Aruba Mas di Mey Siglo Pasa
ORANJESTAD (AAN): Juan Chabaya “Padu” Lampe. “Tata di nos Cultura” a lanta den e cas aki cu tabata situa den caya grandi, mas o menos 100 meter pabao di La Moderna. (E potret a worde saca pa Mr. Maarten Noot, e prome Havenmeester di Aruba, mas di 55 aña pasa). E famia Lampe tabata un famia musical. Padu su tata Harry, tio Olivier, Oom Zepp, Oom Wem, su ruman Tom, su prima Alida “Dachie”, tur tabata toca un of otro instrument musical.
Casi tur diadomingo (despues di servicio di kerki) y riba dianan di fiesta nan tabatin compania di nan amigonan Rufo Wever, Shemmie Coronel y otronan cu tambe tabatin muziek den nan sanger. Entre nan tabata e prome oculista Arubiano “Maninchie” Oduber, abuelo di nos meteorologo.
Maninchie tabata campeon di tambu. Henter dia muziek (hopi bes nan propio composicion) tabata waya. Por algo Padu a bira un musico asina talentoso! Como Arubiano, e musiconan no tabata laga di dal nan betro, “lapons,” “betun” (extra fuerte) of un “la tarde” ora cu e dia extende te casi ora nochi cay.
Sheila Lampe, un prima di Padu recientemente a comparti e siguiente anecdota di Padu su educacion musical. Un tempo Sr. Harry Lampe a dicidi cu su yiu mester tuma les formal di piano y el a inscribi Padu cerca Shon “Shishi”.
E prome les, asina simple, tabata ferfela Padu, pero como yiu obedecido na su tata, el a cuminsa e ehercicionan cu Shon “Shishi” a dun’e. Na e momento cu Shon “Shishi” a bay den cushina pa check e cuminda riba candela, Padu a cuminsa rek un wals cu e mes a compone.
Shon Shishi a core bin back y a bisa Padu “Mi yiu, mi kier complace bo tata, pero ami no tin nada mas di siñabo.” Y asina Padu su unico les di toca piano a caba.
