Home Deporte Gym Emiterio “Theo” Bareño a Bira Realidad

Gym Emiterio “Theo” Bareño a Bira Realidad

4
0
SHARE
- Advertisement -

gin1ORANJESTAD (AAN)— Recientemente na Centro Deportivo Frans Figaroa na Noord, na unda nos a presencia e nombramento di e gym den e deporte di hisamento di peso, na unda esaki for di awor en adelante lo carga number di Sr. Emiterio “Theo” Bareño. Un grupo grandi di invitadonan di honor como tambe ex-hisadornan di peso como tambe Theo su famia, tabata presente na e bunita atardi aki. Representante di COA como Aruba Amateur Weightlifting Association a otroga na Sr. Bareño, un placa di reconocimento pa su gran labor pa e deporte di hisamento di peso, mester bias tambe cu e airbrush ariba e muraya di e gym, a impresiona tur presente, el a keda magnifico. Diferente dignitario den mundo deportivo arubano a hiba palabra na e occasion aki, tur a elogia e gran trabou di Sr. Bareño, un persona humilde cu a bringa pa su deporte di weightlifting bai padilanti, cu fe y perserverancia e la logra esaki.

Remarcabel ta cu Sr. Bareño a dedica mas di 50 aña na e deporte di weightlifting y te ainda ta activo, guiando e mas hobennan den e deporte di peso. Aki ta sigui un relato mas extensor di bida di sr. Theo Bareño.

Despues di a practica e deportenan di futbol y volleyball, na 1957 Emeterio Bareño a decidi di bai haci un deporte individual. El a cuminsa cu weightlifting na su cas cu algun amigo. Nan no tabata tin platform, bara olimpico etc, pero nan tabata train pa competi den campeonato nacional.

Tabata na aña 1959 cu Bareño a participa pa prome biaha y a sali na di tercer lugar. Na 1961 el a bira campeon di Aruba den categoria mediano. El a mantene esaki te cu 1965 ora el a bai Hulanda.

Na 1969 el a bolbe Aruba y el a yuda lanta e deporte di Weightlifting cu a cai masha hopi mes. El a bira campeon di aña 1969 te cu aña 1973. Na 1972 Bareño a gana medaya di oro na Venezuela den un competencia entre Universidad di Zulia, Aruba y Ecuador.

Na 1973 el a bira President di e bond y a retira como hisador activo. Na aña1975 Emeterio Bareño a funda e club di peso di Centro di Bario Noord (awor T.N.T. Gym). Nan tabata train den un local bieu di St. Anna School, cu nan a haya di Chin Flanegin.

Cu yudansa di A.S.U. y Jeugdzorg nan a haya algun material pa entrena.E club tabata conta cu hisadornan manera Patan Farro, Hugo Themen y Pablito Semileer cu despues a bay Hulanda, Ludwig Themen, rumannan Everon etc.

Hopi di nan tabata campeon di Aruba y di Antiyas den categoria hubenil.Despues cu nan tabata tin mester di e local nos a haya nos mes obliga di parti e materialnan bao di e hisadornan. Mientras tanto a sigui busca un otro lugar.

A tuma 2 aña prome cu Aruba Sport Unie a traha un lugar mas grandi den sport Centrum Noord. Danki na e esfuersonan di Emeterio Bareño den Aruba Sport Unie.

Despues di 33 aña e club aki no solamente ta campeon di Aruba, pero ta conoci den Caribe. Tambe na diferente ocasion nan a gana “The Strongest Team” di Aruba.

Bareño tin mas cu 37 aña den Aruba Sport Unie, unda el a ocupa puestonan di Vice Presidente y e Segundo Secretario.E tabata miembro di Comite Olimpico Arubano y tin 39 aña den directiva di Aruba Weightlifting Association.

Den e parti tecnico Bareño tabata coach di El a sigui curso di entrenador na Mexico, aña 1982. Na 2005 Bareño a ricibi su carnet di referee internacional for di International Weightlifting Federation.

El a actua como referee y scorer tanto den weightlifting y powerlifting y como hurado den competencia di bodybuilding.Durante añanan el a coach diferente hisador manera Alejandro “Patan” Farro na Weganan Centro Americano y del Caribe na 1970 na Panama,

Hugo Themen, Junior Faro, John Henriquez, Hervé Ruiz na Weganan Centro Americano y del Caribe, Pan-Americano y hasta Junior Faro na Weganan Olimpico na Atlanta na aña 1996.
Tambe e tabata fundador di Aruba Bodybuilding & Powerlifting Association. Actualmente e ta miembro di Fundacion Facilidadnan Deportivo.

Pa su dedicacion na e deporte el a ricibi condecoracion di Orde van Nassau na 1992. Tambe for di International Weighlifting Federation el a ricibi na aña 2005 un Golden Award pa su 30 aña den peso.

Asina el a ricibi diferente reconocimento for di instancianan pa su trabao den weightlifting.
E aña aki Emeterio Bareño a wordo instala tambe den e Salon di Fama di Aruba dor di e Museo di Deporte

Ademas di a traha pa deporte pa Noord, e tabata miembro di Asistencia Social Noord. E tabata tambe secretario di Comision di Mayornan di Little League di Noord, 1987.

- Advertisement -

DUNA COMENTARIO

Please enter your comment!
Please enter your name here