El a worde saca mescos cu un criminal for di su propio cas!

Publication: Saturday, 12 September 2009. Categoria: Policial

mumaltrato1Manera un cacho un dama a worde bati y maltrata pa polis
ORANJESTAD (AAN): Awor diferente instancia ta worde poni na altura di loke dos agente policial a comete Diadomingo cu a pasa na un cas na Primavera. DIARIO a haya informe, cu instancianan internacional a worde poni na altura, incluyendo Consulado.E señora C.V., naci na Colombia, awor a presenta na DIARIO pa denuncia e abuso autoritario y forzoso cu el a sufri na man di dos polis, kendenan a drenta su propio cas na Primavera.


Diadomingo dia 6 di September banda di 12’or di mey anochi, e tabatain un discusion di famia na su cas, cu su casa, esta e Arubiano di inicial T. E discusion tabata encuanto e bishita di e yiu muher di C.V. procedente di Colombia na e cas ey. E situacion aki di tira palabra pa otro encuanto famia, a cuminza for di algun dia prome caba.

E Diadomingo anochi ey, e casa T. a bolbe start cu e atake verbal aki. Notando cu esaki a socede, e dama a haci loke ley semper ta sugeri pa hende haci, esta “aleha” di e problema. Den Corte di Husticia, semper Huez ta puntra un persona cu ta den problema, di con e no a “aleha” di un confrontacion of situacion. Si acaso e persona a aleha… semper esey tabata worde bon mira den wowo di Fiscal y di Huez.

E Diadomingo anochi aki, esey ta exactamente loke e dama C.V. a haci, esta cu el a bay cera su mes den camber y no scucha mas e abusonan verbal. Pa su sorpresa, su casa a dicidi na yama Polis.

Dos agente policial (uno masculino y e otro femenino), a yega den vehiculo D-545 cu hopi rapidez, y e agentenan a baha y scucha solamente e version di e homber T. Nan no a ni scucha e otro banda di medaya.

Scuchando e “storia” di e homber, e Polisnan a yega y a bay over pa aresta e dama C.V.
Esaki a socede, despues cu e dama C.V. a bisa agentenan, cu husticia no por tuma parti pa e homber Arubiano, pasobra e ta un muher Colombiano.

E no tabata di acuerdo cu e proceder, pasobra nan tabata hasta dune orden pa e keda keto. E dama tabata bisa agentenan, cu ora e homber T. ta ricibi bishita di su famia, e dama tabata acepta. Di con awor cu e dama ta hayando bishita di su propio famia, di con awor e homber ta contra?

Esey ta exactamente e nucleo di e problema familiar! E homber si mag di trece su famia pa haci bishita, pero e muher no mag di trece su famia. Aki e dama a hasta revela, cu el a haye ta huur un camber pa su yiu muher cu a bin di Colombia, por keda mas trankilo, y no keda den e cas pa scucha e protestanan aki.

E dama C.V. ta denuncia e forma brutal cu nan a actua pa pone boei rond di su mannan, y con nan a dal e cu forza, y cu a pone den e baki di e patruya policial. Ora cu su pianan ainda tabata pafor di e vehiculo, nan a cuminza dal e duro na su pia y rudianan, y tambe na su cabez. Den esaki el a haya golpi na su cara y lomba. Asina nan a sake for di su cas na Primavera, y hibe na Warda di Polis na Playa.

Pa colmo, ora cu su casa a bay buske na Warda di Polis, el a hustifica cu e polisnan mihor a dal e riba su cabez! E heridanan tabata severo! E dama C.V. mes a haye ta bay na su Docter di Cas, pero pa su sorpresa e medico a nenga di dune un rapport di e golpinan ricibi! Esaki ta algo straño y sospechoso.

Na final, el a haye ta acudi na Dr. Vallejo, kende a determina su estado di gravedad.
E dama C.V. a keda den shock pa e forma cu Polisnan por trata un ser humano.

E ta haci un deseo pa e hechonan aki no worde ripiti nunca mas, y cu e actitud di e dos Polisnan cu conoce ley di proteccion, a viola e norma aki y a impone nan mesun husticia pa un decision di nan mes. Corda cu nan no a ni check e otro banda di medaya prome.

DIARIO a haya sa cu e dama awor a haye ta busca yudanza di Centronan cu ta duna proteccion na hende muher, y e golpinan aki cu a lage stijf y cu herida, a pone cu e lo keda A.O. y perde 16 dia di trabao.

“Mi ta kere y tin confianza den husticia divino, cu mi a construi mi cas, unda ami tabata ayudante y mi casa tabata metsla, awor el a bin ta tratami den condicionnan inapropia pa un ser humano,” el a declara na DIARIO.

E ta preparando un documento legal, pa denuncia esaki na Amnesty International, como tambe na Cancilleria na Colombia, riba loke Polisnan di Aruba ta haci. Abuso y mas abuso… cu ainda na aña 2009 no a conoce un fin.

2 Responses to 'El a worde saca mescos cu un criminal for di su propio cas!'

  1. September 12, 2009 at 12:10 pm
    Carlos Severino Tromp
  2. September 12, 2009 at 10:56 pm
    lisa

Leave a Reply