Home Social Gloria Vega y Fusion ta presenta den “Caribbean Sea Jazz Festival”

Gloria Vega y Fusion ta presenta den “Caribbean Sea Jazz Festival”

1
0
SHARE
- Advertisement -

gloriavegaDiasabra awor den Cas di Cultura:
ORANJESTAD (AAN) – DIARIO a entrevista e hoben cantante Gloria Vega, kende ta bay participa diasabra awor den “Caribbean Sea Jazz Festival” cu su grupo FUSION. Ademas di e tema aki, nos a puntra Gloria tocante su estudio na Universidad den e Facultad di Hospitalidad y Turismo unda e lo obtene su Master Degree.Ta hopi stimulante pa entrevista un dama pa ken lucha pa progresa no tin limite, no obstante cu e ta un mama, un casa, y un empresario.


DEN CARIBBEAN SEA JAZZ FESTIVAL: Gloria a conta nos na prome lugar, con e deseo cu Fusion tabata tin di participa den Caribbean Sea Jazz Festival a bira un realidad.“ E guitarista di e orquesta Martin Buitenweg, ta un di e organizadornan di e festival, y durante nos ensayonan pa e lanzamento di e CD nos a papie, pa wak si tin algun oportunidad pa nos participa.

Eigenlijk pa e momento ey tur artista tabata selecta caba. Pero na caminda un bentana a habri y Martin no a duda pa tuma contacto cu nos, y diasabra nos ta riba stage”.Manera ta conoci e Orquesta Fusion ta consisti di Gloria, Jean Paul Carrasquilla y nan amigonan cu ta forma parti di e agrupacion musical aki.

Kico ta nifica pa Gloria cu e y su grupo Fusion lo participa den e festival aki? “ Mi ta sumamente orguyoso cu diasabra anochi mi ta representa Aruba como artista local y cu alavez mi ta representa e comunidad Latino. Mi ta representa e fusion cu musica Colombiano.

“ E slogan di CSJF ta ‘it’s all about music’, kiermen tur cos rond di musica, y esaki a habri e porta pa Fusion tambe por presenta nos musica Colombiano cu algo di Jazz den dje.“ Nos ta bay haci un show similar na esun cu nos a presenta den Cas di Cultura, pa lanza nos CD, pero nos ta purbando tambe di keda tog den e ambiente di Jazz”.

Pa Gloria y Fusion e evento aki ta hopi importante y el a agrega pakico:“ Nos ta sinti cu nos tin e oportunidad di mustra no solamente esnan cu a wak e show caba, pero tambe e otro publico cu ta custumbra cu otro genero musical, e trabao cu nos ta haci”.

Gloria kier a haci un invitacion na pueblo di Aruba en general y na e comunidad Latino y Colombiano en particular, pa no perde di presencia e show aki.“ Mi kier invita e comunidad Arubano en general, y naturalmente e comunidad Latino y Colombiano particularmente, pa nan bin apoya no solamente Fusion, pero nos artistanan local cu ta participando den e festival e anochi aki”.

El a splica cu Caribbean Sea Jazz Festival ta bay presenta tres escenario: Fusion ta bay presenta riba diasabra 5 di September den e auditorio di Cas di Cultura di 8.45 pa 9.45’or di anochi. E otro escenarionan lo ta pafo di Cas di Cultura.

Nos a puntra Gloria Vega ki perspectiva Fusion tin pa futuro cercano y mas largo, despues di e Festival di Jazz aki.“ Mi kier purba promociona Fusion mas tanto cu ta posible. Mi tin un contacto cu ta trahando riba esey na Venezuela, pues, pa explora con leu nos por sali y despues di esey mi kier traha riba otro produccion”. Asina nos a conclui e parti aki di nos entrevista.

OTRO FACETA DI GLORIA: Manera nos a splica na cuminzamento, Gloria Vega ademas di e ta un artista, mama, casa y empresario, e ta studiante di Universidad di Aruba, Facultad di Hospitalidad y Turismo, y e ta cabando su Bachelor Degree na December awor, y e ta den proceso di preparacion di su tesis.

Nos a puntra Gloria kico a motive pa e drenta Universidad, ademas di tur su demas compromisonan cu e tin.“ En realidad el a pasa ora mi tabata trahando como cantante na Marriott den Stelaris Casino, cu mi a ripara cu mi tabata tin suficiente tempo disponible, anto mi a dicidi di bay back school. Asina mi a caba Colegio EPI- Hoteleria y Turismo y mesora su tras mi a inscribi den Universidad di Aruba pa mi haci e Bachelor den Hospitalidad y Turismo.

Naturalmente mi ta conta cu e apoyo di mi famia, pasobra si no ta asina, lo mi no a logra. Y tambe e apoyo cu U.A, cu ta duna e oportunidad di un horario flexible di estudio, pa personanan cu tin responsabilidad di famia, trabao, etc., por sigui studia”.

Ki meta Gloria tin despues cu e logra obtene su diploma di Bachelor Degree?
“ Mi kier sigui cu Master y afortunadamente U.A aworaki ta conta cu un programa di Master, pero mi no ta sigur ainda pasobra alavez mi kier dedica mas tempo na mi cas, mi yiunan, trabao, etc., aunke probablemente e caminda cu mi lo sigui ta continua cu mi estudio.

Gloria ta un bon ehemplo di un hende muher hoben cu tin un caminda realiza caba, pero cu ta mustra cu pa progresa den bida y saca e mehor probecho di su potencial, no tin limite si tin boluntad y perseverancia.

DIARIO a puntra e hoben dama, ki mensahe e por tin pa otro personanan den nos comunidad, cu tambe tin potencial, pero kizas tin miedo di asumi reto.“ E mensahe ta pa hendenan adulto manera ami, sa cu Universidad tey, cu e ta flexible y cu nunca ta laat pa bo caba un carera. Estudio por sigui specialmente awor cu e tecnologia cu tin, cu incluso online hendenan por haci nan Master y nan Doctorado, locual ta bon pa nos tur”, Gloria a comenta.

PREPARACION DI SU TESIS: Finalmente nos a puntra Gloria si e por comparti cu nos riba e tema cu e lo trata den su Sriptie.“Hoteleria ta asina amplio cu tin mil y un cos cu mi por investiga. Pero mi tin un interes un tiki specifico pasobra mi ta traha riba tereno di “Real Estate” y aworaki lo mi kier investiga e capacidad cu Aruba tin pa sostene e producto ‘boutique hotels’.

Esaki ta un hotel hopi chikito pero hopi exclusivo y sumamente luhoso. Tin di nan cu tin cinco of seis camber so. Bo no mester di un mega construccion pa desaroya e sistema ‘boutique hotel’ cu su servicionan exclusivo y luhoso, y cu nan ta impacta mes hopi cu hotelnan grandi.

Nan ta opera mescos cu hotel grandi y e guestnan cu ta interesa den keda den un ‘boutique hotel’ ta esnan cu realmente tin e forza financiero pa inverti. Parti di e investigacion cu mi ta bay haci aworaki ta con grandi e demanda ta na Aruba pa e tipo di producto aki y e capacidad cu nos tin pa desaroye”, finalmente Gloria a bisa nos.

DIARIO ta desea e hoben talentoso aki hopi exito den su participacion cu Fusion den e Caribbean Sea Jazz Festival diasabra awor, y tambe den su finalizacion di estudio y presentacion di Tesis.

- Advertisement -

DUNA COMENTARIO

Please enter your comment!
Please enter your name here