reconfirma nos opinion di dje: un amargado yen di veneno contra su oponentenan y contra tur loke ta stranhero pe. Un verdadero xenofobo!

Incapaz di reconoce publicamente cu un di e gran factornan cu a contribui na e derota di MEP ta su lenga, cu ta bati sin e control di su cerebro, el apela na su diatribanan di custumbra, o sea culpa otronan pa e defectonan inherente na su caracter! Na lugar di pensa, e ta laga emocionnan negativo domine.

Nan a bisami cu el a dedica un bon parti di su improperionan contra mi y contra DIARIO, ripitiendo cu e ta bay cere ni maske e mester gasta cuanto placa cu ta, y cu e kier mirami bandona Aruba y bay biba na Hezbolah, comosifuera e ta e nomber di un lugar y no di un grupo cataloga como terorista door di varios pais importante.

Esey ta caba pa comproba cu su conocimentonan di geografia y historia ta mes mancaron cu su dominio di idioma. E hendenan di color su ayegadonan ta manda sinta “patras’, comosifuera nan ta inferior pa motibo di e color di nan cuero; e Colombianonan e ta manda bay back nan pais, djey e ta bay na un radio latino pa yora cerca nan cu nan a troce su palabranan, cu ta un ‘montahe’, pasobra e mes tin un “columbina”.

Si ta na su nieta e tabata refiriendo, e ta un “colombianita”, no un ‘columbina’, y ningun hende a haci ningun clase di montahe cu loke e mes a declara!

Pa loke ta trata DIARIO, Nel tin mas di 15 aña ta grita pa un boycot, cu e kier intensifica awor, menazando tur esnan cu ta pone aviso den e matutino di Pueblo, prohibiendo Gobierno di pone aviso den e corant mas grandi di Aruba (y pa un distancia enorme!), tahando Lotto pa pone su propagandanan den DIARIO, enfin henter un aremetida contra un medio cu e no por domina ni por controla na su antoho.

Haciendo caso omiso di e hecho cu na Aruba tin un democracia cu ta impone respet pa libertad di expresion, e kier a comproba un biaha mas cu si ta pe, e lo impone un dictadura feroz contra tur loke no ta di su agrado.

Hasta despues di e resultadonan fatal pa su partido, el a bay radio, televison y cerca su muchanan manda pa ripiti su yamado pa un boycot contra DIARIO, cu e menaza adicional e biaha aki cu e ta bay haci tur loke e por pa cera e matutino di Pueblo gastando cuanto placa cu ta, y core cu mi di Aruba!

Wel, e unico cos cu mi por bise ta cu esey ta bay kede grandi! Ni maske kico e haci, ni maske cuanto e zapatia, ni maske con intenso su deseonan di impone dictadura ta, e ta bay tin di keda cu su gana, pasobra DIARIO no ta bay cera, y no tin ningun Ley cu ta ampara e destiero o exilio forzoso di un yiu di tera.

E ta lubida cu mi a nace na Aruba dia 7 di Juni 1934, cos cu e por a comproba pa su mes na Censo, y cu si mi mester bandona Aruba algun dia (loke no ta bay ta e caso!) lo ta pa mi propio boluntad, y no esun di dje! Mientras mi ta na Aruba, sin embargo, lo mi sigui sali na defensa di mi isla cuanto biaha cu mi mira peligro pe, sea den politica o cualke otro ramo.

Ni su gritonan ni su menazanan por sirbi di impeditivonan contra mi boluntad inkebrantable di para pa mi principionan y defende nan contra cualke mandatario cu ideanan autoritario.

- Advertisement -

5 COMMENTS

  1. Sr.JOSSY MANSUR …………….500% di acuerdo ku bo.. MEP por recupera di e derota aki algun dia si NEL desaparece di e partido aki y pone Evelyn na mando paos e sikiera tbta tin e manera y decencia di felicita tur partido …….NO manera NEL ku a bai grita manera un KABRITO di mondi kritikiando e pueblo manera kos ku E a duna e PUEBLO di KOME y BEBE. NEL a juist KITA PAN Y AWA foi e PUEBLO su boka….. Pero Sr. MANSUR manera e dicho na spa§no ta bisa ´ `uno saca el BURRO del monte pero NO saca el monte del BURRO`……Nel su spanjo, su ingles, su hulandes y hasta papiamento ta asina malo ku ora e papia e ta duna hende BERGUENSA……. PUEBLO di ARUBA DANKI pa a skop e arrogante aki AFOR di e gobernacion ….AWOR nan mester SKOP e afor di MEP pa MEP kuminsa evalua y drecha nan partido y hise ne nivel ku BETICO (rip) tbta tine algun dia den pasado….. BIBA ARUBA y BIBA e gobierno NOBO !!!!!

  2. Un diario critico y bon documenta ta e columna vertebral di tur sistema democratico.
    Larga vida pa Diario.

  3. Bon dia Sr.Mansur… ami gewoonweg ta enjoy cada palabra…cada frase..con Sr. Mansur ta bati e poko cos ey cu lenga..na un forma hopi diplomatico..sin insulte na un forma vulgar cual cos cu e ta! si ta pa mi Sr. Mansur type tur dia algo asina contra dje …cual ta juda mi vocabulario tambe!

    Tremendo! gewoon enig!

  4. Nel Oduber (MEP) no por cera ni su boca, con e MENTIROSO ei por cera “Diario_Aruba/Internashonal?
    Loke ta mancha no ta bira LIMPI mas! (MEP) Loke ta dobla no ta bira RECHT mas! (MEP) Loke no tei (Integrdad) bono por CONTA! (MEP) Awo ta e GRAF di DEFUNTO Nel Oduber (MEP) mester cera.
    Ajoooooooooooo>>>>Mentiroso, >>.Corrupto, >>>Ladron (Nel Oduber) Atte. Carlos Severino Tromp

DUNA COMENTARIO

Please enter your comment!
Please enter your name here