Home Politica MEP kier deshaci di nos pasaporte

MEP kier deshaci di nos pasaporte

9
7
SHARE
- Advertisement -

Consequencianan di e independencia cu MEP kier
E ultimo dianan MEP a intensiva e lucha pa kibra e relacionnan den Reino. MEP entre otro a cuminsa saca Hulandes cu ya pa 9 anja ta biba na Aruba y cu nunca a forma un problema na Aruba. E maneho nobo di MEP aki ta cuadra cu e pensamento di MEP cu mester crea conflicto cu Hulanda pa asina logra cu Aruba ta sali for di reino. Pa MEP nos lasonan den Reino no tin balor, te hasta manera cu Rudy a bisa mas cu un biaha ta un berguensa pa carga pasaporte Hulandes/Union Europeo.


Awor ta claro cu MEP sa masha bon cu si nos saca Hulandes cu tin casi 10 anja biba na Aruba – y cu tin e mesun pasaporte Hulandes/Union Europeo cu nos aki na Aruba tin – politiconan Hulandes manera Wilders automaticamente ta haya tur razon ora nan exigi pa Hulanda cuminsa saca nos Arubianonan cu pasaporte Hulandes for di Hulanda.

Wilders y su grupo ta haya tur razon pa exigi e mesun condicionnan di admission pa Arubianonan cu kier bai Hulanda cu MEP awor a cuminsa impone pa Hulandesnan cu ta bin Aruba. Den relacionnan entre paisnan y tambe den nos reino ta existi un regla basico. Esta e regla di reciprocidad.

Ta un regla masha simpel y fundamental den relacionnan entre paisnan. Bo no por exigi cu otro ta tratabo mihor otro cu abo ta trat’e. Si nos kier discrimina Hulandes automaticamente nos ta duna e Hulandesnan e derecho pa trata nos hendenan segun e mesun criterionan.

Awor e pregunta ta surgi ta ken tin mas pa perde den e conflicto cu MEP ta creando cu Hulanda pa logra independencia di Aruba. Tur hende cu dos dede di sinti sa cu ta Aruba ta sali perdi. Ken ta perde ora cu Hulanda bisa cu nos studiantenan no ta welkom mas na Hulanda of nos hendenan cu a perde trabou no por bai Hulanda maske ta temporalmente.

Of nos patientnan ? Ken ta sali perhudica si Hulanda cuminsa saka nos hendenan for di Hulanda (manera tur e cantidad di rumannan di Nel na Arubahuis of e rumannan di Dirk Dumfries cu ta biba na Hulanda) mescos cu awor MEP ta sacando Hulandesnan cu no ta causando ningun problema y cu ta bibando ya casi 10 anja na Aruba ? Ta nos Arubianonan ta sali perdi den e guerra cu Hendrik y MEP a cuminsa pa logra kibra e lasonan den reino y hasi Aruba independiente.

Of nos ta kere cu berdad Venezuela lo bai duna admission na nos studiantenan y nos desempleadonan? Y bou di cua condicion ?. No mester lubida cu Venezuela mes tin un desempleo grandi y e Universidadnan y institutonan di estudio superior di Venezuela ta di menos calidad cu di Hulanda.

Y Venezuela lo bai duna tur nos studiantenan beca pa bai studia na Venezuela manera Hulanda ta hasi ? No mester lubida cu Venezuela tambe manera tur otro pais tambe lo exigi reciprocidad. Si nos desempleadonan por bai Venezuela Venezuela tambe lo exigi cu su desempleadonan por bin Aruba.

Laga nos ta honesto y realistico nos tin mas mester di e lasonan den Reino cu Hulanda. Wilders cu su grupo cu awor tin un gran parti di votador Hulandes nan tras tin den nan programa cu Hulanda mester hasi tur su posible pa core cu nos mas liher posible for di Reino.

Y cu mester saca nos Arubianonan for di Hulanda y cu mester bin cu reglanan pa prohibi entrada di nos hendenan na Hulanda. Hendrik y MEP tin un aliado den Wilders y su grupo. Nan tur kier hasi nos independiente y kita nos pasaporte (loke den practico no ta nifica nada otro cu riba termino nos isla ta bira un un estado nobo di e republica Gran Bolivariano.

