Cuanto ora despues e tabla lo bay bula
OBSERVADOR POLITICO: Cuatro luna pasa Nel Oduber y Rudy Croes a reacciona furioso ora cu un raportahe secreto di un servicio di inteligencia di Hulanda na Aruba tocante e situacion den gobernacion na Aruba a ‘leak’. Straño ta cu di banda di Nel y Rudy a protesta furioso contra e hecho cu e raportahe a ‘leak’ pero cu ningun momento nan dos a bisa cu e contenido mes di e raportahe lo tabata incorecto.
Y dia cu den Tweede Kamer na Hulanda gobierno Hulandes a worde cuestiona tocante contenido di e raportahe secreto aki ningun momento gobierno Hulandes a hala atras.
Es mas gobierno Hulandes a anuncia cu e situacion na Aruba ta mas peor ainda y cu lo cuminsa cu un investigacion tocante corrupcion na Aruba y esaki cu of sin cooperacion di gabinete Oduber.
Wel kico tabata contenido di e raportahe. Dos cos ta capta atencion. Uno ta cu esun cu segun e raportahe secreto esun cu ta dicidi pa gobierno y ta usa e aparato di gobierno pa su propio interes personal y finaciero ta Hendrik Croes.
E otro punto ta, cu segun e raportahe, Marisol ta stroba door di traha pa su propio interes personal y no pa esun di e grupo di Hendrik. Y segun e raportahe cu ya e decision a cai cu mester deshaci di Marisol.
E forma den cual esaki lo sosode, segun e raportahe, ta cu den e periodo promer cu eleccion lo zorg pa envolvi Marisol den un scandal di corupcion door di saca documentonan y pruebanan.
Wel awe, cuater luna despues cu e raportahe aki a ‘leak’, ta bisto cu e punto aki tambe den e raportahe secreto a resulta di ta completamente correcto. E ultimo simannan corantnan na Aruba ta resulta mucho chikito pa publica tur e documento, recibonan, cobransa etc.
cu tur ta demostra cu Marisol ta te na su garganta envolvi den e actonan di corrupcion cu a tuma lugar cu tereno na Sero Colorado. Marisol mester ta suficiente inteligente pa por sa cu ta solamente su coleganan den gobierno, mihor bisa e grupo di Hendrik por tin aceso na tur e documentonan aki y mester ta esunnan cu acumula y awor ta deposita tur e documentonan aki den postbus di entre otro AVP y prensa.
E hecho cu siman pasa den panico Marisol a corre pone avisonan grandi pa menaza tur hende cu ta haya tereno door di bisa cu esunnan cu a ricibi tereno tambe ta culpable ta demonstra cu e ta sinti rosea cayente di Ministerio Publico.
E unico speranza cu kizas e por tin ainda ta cu Ministerio Publico keda na sonjo te sikiera dia di eleccion. Pero den e fase aki, mirando tur e pruebanan den e documentonan cu ya a worde publica y e documentonan nobo cu ainda sigur lo sigui drenta diariamente den e postbus di AVP y di medionan di prensa, ta practicamente imposibel cu Hulanda lo keda sinta tolera cu Ministerio Publico keda na soño te despues di dia di eleccion.
Pues Marisol mester ta realisa cu awor nos ta papia di dianan y kizas oranan promer cu e arestonan cuminsa tuma lugar. Marisol mester ta realisa cu locual servicio di inteligencia di Hulanda a raporta ya algun luna pasa enberdad a tuma lugar.
Hendrik y su grupo enberdad a percura cu algun dia promer cu eleccion a sali na cla cu e ta diep diep envolvi. Marisol awe mester ta realisa cu su dianan ta conta.
E unico cos cu Marisol por purba haci ainda pa evita cu den e dianan nos dilanti e tin di bay sinta pariba ta pa ehecuta su menaza cu e ya el a yega di usa den pasado y cu exito contra su colleganan esta: si ami tin di bay ‘un tabla lo bula’. Cu otro palabra ami no ta bay sinta mi so.
Probablemente ya ta lat pa Marisol. E pruebanan cu a worde publica ta asina hopi y pisa cu Ministerio Publico no por keda wak otro banda te dia di eleccion. Hulanda lo no por permiti esaki.
Pues Hendrik a gana e bataya aki. E unico cos cu Marisol por haci ainda ta pa stroba e fiesta di Hendrik door di enberdad laga e tabla bula. Esaki lo no scapa Marisol mas pero esaki lo zorg si pa Marisol den futuro no ta bay sinta su so solitario pariba. Lo bay tin basta colleganan pa nan dune compania pariba. Marisol sigur lo tin mas cu suficiente prueba den su man pa e por logra esaki.
Pa loke ta Rudy mes kizas Marisol ya ta poco lat. Hendrik ya a dicidi pa cambia Rudy – cu no ta sobresali pa motibo di su inteligencia – pa su yiu Evelyn cu por ehecuta e decisionan di Hendrik y defende su interesnan financiero mucho mas mihor. Y riba Evelyn Marisol probablemente lo no tin mucho grip ainda.
Kier men cu e decision cu Ministerio Publico lo mester tuma e proximo dianan y oranan lo tin consequencia mucho mas grandi cu solamente pa Marisol. Marisol sigur lo bay canta manera un trupial y sin duda lo zorg pa den futuro e tin basta compania pariba.
Lo no tarda mucho mas promer cu family and friends lo por habri un oficina na KIA. E unico pregunta cu tin ainda cu ta ki dia apertura di e oficina aki lo tuma lugar. E jabi ta den man di Ministerio Publico. Nos Ministerio Publico cu tambe sigur lo ta haya tur e documento y pruebanan den su postbus.
