Lectornan ta contento cu e sistema nobo, y tambe con rapido e website ta..
ORANJESTAD (AAN): Hopi positivo mes tabata e reaccion cu DIARIO a ricibi, ora cu Diamars siman pasa a lanza e website nobo y renoba di DIARIO Online.E reaccion a bin for di tur skina di e planeta aki, tanto directamente riba e site, como tambe via FaceBook y e-mail.Algo cu hopi hende a gusta, ta cu aparte di e ya existente “dot com” nomber cu DIARIO tin via di diarioaruba.com …
awor DIARIO tin tambe su “dot aw”, cu ta e identificacion Arubano: diario.aw
Hopi felicitacion a drenta, cu DIARIO Online ta haya su nacionalidad Arubano! Awor cu domain-name di ‘diario.aw’, DIARIO ta rindi homenahe na e abreviacion postal y di internet pa Aruba, esta “AW”… pa usa riba su Website accesible pa henter mundo.
Algo bon ta cu esun anterior, esta di diarioaruba.com lo sigui funciona sin stop! Simplemente ora di browse, bo conexion di Internet automaticamente ta bay pa diario.aw
E website di DIARIO Online a haya un imagen mas agradable pa browse, menos complica, y sigur facil pa busca y haya loke bo tin mester. E website nobo di DIARIO, ta hiba e mundo di informacion den un rutina mas activo y dinamico di informacion di Dialuna pa Diasabra.
E website nobo ta dinamico, y e dianan venidero lo bin aun mas cambio riba dje, pa asina haci e experiencia di browse riba e red noticioso mas bishita di Aruba, aun mihor cu nunca.
DIARIO Online awor por ofrece propaganda di video, posibilidad di podcast, y formanan mas ingenioso pa promocion di propaganda. Algo cu tur hende lo gusta ta cu a optimaliza e Search Engine di DIARIO.
Tambe esnan cu ta browse, por cuminza follow DIARIO via Twitter, na @diarioaruba pa asina bo haya ultimo update diariamente. Bishita twitter.com pa por haci esey.
Fuera di esey, awor bo por check DIARIO tambe riba Facebook pa asina bo ricibi informe regular via bo computer. Bishita www.facebook.com/diarioaruba pa asina bo haya sa con pa bira friend di DIARIO.
Mientras tanto, informa bo famianan rond mundo cu awor DIARIO tey cu un imagen nobo, cu un formato nobo, y mas update diariamente di noticianan cu ta pasa na Aruba.
Noticianan semper cu e mihor informacion di cual semper bo por a depende riba e Matutino di Aruba pa haya esey.E trafico mensual cu e website di DIARIO Online ta genera, ta sigui crece constantemente.
Mayoria di hendenan ta check e noticianan cu ta pasa na Aruba, pero tambe ta bishita e site pa wak e Anuncionan di Morto, y tambe seccion di Cumpleaños! Aki nan por mira via Internet, e potretnan na color.
Bishita DIARIO Online pa bo lesa djis un parti di e comentarionan cu a worde manda, relaciona cu e formato nobo cu awor ta load cu speed di jet, ta mas simple, y menos complica.
E ta habri hasta mas rapido cu cualkier otro website di noticia. Un lector hasta a skirbi: “Porfin Diario Online ta hasta habri mas rapido cu Yahoo mes”!
Specialmente aworaki cu a caba di lanza e website renoba, tin prijs special y paketenan atractivo pa pone propaganda riba DIARIO Online. Probecha di e chens di pone aviso riba e website di noticia Arubano na Papiamento cu mas ta worde lesa rond mundo.
