Home Hudicial Huez haya straño cu fiscal a laga hoben haya cu arma di...

Huez haya straño cu fiscal a laga hoben haya cu arma di candela bay

4
0
SHARE
- Advertisement -

Arma di CandelaDespues di apenas 1 dia
ORANJESTAD(AAN): Diabierna Jeremy O.W y Eugene C.S. a presenta dilanti di huez.
J.W y E.S. a wordo acusa di venta y posesion di cocaina y marihuana den e periodo di Januari 2008 y 27 di Maart 2009.Banda di esaki, E.S. di 16 aña a wordo acusa di conhuntamente cu otronan venta y posesion di cocaina entre 22 di October 2008 y 12 December 2008.El a wordo acusa tambe di posesion di marihuana riba 12 di November 2008.
Ademas di esaki el a wordo acusa di arma di candela y patronchi skerpi.Tambe e ta wordo acusa di ladronicia di un portmoni, usando violencia.E violencia tabata encera cu el a dal un persona cu un piedra den cabez.

Huez a cuminza repasa rapport di e caso den cual ambos acusado ta envolvi.Segun huez, na dado momento rond September y October di 2008, a drenta diferente yamada atravez di tip line di cuerpo policial, den cual hende tabata reclama bisa cu na un cas na Weg Rooi Hundo tin hende ta bende droga.

Polis a cuminza observa e cas riba 15 di Januari y wak 15 persona drenta y sali for di e cas.
Siguiente dia nan a wak 23 hende drenta sali for di e cas.

Asina cos a sigui y na Maart durante observacion tambe a ripara cu 11 hende a bishita e cas.
Polis a wak cu varios di e personanan cu tabata sali for di e cas tabata Sali cu algo den nan man y hinca esaki den nan carson.

Polis a cuminza para e personanan aki y a ripara cu nan tabata tin sakitonan di droga.E hendenan a wordo interoga y nan a admiti cu nan tabata cumpra droga na e cas.Cu permiso di Huez Comisario, Arestatie Team a drenta e cas, pasobra a wordo bisa tambe cu por tabata tin arma den e cas.

Den e cas nan a topa cu E.S y J.W y nan a wordo deteni.Un cantidad di droga a wordo haya, como tambe sakitonan di plastic.A haya tambe 5690 florin y 288 dollar.J.W a admiti cu e tabata bende droga na e cas.

El a splica cu ta su tata a siñe con pa prepara y bende droga.Ora su tata a fayece, el a sigui bende droga hunto cu E.S.El a splica tambe cu amiga di su tata a dune e droga y un arma di candela.
E arma di candela el a duna E.S como regalo, pero algun tempo atras E.S a wordo haya cu e arma.

Cerca polis E.S a declara cu e droga haya den e cas tabata di dje so, pero ora huez a puntre na corte, el a admiti cu e y su amigo tabata propietario di e droga.

Pa loke ta e caso di hortamento di cartera y maltrato, huez a repasa e rapport cu ta bisa cu polis a wordo manda pa Seroe Preto door cu tabata tin un homber benta riba vloer.

Ora nan a yega nan a topa cu un homber cu herida na su wowo y cabez cu tabata sangrando.
E homber a declara cu el a bin Aruba vakantie for di Hulanda y el a bay cumpra cervez na un lugar na Seroe Preto.

Ora cu el a Sali for di e lugar, el a wak diferente hoben para pafa y na dado momento un di nan a para dilanti di dje y despues el a lanta den hospital.

E no ta corda loke a sosode, pero diferente testigo a wak con algun hoben a bin cerca e homber y uno a dal e cu un piedra den su cabez.

El a cay abao, nan a coi su cartera y nan a schop e tambe durante cu e tabata riba vloer.
E homber a haya sla serio na su wowo y cabez.Nan a core bay cu su placa.

E.S a declara cu el a coi e piedra, un tal Juni a coi e piedra for di dje y a dal e homber cune.
Juni mes a declara cu ta E.S a dune e piedra pa e dal e homber.Otronan a bisa tambe cu E.S lo a bisa “ban dal e abao”.

Huez a puntra E.S dicon a dicidi di ataca un homber inocente cu un piedra y el a bisa cu e tabata bao di influencia di alcohol y droga.

E.S tambe a wordo acusa di ta bende droga na Rooi Hundo na 2008, hunto cu un tal Frans.
Eynan el a wordo deteni y polis a haya un arma di candela riba dje.