Y pa loke ta toca Venezuela mes. Wel Venezuela a caba di cumpra for di Rusia un cantidad grandi di arma entre cual hopi raket cu un alcanse di 300 km. Esta raketnan cu ta pone nos isla totalmente bou di alcanse militar di Venezuela. Ta parce cu Venezuela a asumi e responsabilidad pa libera nos for di Merca y for di Reino Hulandes.

Y Venezuela lo sa cu aki na Aruba tin e ‘quinta columna’ di Hendrik y Rudy y otro integrantenan di MEP cla pa judanan ‘libera’ nos for di reino Hulandes. Y logra cu finalmente nos no ta bira nada otro cu un estado nobo (chikito) den e republica Gran Bolivariano.

Ta bon pa nos pueblo realisa na tempo kiko ta e consequencianan cu e wega peligroso cu Hendrik y MEP ta hunga. Perdemento di nos pasaporte tin consequencianan hopi grave pa nos pueblo.

No por ta asina cu awe MEP por pretende di tin e derecho di saca nos pais for di Reino y kita nos pasaporte sin cu pueblo nunca a duna nan e autoridad aki. Kizas pa Hendrik cu ta sinti rosea cayente di e investigacion Hulandes den su nek ‘independencia’ ta algo cu ta cumbini. Algo cu mester bin mas liher possible.

Si e eleccion di otro siman ta un referendum ta e asunto aki lo mester ta e topico di e referendum. E pregunta den e referendum aki (e eleccion di otro siman diabierna) ta si nos pueblo kier perde su pasaporte manera Hendrik y MEP kier of si nos pueblo no kier perde nos pasaporte Hulandes/Union Europeo (y hanja na su lugar un pasaporte cu potret di Nel ariba of un pasaporte cu potret di un lider bisinja riba dj’e). Den e eleccion di otro siman pueblo por y mester duna un contesta categorico.

No por laga MEP sigi hunga un wega peligroso di kibra e lasonan dentro di Reino y deshasi di nos pasaporte bou di pretexto di ta lucha pa nos autonomia. Historia ta demonstra cu semper esnan cu a forma parti di e asina jama ‘quinta columna’ a hasi esaki bou di pretexto di kier a libera nan pais.

- Advertisement -

7 COMMENTS

  1. NAN kier pa nos bira meskos ku Venezuela …. Hende nan miserable ku bida miserabel y ku Bolivares Devaluados …… DIA 25 nos ta baha E BURIKO ku tin na mando pa porfin pone HENDE na mando di nos dushi pais….. UN BURIKO TA SALI FOR DI MONDI PERO E MONDI NO TA SALI FOR DI E BURIKO !!!!!!! Esey ta e gobierno actual su problema ……..

  2. Ami ta diacuerdo cu tur cos, menos cu e parti cu ya bisa cu e universidat nan di venezuela no da di mes un nivel cu Hulanda 😉 si ta papia boso kier papia di universidat cu nivel baho wel laga nos ban cuminsa cu universidat di Aruba

