Home Deporte Goleada di Bubali R.E. contra Dakota 4-0…

Goleada di Bubali R.E. contra Dakota 4-0…

2
0
SHARE
- Advertisement -

futbol1ORANJESTAD (AAN)— Despues di 12 aña ta warda, e fanaticada di Bubali a basha bai stadion Guillermo Prospero Trinidad Diasabra anochi pa ta testigo di e regreso di e Orguyonan di Noord den Division di Honor. Bubali a produci un gran sorpresa y a shock e “maribombanan” di Dakota cu e score di 4-0. E orguyonan di Noord a mustra un tiki nervioso na cuminsamento pero despues di 5 minuut a tuma control di e wega y a cuminsa toka e bala y produci algun bon combinacionnan cu a crea basta peliger pa e gol di Dakota.


Na di 8 minuut Maurice Escalona a manda e promer señal ora cu e ta manda un misil for di pafor di area penal, pero cu a pasa mucho halto. E promer gol a bin na di 12 minuut ora cu Sonny Hooi riba un hugada individual ta kita 3 defensa y cu un tiro cruza a vence e portero di Dakota pa pone Bubali dilanti 1-0, despues di e gol aki Bubali a sigui preciona y e di dos gol a bin na di 23 minuut ora cu riba un centro for di e banda robez, e defensa no a logra rechasa y atrobe Sonny Hooi a pone nan paga caro ora cu ela encontra cu e rebote y a manda un tiro lastra cu a manda net halto pa duna Bubali e bentaha di 2-0.

E “amarillonan” di Dakota a cai den un shock despues di e gol aki, y no tabata sa con pa responde ante e situacion aki. Di otro banda Bubali a sa di probecha e momento di desorientacion aki y a sigui hunga su wega usando full e veld.

futbol2Na di 32 minuut ta “El Matador” John Villamarin a batisa su promer gol den Division di Honor ora cu den un bon combinacion cu Sonny Hooi a drenta area penal y cu un tiro lastra a fusila e portero di Dakota pa pone e wega 3-0. Cu e marcador aki e promer tempo ta termina.
Segundo Mitad

E “amarillonan” di Dakota a drenta e wega aki poniendo tur nan confianza cu e velocidad di nan delanteronan lo tabata suficiente pa desequilibra e defensa di Bubali, pero a encontra un defensa bon para. Den di Segundo mitad Dakota ta Sali mas determina y tuma mas risico pa por corta bentaha, pero Bubali tabata cla pa nan y probechando un mihor condicion fisico a defende e bentaha aki, y a cuminsa toka mas den medio campo y scondiendo e bala pa Dakota.

Esaki a causa bastante frustacion den e hungadornan di Dakota cu hasta ta produci un carchi cora lagando Dakota cu 10 hungador riba tereno. Bubali a haya varios bon oportunidad pa aumenta pero no a probecha.

Ta Miguel Carasquilla cu na di 90 minuut a pone e cherry riba e bolo ora cu riba un contra atake ta combina bon cu John Villamarin y ta los un punta di pia cu ta bai para den net pa pone e score final 4-0. Cu e Victoria aki Bubali ta piki su promer 3 puntonan di e campeonato aki.

E orguyonan di Noord a hunga manera un machine bon zeta y a duna gala di bon futbol. Un pabien ta bai na tur e fanaticada di Bubali cu e Victoria aki. E proximo wega di e Orguyonan di Noord ta Diasabra awor 12 di September, y Bubali lo ta hungando na cas, esta Compleho Deportivo Frans Figaroa.

E wega lo ta contra e “Chocolate City Warriors” di Brazil Jrs. Bala ta cumina lora pa 8:30 di anochi. Un invitacion ta bai na tur e fanaticada pa bin duna apoyo na e team di Bubali. Yega..awo tin co !!

- Advertisement -

DUNA COMENTARIO

Please enter your comment!
Please enter your name here