E tempo ey e tabata tin 15 aña, mientras cu ora el a maltrata e persona cu piedra, e tabata tin apenas 14 aña.Pa e caso di ladronicia y maltrato el a sinta alrededor di un luna den detencion preventivo y hof a lage bay, cu varios condicion, entre otro cu e mester purba haya un school.

Despues di esey el a wordo deteni pues cu arma di candela y Diabierna na corte huez mes a expresa di no por a compronde cu fiscal a dicidi di laga E.S bay despues di apenas un dia di detencion, siendo cu nan a haye cu arma di candela cu bala den dje.

Casa di e persona cu a wordo maltrata na 2007 a presenta na corte pa entrega un demanda.
E demanda tabata encera 300 florin cu nan a horta for di dje y 95 florin pa trato medico.
Ademas di esaki un demanda a wordo entrega di 2422 florin pa e daño material y inmaterial.
E victima te ainda tin problema cu su bista door di e sla cu el a haya.

E ta wak dobble, e ta bao di tratamento na Hulanda ainda y tin chens grandi cu e mester wordo opera na su wowo.Fiscal den su requisitor a cuminza na bisa cu den e cas di J.W a haya 739 gram di marihuana y 200 gram di cocaina, ora cu nan a listra.

Pa loke ta e otro acusacionnan di E.S fiscal a bisa cu ta acusacionnan hopi serio.El a bisa cu E.S ta acusa di ta envolvi den 3 caso criminal y J.W den uno.Fiscal a bisa cu pa loke ta e cantidad di castigo, el a tene cuenta cu e hecho cu E.S tin apenas 16 aña.

Apesar cu el a comete 3 acto criminal, fiscal a exigi mesun tanto castigo pe, cu el a pidi pa J.W, kende a comete solamente 1 hecho castigable.Segun fiscal, e manera cu J.W a envolve su amigo hoben pa yude den bendemento di droga pues ta hopi reprochable.

Fiscal a exigi un castigo incondicional di 30 luna pa ambos sospechoso.Abogado Chris Lejuez representando J.W a bisa huez cu e castigo exigi contra su cliente ta mucho halto.El a splica cu no por ta asina cu ta pidi mesun castigo pe, cu pa un persona cu a comete mas acto criminal.

Ademas di esaki Lejuez a bisa huez cu su cliente lamentablemente a wordo influencia pa su tata, kende en bez di siñe hasi trabaonan di carpinte por ehempel, e tata a siñe bende droga.
Lejuez a mustra riba e hecho cu e cantidad di droga haya den e cas di J,W no ta hopi.

Ademas di esaki e abogado a indica cu e cantidad di placa haya den e cas no ta ni yega pa cumpra por ehempel 1 kilo di cocaina.Si nan por a cumpra 1 kilo di cocaina mes, mester tene cuenta cu e hecho cu hendenan haya por ehempel na aeropuerto ta trafica 1 kilo di cocaina, ta haya un maximo di 1 aña di castigo.

Pesey Lejuez a bisa huez cu ta inhusto cu fiscal ta exigi un castigo di 2 aña y mey contra su cliente.El a splica tambe cu su cliente a distancia su mes di tur e droga y tur e placa y a tuma responsabilidad pa loke el a hasi.

Te hasta ora E.S kier a gaña cu ta E.S so ta doño di tur e droga, J.W a admiti cu e tambe ta doño di e droga.Segun Lejuez, e 5 luna cu su cliente a sinta ta mas cerca di loke e castigo lo mester ta.
Abogado Nilo Croes, un di e 3 abogadonan cu tabata representa E.S a bisa cu e sistema judicial di Aruba mes a faya.

Mirando cu na dos occasion E.S a wordo laga den libertad facilmente despues di a wordo gara ta bende droga y ta carga arma, E.S lo por a haya e impresion cu ta facil pa comete crimen y sali bek.

Pesey quizas el a sigui den mundo criminal. Croes a bisa cu 2 aña y mey di KIA, lo ta final di su cliente.Abogado Ricardo Yarzagaray representando E.S tambe a bisa huez cu e castigo exigi ta mucho halto.

El a bisa cu lo ta bon pa su cliente participa na e asina yama ‘Jeugd Leer Programa’ di reclasering, cu por yude keda riba bon caminda. Huez a indica cu veredicto ta bay ta dia 2 di October.

- Advertisement -

DUNA COMENTARIO

Please enter your comment!
Please enter your name here