ORANJESTAD (AAN): Partido AVP a tene ayera mainta su conferencia di prensa dilanti di edificio di Bestuurkantoor.Mike Eman, lider di e partido berde a manifesta cu Bestuurkantoor durante ocho aña a sufri e mesun destino di Pais Aruba cu un decadencia grandi y deterioro.
Awe e portanan di e edificio aki ta cera. E ta den un estado deplorable manera cu por mira rond di Aruba, a expresa.Pesey AVP durante di e ultimo ocho añnan, den oposicion, no unicamente a dedica nan mes na percura pa controla gobierno,
pero a inverti hopi tempo y conocimento den prepara nan mes pa un comienzo nobo pa Aruba, a indica.
Falta 18 dia pa e comienzo ey pa Aruba y AVP kier a presenta e pueblo di Aruba e ideanan cu partido AVP tin pa revitaliza tur e barionan di nos isla y percura pa inversion di e pais aki bay pa percura pa tin seguridad, pa no tin adictonan ta caba riba caya, pa e centro di ciudad tin atrobe aspectonan bunita cu ta haci Aruba asina orguyoso di ta un di e paisnan den Caribe cu pa hopi aña por a competi pa su calidad.
Segun Eman, pa presenta nan concepto di remodernizacion di nos ciudad, nan mester a haci esaki for di e sitio di gobernacion di e pais aki.
A bisa cu Bestuurkantoor ta un edificio historico cu a wordo construi den añanan 40-50. E ta den e lista di monumentonan como edificio historico.
Por poco gobierno a bente abao y bende e edificio aki. Danki na un esfuerzo di AVP e edificio tey ainda, a manifesta.
E lider di AVP a laga sa cu e intension ta pa restaura Bestuurkantoor por completo den tur su aspectonan original cu ta dune e realce di historia. E edificio lo haya un otro edificio acerca caminda cu Ministeraad por funciona di un forma adecua.
E meta ta pa conhuntamente cu e otro edificionan cu tin den e area, crea un centro historico arubano caminda cu e caya patras di Bestuurkantoor ta bay bira un promenade unda cu lo tin estatuanan di entre otro Padu Lampe.
Un plan asina tambe nan tin pa San Nicolas. A agrega cu den cada barrio lo bin areanan di recreacion, parkenan caminda famianan por bini hunto ta parti di e plan nobo total aki, Eman a splica.
E prome fase lo ta restauracion di Bestuurkantoor hunto cu henter e area rond di dje caminda tur e edificionan lo wordo restaura. AVP lo percura pa revitalizacion y modernizacion di Caya grandi lo ta parti di e plan total di AVP.
E momento a yega pa inverti den hopi aspecto pa un y tur den comunidad, a bisa.Pa loke ta e edificionan cumpra via Fundacion y cu ta mara nos pais na 25 aña tambe lo mira con por sinta na mesa cu e gruponan aki.
E inversion cu AVP tin den mente pa renobacion y expansion ta core den 28 miyon florin. E otro inversionnan, entre otro esun den San Nicolas lo costa riba 300 miyon y ta bay den fase.
E fondo pa e proyecto aki ta importante pa sa den cual presupuesto e lo wordo pasa den Parlamento.
Mike Eman a splica cu gobierno por bin bek na cualkier momento riba un presupuesto pa trece cambionan necesario.E presupuesto pa faborece “friends & family” no ta uno cu AVP por bay adopta sigur, a enfatiza.
