Ministerio Publico cu maneho severo riba posesion ilegal di arma di candela
Esaki por worde haci voluntariamente!
ORANJESTAD (AAN): Pa algun tempo tin ciudadano cu ta bin den contacto cu Husticia pasobra nan tabata carga arma di candela sin permit of autorizacion (esta, ilegalmente) of tabata envolvi den un incidente di tiro. Diferente hende a worde condena pesey den Corte.Manera conoci, un cantidad di arma a worde horta algun tempo pasa y a worde plama tambe bao personanan cu sea tabata den contacto cu Husticia varios biaha caba of ta conoci pa nan actuacion violento.
Tanto Cuerpo Policial di Aruba, Servicio di Seguridad di Aruba como Ministerio Publico ta seriamente preocupa pa e cantidad di arma cu ta disponible ilegalmente.Ta obvio cu mester actua contra esaki. Ta bin acerca cu durante e campaña di eleccion a keda claramente demostra alavez cu emocionnan por subi y iritacionnan ta keda expresa mas rapido.
Pa motibo di seguridad pa un y tur y pa motibo di orden publico, Ministerio Publico ta duna esnan cu tin un arma di candela of municion sin permit of autorizacion e posibilidad pa entrega esaki dentro di dos luna, entrante awe te 20 di november 2009 voluntariamente na Warda di Polis na Oranjestad durante oranan di trabao, esta, di 7.30’or di mainta pa 4.30’or di atardi.
Ministerio Publico ta adverti tur persona cu tin un arma di candela sin permit pa entrega esaki mas pronto posible. Si nan haci esaki, nan lo NO worde persigui pa e posesion ilegal cu nan tabatin e arma.
Esnan cu viola e reglanan por spera man duro: detencion y permanence den detencion preventivo te cu e caso parece dilanti Huez, unda lo exigi un castigo incondicional halto. Recientemente Corte di Apelacion a declara den un sentencia cu e solo hecho cu un persona ta carga un arma di candela sin permit, lo mester worde castiga cu un castigo di prison incondicional pa un tempo di un aña of mas.
Ministerio Publico ta spera cu un y tur ta compronde cu e maneho severo aki lo duna un aporte na un Aruba mas sigur.
