Mas ekipo den buskeda di James Hogan
ORANJESTAD (AAN): Ayera DIARIO a ricibi e siguiente comunicado di prensa for di Ministerio Publico di Antiyas relaciona cu e caso di desaparicion di James Hogan, vice-consul di Merca.
Na e momentunan aki por confirma cu a base di un peticion haci door di Procurador General di Antia Hulandes na Consul General di Estados Unidos a pidi asistensia di dos investigador. Entre tanto Dialuna atardi 1 funcionario di FBI y 1 funcionario di State Department a keda inclui den e team di investigacion.
Ministerio Publico ta enfatisa cu na e momentunan aki te ainda e punto di salida ta cu ta trata di un caso di desaparicion. Ta tene cuenta cu tur escenario, incluso un acto criminal.
Mientrastanto e investigacion den e caso aki a sigui. A pidi Hulanda via di e canalnan formal pa mas ayudo tecnico. Esaki mientrastanto a keda aproba. Via di Ministerio di Defensa ta bay yega Curaçao loke nan ta yama ‘defensiemiddelen’ den forma di sambuyado, experto y material.
Awe Diaranzon ta yega Curaçao un aparato sofistica pa listra den fondo di laman. Ayeratardi a yega Curaçao ya caba 4 persona pa maneha esaki.
Loke ta conosi caba ta cu a pidi NFI yudansa den forma di investigashon di laboratorio. For di Diadomingo a yega miembronan di e ‘Landelijke Team Forensisch Opsporing’. Ta trata di 2 doghandler, 4 cacho spesialisa pa busca morto y 4 spesialista pa colekta material forensico. Tambe Procurador-general di Antiyas Hulandes a haci un peticion na Consulado Mericano pa asisti cu sambuyado y material pa yuda den e buskeda.
E material cu Ministerio di Defensa ta pone disponibel ta: sambuyado spesialisa (kikvorsmannen) cu por sambuya na profundidat di 15-30 meter. Tambe nan ta pone disponibel botonan conosi como Boston Whalers y un asina yama REMUS-team cu tin na nan disposicion un ‘Autonomous Underwater Vehicle’ (AUV) cu 4 teknico pa listra den fondo di laman.
