Home Social Horticultura cu tecnologia avansa

Horticultura cu tecnologia avansa

13
0
SHARE
- Advertisement -

oricultura1Randall Croes: Industria nobo pa Aruba
ORANJESTAD (AAN): Aruba ta importa casi 45 miyon Florin di cuminda fresco pa aña. Berdura, ta esun di mas caro pa transporta, conserva y ta rond di 12,000,000 Florin pa aña. Frutanan fresco tambe ta yega rond di 6,000,000 Florin pa aña. Sacando afor frutanan di clima friu, manera appel, peer, plum, strawberries etc. e frutanan tropical manera patia, melon, papaya pinapple, etc, lo por alcansa un cantidad di alrededor di 2,000,000 Florin pa aña.


E Aruba moderno di awe pues ta consumi cantidadnan basta grandi di alimento vegetal y tambe di piscá, tanto pa nos poblacion di rond di 110 mil hende como tambe pa e average di 12,000 pa 20,000 turista (dependiendo di e temporada) cu ta keda den nos hotelnan.

Nos poblacion y e cantidad di turistanan ta suficiente hopi pa por produci pa nan, localmente, productonan manera: tomati; lechuga (algun rasa tropical); promenton corra, berde y geel; concomber, cilantro, etc. Ya caba ta produci exitosamente mushroom na Aruba! Aquacultura (cria di pisca pa come) tambe ta un opcion cu por opera den un mercado di nos tamaño, cu e opcion di exportacion pa Curaçao y Bonaire.

E sistema cu por funciona na Aruba pa produci esakinan mi ta yame Horticultura cu Tecnologia mas avansa di hydroponics, cu ta funcionando den clima di desierto rond di mundo caba. Por ehempel na Israel, Argentina, Chile y California entre otro.

Tambe plantacionnan intensivo di fruta, manera papaya, pampoena, melon, patia, mango, cashu, guyaba, sorsaca lo por funciona cu awa recycla y desinfecta, y filtra den porta di e plantacionan aki, cu calidad di AA garantiza.

Pa e industria nobo aki, cu por bira un pilar economico nobo, por funciona, Gobierno tin cu tuma e promer paso y bira lider di e iniciativa aki cual Democracia Real ta compromete su mes pa realisa.

Ken tin cu inverti prome?: Mescos cu na Hulanda, ta Gobierno ta traha dijk y coba sloot pa e boernan por planta mata y cria bestia. Aki na Aruba, ta nos Gobierno nobo lo inverti pa awa di dam y awa di pos bira mas disponible pa esnan cu kier participa den e industria nobo aki. E Horticultura cu Tecnologia avansa di Hydroponics por funciona tambe cu awa cu WEB ta produci, pero cu un tarifa special pa industria.

Pakico ta importante pa nos produci nos mesun alimento: Prijs di petroleo ta hisa prijs di transporte y refrigeracion asina hopi cu e ta bira impagabel pa hopi hende. Esey ta haci cu strategicamente ta hopi importante pa nos tin seguridad di alimento.

Berdura cu crece na Aruba, ta dura hopi mas tempo den reki di supermercadonan den bon condicion of den bo frigidair na cas, scapando nos economia hopi placa di perdida y energia pa fria productonan. Cu e industria nobo aki Aruba por come cuminda mas fresco y barata, aliviando e peso di costo di bida pa famianan.

Kico mester haci: (1) Creaccion di persona juridico: Cooperativa di Alimento (CA). Esaki ta un rechtspersoon (persona juridico) den ley di belasting cu ta haya e beneficio di funcioná liber di cualkier tipo di belasting di ganashi, BBO, of di impuesto di importacion di su fertilizer, tubonan y equiponan pa hydroponics, simiananan etc., te cu cierto nivel di venta pa aña (negoshi chiquito y mediano) Aquacultura y cria di bestia pa alimentacion tambe ta calificá.

(2) Creaccion di e departamento di Hydroponics na Sta. Rosa, invitando di manera regular, expertonan di exterior, pa duna workshops pa tur interesado ta bon informá;
(3) Baha e gastonan inversion di start-up door di facilita leasing di equiponan di Hydroponics, principalmente structuranan mobil pa traha greenhouse pa stop influencia di awacero, solo y bestiannan y plaganan, via di Sta. Rosa

(4) Bin cu un systema di garantiya pa fianzanan chiquito, sea door di amplia e facultadnan di Fondo di Garantiya pa Vivienda, of door di duna garantiya parcial pa banconan local por fia na interes mas abou na e sector nobo aki. Lo por stimula of exigi via di ley cu un parti di e total di prestamo di banco mester bay pa e sector nobo aki.

(5) Upgrade nos damnan y instala pompnan cu ta drief pa facilita recohe awa den e damnan existente. Lo haci un studio ambiental pa wak unda lo ta cumbini pa traha mas dam pa nos preserva pa mas largo tempo e awa cu ta cai den temporada di fin di aña.

(6) Lo facilita terreno y tambe limpieza y preparacion di terreno cu equiponan cu ya caba Sta. Rosa tin y lo ta hopi mas pro activo pa yuda esnan interesa di invertí. Awendia bo no tin mucho caminda di bay pa haya conseho con pa cuminsa.

(7) Lo por instala un systema di tubo di awa pa horticultura, cu awa for di dam of posnan cu awa dushi pa plantacionnan cerca di esakinan. Den caso di e zona rond di Barcadera, unda cu awa recicla ta bay den lamar, lo haci e estudionan necessario y e inversionnan den filtracion y sterilización cu tin mester pa e awa ta di bon calidad pa plantacionnan (volkstuinen) di fruta di palo di mata, y no pa berdura. Tin espacio suficiente tur dos banda di caminda, e ta un area cu no por traha edificio halto pa motibo di avionnan cu ta lanta, e ta ideal pa mihor uso, di hortcultura y agricultura.

(8) Cria di pisca (Aquacultura) ta otro opcion cu Democracia Real lo promové, mirando cu nos tin condicionnan di clima favorable.

Awor ta un bon oportunidad pa nos diversifica nos economia door di spaar cantidadnan grandi, di casi 10 miyon pa aña di importacion di berdura y fruta, sin conta cuanto miyones na corriente cu ta gasta pa fria productonan importá durante nan viaje pa Aruba y despues cu nan yega.

Democracia Real ta kere den un diversificación economico di Aruba cu lo crea oportunidad professional nobo pa nos hobennan y cultivadornan cu beneficionan pa nos tur. Cu sosten di Pueblo dia 25 di September e Gobierno nobo di Democriacia Real lo ta lider y e agente di cambio pa inverti y gia e industria nobo aki di Horticultura Moderno pa Aruba.

- Advertisement -

DUNA COMENTARIO

Please enter your comment!
Please enter your name here