  3. Mi ta kere cu tur e bululu aki ta algo netamente politico i nos como Arubiano mester stop di permiti hendenan cu a bin residencia nan mes riba nos pais bisa nos con nos tin di hiba nos maneho. Rudi por papia pero esey no kiermeen cu tur hende ta pensa mescos of manera e. Pero si nos mester para keto un rato i puntra kiko ta motiva Rudi pa bai asina lew. Tin hopi interesnan econimico den e pais aki cu kier influencia cada parti di dje y cu ta usa politica y ta gia esaki den e rumbo cu nan ta desea. Si nos cu ta biba riba e lugar aki no uni den un pensamento i no permiti otronan hinca nan nanishi den nos asuntonan, tur e acusacionnan den ambos direccion lo conduci na nos mesun destruccion. Nos mester pa cuminsa respeta otro, respeta nos status Aparte y stop di wak den otro direccion mescos cu u’n t’ami ta E. Si politiconan cu ta pretende di tin e solucion y kier drenta pa goberna pero no tin ningun experiencia. Stop di para na banda ta grita i uni den un solo forza. Aruba pa Arubiano i pa tur esnan cu ta stime. Boso mester stop di jama otronan burico. Pasobra burico ta esun cu ta trek garoshi pa e flohonan cu tin berguenza di haci esaki. E stuk aki mi ta manda pa radio y internet. Pues no hunga grandi. E mundo aki no ta caba cu Diario so. Pa cual semper mi a respeta como un medio unico di defusion di noticia y no manera e la para bira ultimamente. Bo ta acusa otro di ta haci malo mientras boso mes ta haci malo. Laga e comunidad aki dicidi na un manera positivo ta ken nan kier pa ta nan representantenan y nan Gobernantenan.

  4. Mep bai saca e illegalnan cu ta core campanja panan i e illigal bodygardnan di nel. no e hulandesnan djis pasonan no ta shupa cunan pa paspoort i permiso.

  5. Ta asina Arubiano ta duna su mes balor?
    Ta cu un pasaporte hulandes so, tin Arubiano ta sinti cu nan tin balor?
    E aliado di e Arubiano pa su derechonan y libertad pa carga su propio identidad nacional, ta Nacionnan Uni y Union Europeo cu SI ta duna balor y respet na tur pais y pueblo IGUAL, y Hulanda como pais kolonizador cu kier mantene nos subyuga y aisla bou di e statuut anticua y obsoleto, ta un berguenza y no merece di ta miembro ni di Nacionnan Uni, ni di e Union Europeo.

  6. Nos pasaporte y nacionalidad Arubano ta un derecho cu nos tin como pais y pueblo liber y igual.
    E no ta propiedad di MEP ni di AVP, y ta propiedad di e PUEBLO di Aruba.
    Mescos cu esun hulandes ta propiedad di e PUEBLO hulandes, cu e GOBIERNO di e ESTADO HULANDES ta otorga na cada un Arubiano, individual.
    Por favor trece informacion educativo y real envez di fantasia djis pa bo manipula bo propio pueblo.
    Bo no tin berguenza?

  7. Ta asina Arubiano ta duna su mes balor?
    Ta cu un pasaporte hulandes so, tin Arubiano ta sinti cu nan tin balor?
    E aliado di e Arubiano pa su derechonan y libertad pa carga su propio identidad nacional, ta Nacionnan Uni y Union Europeo cu SI ta duna balor y respet na tur pais y pueblo IGUAL, y Hulanda como pais kolonizador cu kier mantene nos subyuga y aisla bou di e statuut anticua y obsoleto, ta un berguenza y no merece di ta miembro ni di Nacionnan Uni, ni di e Union Europeo.
    Nos pasaporte y nacionalidad Arubano ta un derecho cu nos tin como pais y pueblo liber y igual.
    E no ta propiedad di MEP ni di AVP, y ta propiedad di e PUEBLO di Aruba.
    Mescos cu esun hulandes ta propiedad di e PUEBLO hulandes, cu e GOBIERNO di e ESTADO HULANDES ta otorga na cada un Arubiano, individual.
    Por favor trece informacion educativo y real envez di fantasia djis pa bo manipula bo propio pueblo.
    Bo no tin berguenza?
    Tin miedo di Venezuela y Chavez, pero no tin miedo di Hulanda, Wilders y Brinkman? Y a lubida ken y kiko a causa e morto di un Arubiano aya na Hulanda den segunda guerra mundial, tempo cu ta e.o. e petroleo venezolano tawata ser refina aki na Aruba pa e Americanonan y e Aliadonan por a bin gana e guerra ey?

    Ta te ki tempo numa nos hobennan a cuminza haya beca of a cuminza bai studia te na Hulanda?
    Apenas cuanto anja pasa numa?
    Anto nos ta colonia hulandes for di 400 anja pasa?

DUNA COMENTARIO

Please enter your comment!
Please enter your name here