ORANJESTAD (AAN): Un cantidad di persona, incluyendo turista, a acudi Diabierna merdia 12’or riba Plaza Simon Bolivar na Playa, pa asina manifesta contra Hugo Chavez.Esaki a forma parti di un manifestacion mundial cu a tuma lugar, den tur skina di mundo. Asina nan kier mustra, cu mundo a fada di e disparate y cosnan raro cu e president di Venezuela ta haciendo cu su pueblo, y cu Latino America.
“Hugo Chavez COMUNISTA viviendo como CAPITALISTA” tabata e.o. un di e pancartanan cu a worde traha y mustra riba Plaza, durante e protesta pacifico aki.
Pa 12’or exactamente, esnan presente a canta Himno di Venezuela, cu e speranza cu e himno lo por haya un biaha mas su berdadero contenido.
Mundo henter a haya sa, y ya nan a cansa di Hugo Chavez! Esey tabata e mensahe cu ta worde manda rond di e planeta aki den e protesta mundial.
Esnan cu a organiza e protesta mundial aki, ta bisa cu nan ta cansa cu president Hugo Chavez di Venezuela ta insulta tur hende, ta insulta Latino America y mundo, y cu e ta trata di impone hopi mentira, miedo, y mal educacion cu su revolucion anacronico y delirante.
Nan ta bisa, cu mundo henter ta fada di mira asina hopi hipocrecia di Chavez, kende di un banda ta papia di intervencionismo, y di otro banda e mes ta e presidente mas intervencionista cu a yega di existi! Mundo ta cansa cu e ta hunga cu destino economico di miyones di hende. Mundo ta fada di su insulto, groseria, y di su actitud.
