Home General Eleccion ta tras di lomba; mi no ta kibra cabez cu promesanan

Eleccion ta tras di lomba; mi no ta kibra cabez cu promesanan

1
1
SHARE
- Advertisement -

Eleccion a pasa y kico mi ta scuchando? “Cumpli awor!”.
Mi no ta laga e “cumpli awor!” molestia mi cerebro, mi ta djis ignora esaki.
Nan lo bisami cu politiconan ta gaña y mi lo contesta cu ta parti di e “wega” cu yama “campaña y eleccion”.
Mi sa ora un politico ta gaña asina cu mi mira su lipnan ta move.
Mi ta sigui e propaganda politico y ora e politico papia, e ta trata di cubri su mentira cu otro mentira.
E ta campañando.
No ta pornada Nel a bisa cu “campaña ta un cos y goberna ta otro”.
Mi no a tume na malo pasobra mi sa masha bon cu esey ta parti di e “wega”.
Despues di gaña riba un mentira, ta bin e biramento di palabra.
Coge e realidad y bolter esaki na bo fabor.

Si no haci esey, ta usa e tactica di spanta hende.
“Si e oponente gana, mundo ta yega na su fin y sernan di otro planeta lo tuma over”.
Finalmente tin e promesanan maraviyoso.

3 CRANCHI DEN CUSHINA

E politico ta bira manera Sinterklaas y ta priminti di trece cuatro cabay yen di regalo riba anochi di celebracion di su fiesta.
Pakico?

Pasobra si nos eligi e persona corecto milagro lo tuma lugar.
Belasting lo baha! Servicionan lo mehora! Educacion lo mehora! Problema di transportacion lo mehora! Lo baha tarifa di awa, coriente y gasoline ! Nos economia lo mehora!
Pronto nos lo ta rico y cada baño lo tin 3 WC. (pa hende homber, pa hende muher y pa mucha).
Cushina ta haya 3 cranchi. (un pa awa cayente, otro pa awa frieu y di tres pa cervez)
Bon…, si e politiconan ta pensa cu mi lo kere esey kiermeen cu nan a perde mucho tempo bulando riba tapijt magico.

Hecho ta cu despues di cada ciclo di eleccion nos ta tende e mes topiconan.
E unico cos cu ta cambia ta e manera cu e topico ta wordo treci dilanti.
Pa mas di 25 aña caba nos ta tende di reduccion di tarifa di awa y coriente y bahamento di prijs di gasoline (cu ta manera un wip wap).

Mescos no a tende ultimo 15 pa 20 aña di mehoracion di salubridad, pero parce cu e sistema ta asina daña cu ta dificil pa drecha esaki den termino corto.
Semper a tende di bahamento di belasting.

E aña aki ta Shon BBO tabata riba teblachi.
Tin ora mi ta pensa cu mester baha belasting te na zero y toch lo haya un of otro politico cu lo bisa cu e lo sigui baha belasting despues.

Algun cinico lo bisa cu algun di e topiconan aki nunca lo desaparece.
Nan ta mucho valioso como herment politico; un promesa cu por yuda un candidato wordo eligi.
Eleccion a tras di lomba y ta momento pa paz y tranquilidad y spera e ciclo nobo di eleccion.
Pero kizas e paz y tranquilidad aki no ta algo bon tampoco, pasobra ta bini atrobe e grito di cada cuater aña.

“Señores, nos a eligi boso. Nos a considera den totalidad cu boso ta e mihor escogencia cu nos tabata tin entre e escogencianan. Boso a haci promesanan pa cambia y mehora tur cos. Nos ta spera awor cu bo ta mantene bo promesa”.

Locual nos no ta pensa riba, ta e dificil cu ta pa mehora tur cos cu a bin dilanti den periodo di campaña.
Politiconan lo prefera di ignora nos grito riba cada topico.

E lo bisa: “Pa mehora esey ta dificil! E gobernantenan anterior no a laga placa den caha! Nos no por aumenta belasting! Nos lo haci lo mihor posibel. Awor, laga nos papia di ……..”
Nos lo bisa: “Mi no ta interesa di papia riba otro topico. E problema aki ta existi mucho tempo caba y si boso no……….”

Kizas asina por haya e cambio cu a wordo priminti durante campaña, pero tin realidadnan cu mester tene cuenta cune.

CANDIDATONAN A PASA DOLOR

Ta un dolor candidatonan a pasa aden ultimo simannan.
E candidato mester haya suficiente voto pa su partido por cay den gobernacion.
Pa logra e votonan aki, e candidato mester haci promesanan no realistico y contradictorio na un manera respetuoso, na hendenan cu un variedad di interes.

Bisá na un manera irespetuoso: “ta casi imposibel pa wordo eligi sin gaña.”
Si mira bon, casi tur accion politico ta envolvi violacion di derecho di un of otro miembro di comunidad.

E promesanan (dificil pa mantene) ta pone e votador kere cu den termino corto lo soluciona tur problema.
E meta politico ta estrictamente politico, mientras cu e meta di votador ta materialista y di moralidad den natura.

E chens di e candidato pa su partido haya gobernacion den su man ta mara na su habilidad di por convence votadornan cu si e wordo eligi, e lo ta mas agresivo cu su oponente den gobernacion.
Politica ta manera wega di dam of ahedrez.

Bon politiconan conoce e debilidadnan di su contrincante y sa con pa usa esaki pa wordo eligi of re-eligi.
Un di e forzanan grandi ta pa sa con pa ignora ponencianan di e otronan.

E berdad ta grandi, pero mas grandi ta pa tene silencio encuanto e verdad y no menciona cierto asuntonan. Semper ignora e candidatonan cu ta haci buya y no perde tempo y energia cu nan.

PROMESANAN HACI

Ora e promesanan aki bin dilanti, esakinan ta promesanan pa haci riba termino corto, medio of largo.
Politiconan sa esey, pero no por menciona esaki.

Aki no ta asunto di “cumpli awor!”
Aki ta asunto di drecha loke a bay malo y trece mehoracion den e periodo mas corto cu por .
Nos a vota pa mehoracion y esnan eligi pa goberna sa cu nan tarea ta pa drecha tur locual a bay malo den e gobernacion anterior y cu promesanan di campaña den e situacion nobo di gobernacion ta pa wordo kibra.

Awe nos ta mas tranquil cu diahuebs siman pasa y ta na nos pa laga esnan cu nos a pone riba e stoel traha tambe cu tranquilidad pa nos bienestar sin bati riba nan cabez cada seconde: “Cumpli awor!”
Juby Naar

- Advertisement -

1 COMMENT

  1. dear,mr.naar
    mi ta lesa mi diario tur dia
    mi ta orguoso pa lesa cos, cu hende cu tino ,ta skirbi.bo tin un bon selebre.mi ta hopi contento cu semper mi lo wanta e respect pa bo i diario lo keda mi corant vavorito.
    greatings to the whole staff of DIARIO
    en vele groetjes aan jossy mansur
    FROM A friend CALLED
    tippaman

DUNA COMENTARIO

Please enter your comment!
Please enter your name here