RANJESTAD(AAN): Diahuebs huez a duna su veredicto den e caso den cual Jose.M.J.S, Hose J.d.CV, Epifanio v.d.B, Alejandro L., Giovanni B.T y Clyve I.R.M a wordo acusa di a yuda e dos sospechosonan cu a malversa placa for di SVB.Nan a yuda door di como propietario di compania, permiti pa placa wordo deposita riba nan cuenta.Placa cu e dos sospechosonan a horta for di SVB usando un triki relaciona cu companianan cu a bay bancarota y ainda mester a cobra cierto placa.
Fiscal durante tratamento di e caso riba 27 di Augustus a exigi castigonan cu ta varia entre 4 luna y 10 luna condicional y oranan di trabao comunitario di 120 te cu 240.
Fiscal a hasi esaki basa riba e diferente sumanan cu e personanan a ricibi riba nan cuenta.
Huez Diahuebs a bisa cu e no ta haya cu e sospechosonan mester haya trabao comunitario.
Cada un di e acusadonan a sinta por lo menos 21 dia den detencion preventivo y ademas di esaki pa cada un ta conta cu ta prome biaha cu nan a haya nan mes den problema cu husticia.
Huez a bisa tambe cu un castigo cu nan a sinti tambe ta cu nan negoshi a sufri door di e problema cu nan a haya nan mes den dje, specialmente mirando tambe cu tur cos a sali den prensa.
Ademas di esaki nan no a probecha totalmente di e suma di placa deposita riba nan cuenta, pasobra esun cu a mande pa nan semper a ricibi mayor parti di esaki.
Pesey huez a dicidi di duna cada un di e acusadonan un castigo di solamente 6 luna condicional, kitando e tempo cu nan a sinta caba den detencion preventivo.
