Diabierna a habri y hopi a sali trempan pa vota

Publication: Saturday, 26 September 2009. Categoria: General

urna_elect_30_Updated 1:45 p.m. Aruba time
ORANJESTAD (AAN): Dia a habri trempan pa hopi Urna Electoral na Aruba.  Pa ora cu holoshi a bati 8′or, ya caba tabatin cantidad di persona para dilanti nan Stemdistrikt, sperando nan turno pa deposita voto.
   Den e prome dos ora di votamento, ta notable cu hopi hende a bay vota caba! E pensamento semper tabata cu den oranan di mainta e fluho di votador ta “slow”, pero e biaha aki si parce cu tin un cambio den mentalidad.
   Tabatin algun dificultad na algun Urna Electoral, incluyendo e hecho cu na San Nicolas, tin uno cu no por a habri net 8′or. Tambe na Ayo tabatin escasez di potlood cora, pero esey a worde remedia hopi rapido. Despues di 9′or, ya caba algun Urna Electoral tabatin rij di hende para pafor cu un “waiting-time” di 30 pa 45 minuut.  Lo mas sorprendente ta cu den oranan di merdia, e fluho di hende den rij a disminui.

   Tin informe cu a drenta, cu na algun Urna Electoral, no a permiti e diferente “checkers” pa drenta y controla e situacion for di paden.  Esaki nifica cu nan mester keda pafor, y wak door di bentana.  Mientras tanto, pueblo ta worde pidi pa raporta cualkier acto sospechoso inmediatamente na autoridad.  Mientras tanto, cayanan di Aruba ta yen-yen di auto, coriendo pariba-pabao.
   Lider di MPA, Monica Kock a deposita su voto na Cayena Kleuterschool indicando cu awe ta un dia hopi positivo.  E ta corda tur hende cu voto di cada persona ta valioso, y mester ta conciente ora cu bo deposita esaki.  Si bo kier haci un diferencia relaciona cu e fastidio di partidonan tradicional, anto mester vota pa MPA.
   Mientras cu Lider di RED Democratico, Rudy Lampe, a deposita su voto na Sabana Grandi Center. El a haci esey cu menos fanfaria, debi cu e mainta aki su omo a fayece.  Pesey mes ningun di su famianan tabata presente cune pa haci e votamento. 
   Prome Ministro Oduber a vota na EPB Hato, y na su salida a expresa su mes hopi rabia pa cu DIARIO relaciona cu caricaturanan.  Pero e no a bisa nada encuanto e contenido di tur e pruebanan presenta, di e.o. e miyones cu ta worde gepomp den saco di Abogado Hendrik Croes, den friends & family, y demas actonan bergonzoso.   Riba e asuntonan ey e no a reacciona, pero riba e caricaturanan, cu ta mas bien un “spotprent”.  Ta parce cu su sentido di humor porfin a caba.  Pero lastima pe, e sentido di humor di pueblo a caba hopi tempo caba!
   DIARIO a tuma nota cu tin diferente medio di prensa di exterior presente na Aruba pa cubri e eleccion aki, incluyendo crew di TV di Colombia, Venezuela, y tin prensa di Curacao tambe presente riba e isla.
Keda pendiente pa mas update durante dia.

2 Responses to 'Diabierna a habri y hopi a sali trempan pa vota'

  1. September 25, 2009 at 2:57 pm
    Michael D. Tromp
  2. September 25, 2009 at 7:43 pm
    R.Croes

Leave a Reply