Segun Financial Action Task Force:
ORANJESTAD (AAN): Financial Action Task Force (FATF) tin un opinion hopi negativo riba e manera con Aruba ta atende cu e practica di labamento di placa y financiamento di terorismo, of mihor bisa: con Aruba no ta atende cu esakinan.
Esaki segun un rapport di FATF, for di cual miembro di Parlamento Hulandes Johan Remkes (VVD) a cita algun passage Dialuna.
El a haci esaki pa haci pregunta na secretario di estado di relacionnan di reino Ank Bijleveld (CDA) y Minister di Finanzas (PvdA), Wouter Bos.
“Kico ta boso opinion riba e imagen desastroso ilustra di e situacion relaciona cu ‘the anti-money laundering (AML) and combating the financing of terrorism (CFT) in place in Aruba, the Kingdom of the Nederlands’?”, Remkes a puntra.
Pa ilustra e maneho desastroso el a cita algun di e remarkenan for di e rapport skirbi na Ingles:
“E medidanan actual cu mester salvaguardia transparencia y integridad, ta completamente inadecuado y ta bin cu un riesgo substancial cu nan lo por worde malusa simplemente pa labadornan di placa y otro criminalnan”.
“Tambe ta asina cu e sistema Arubiano di medidanan preventivo di AML/CFT ta des-organiza, incompleto y falta efectividad”.
Pesey Aruba urgentemente ta worde conseha pa considera financiamento di terorismo como un forma separa di criminalidad.
E rapport ta sigui bisa cu e isla mester considera seriamente pa bin cu legislacion completamente nobo y coherente, cu lo ta un contesta pa loke falta y lo cumpli cu loke FATF ta exigi.
E control mester worde organiza y reforza.
Remkes den Parlamento a puntra gabinete Balkenende con hopi e asunto aki por daña reputacion di Reino Hulandes.
El a puntra tambe ki medida ta bay worde tuma, pa drecha e imagen desastroso aki den futuro.
El a puntra na final tambe kico ta e ultimo desaroyonan pa loke ta e investigacion profundo riba corupcion y integridad di maneho di Aruba.
