Gobierno demisionario no por tuma decisionnan grandi…..

Experto den Ley Constitucional mr. Luciano Milliard:
Manera reforma un Ley di Impuesto!
ORANJESTAD (AAN) – Matutino DIARIO a acerca na Universidad di Aruba, mr. dr. Luciano Milliard, Hurista experto den Ley Constitucional, y nos a puntre tocante e decisionnan cu un gobierno demisionario por tuma y kico no mag haci. El a splica cu despues di eleccion dia 25 di September, Gabinete Oduber IV a entrega su retiro, y na e momento ey Gobernador ta haci un apelacion na prome minister Nelson Oduber y su gabinete pa atende e asuntonan cu tin pendiente te ora cu bin un gobierno nobo, cu ta goza di e sosten di un mayoria den Parlamento.El a splica cue tradicion den nos sistema constitucional den Reino, ta cu e gobierno cu ta demisionario, su tarea ta pa “take care” di tur cos cu ta pendiente. Si acaso tin algo pendiente nan ta gewoon atende, pasobra gobernacion ta sigui, administracion di e pais ta sigui y nan tin cu atende esey te momento cu e gobierno nobo sinta.

“ Ta tradicion den nos Reino, cu un gobierno cu ta demisionario no por bin cu proyectonan grandi. Si nos wak bon den nos literatura constitucional e ta duna como ehemplo un cambio grandi den nos sistema di impuesto.

Esey ta un tarea cu den nos tradicion den Reino ta worde laga pa un gobierno nobo, pasobra esey ta un decision hopi grandi, y lo bay tin un Parlamento nobo y Gobierno hunto cu e Parlamento nobo lo tin di trata e cambionan grandi aki”, señor mr. Milliard a comenta.

Luciano Milliard a aclarea un pensamento robes cu tin cerca algun persona, cu demisionario kiermen solamente ora un gobierno cay.“ Esey no ta corecto. Gobierno ta bira demisionario for di e momento cu e lider di e gobierno, prome minister, bay cerca Gobernador of na Hulanda cerca La Reina, y entrega e retiro di su gabinete y bisa cu e no ta conta mas cu e sosten di un mayoria den Parlamento.

E momento ey e ta bira demisionario y despues, depende di e situacion, si ta despues di un eleccion Gobierno of La Reina na Hulanda ta bisa pa nan trata e asuntonan cu tin pendiente, te ora bin un gobierno nobo.

Si acaso e gabinete (cu tabata un coalicion) a cay, e no ta goza mas di un mayoria den Staten y e ora ey Gobernador ta bay wak si tin otro posibilidad. Si tin un coalicion e ta bay wak si tin e posibilidad di forma otro coalicion a base di e resultado pasa di e eleccion. Si acaso esey no ta posible e ta yama eleccion pa laga pueblo dicidi e ora ey”, mr. dr. Milliard a splica.

Locual tin den discusion aworaki ta aumento di bijstand y eliminacion di BBO. Tocante esaki, Milliard a comenta: “Di berdad nan ta hopi crucial, pero manera mi a bisa cu si tin algo cu ta den plan esey ta worde atendi pasobra e ta algo pendiente y gobernacion tin cu sigui, pero bo no por inicia algo nobo, y specialmente si ta algo grandi.

Manera na Hulanda, si ta un reformacion di bo sistema di impuesto esey bo mester laga den man di e gobierno nobo”, mr. Milliard a reitera.

Parlamento cu si ta keda traha te cu dia 31 di October por bin cu mocion, cu ta eigenlijk un declaracion di Staten puntrando gobierno pa haci algo. “Esey ta loke mocion ta nifica y Parlamento por bin cu mocion, esey no ta problema.

Manera mi a bisa nan ta bay clausura e Parlamento aki na fin di October y nan por sigui traha te e dia ey”, mr. Milliard a subraya.