Home Editorial Pakico Nel ta sigui gaña e pueblo?

Pakico Nel ta sigui gaña e pueblo?

3
0
SHARE
- Advertisement -

jossy_mansur_picNel mester por ta bao e impresion cu Pueblo ta pendiente di cada un di su palabran, sin compronde cu nan ta resona den su horeanan cu timbrenan di mentira, y cu e no ta dispuesto di guli nan sin digeri. E no por ta mas ekiboca, pasobra Pueblo ta poniendo bon tino riba tur loke ta pasando, especialmente e papel cu Gobierno (lesa Nel Oduber!) a bin ta desempeña for di mas di 8 aña pasa! Via su matutino DIARIO e ta al tanto di tur cos!
Cu e carga di su mas di 33 añanan den politica riba su schoudernan, ate den campaña cu mentiranan flagrante kimando su lipnan. E ta pasa tur caminda gañando Pueblo cu si AVP gana, e ta bay “bende” Aruba! Mi pregunta directo na dje ta: kico por a keda pa “bende”? Si e ta refiriendo na Status Aparte, ya e y su coleganan a “bende” casi tur loke e tabata encera! Djis tira un bista riba e diferente departamentonan di Gobierno, y kico bo wowonan ta contempla? Masha hopi hefe di departamento ta Hulandes, importa pa Nel Oduber himself o aproba pe, aunke tin suficiente Arubiano bon prepara pa ocupa e puestonan ey!

Awor, si ta na e propiedadnan di Pueblo e ta referi, e mas cu ningun otro hende mester ta consciente cu ya Marisol a pasa su dilanti caba, sigui pa su entorno di financiadornan di campaña.

No a keda gran cos di e propiedadnan di balor di Pueblo pa “bende”. Ya MEP, via su Ministro encarga cu Domeinbeheer entre otro, a pasa raspa tempo bieu! Y pa loke ta trata e edificionan di Gobierno, si mi no ta ekiboca, tur esnan di balor a ser hipoteca na banco pa respalda un prestamo miyonario cu e Gobierno di MEP a haci algun aña pasa!

Di kico anto Nel ta papiando ora e ta den su racha di bishita casnan pa purba obtene voto via engaño? No ta e mes a declara cu tanto fanfaria cu ‘campaña ta un cos y goberna ta otro”? Mi por compronde cu desesperacion ta bati na su porta cu insistencia, y ‘coute que coute’ e kier piki un par di voto aki y aya, hungando riba sentimentonan endureci pa e castigonan cu e y su Gobierno a impone riba Pueblo.

Pero ey e ta dal den bashi! Pueblo ta demasiado consciente di e efectonan negativo cu B.B.O. a pone riba nan presupuestonan! E ta bon na altura cu ta MEP (lesa Nel y su Gobierno di coruptonan) a core cu KLM, cu Carnival Cruise Lines, y awor cu Valero. Su promesanan di un benta cu un grupo petrolero di China ta pas bon den su declaracion di “campaña ta un cos y goberna ta otro”. Awor ta e momento pa priminti sin e intencion di cumpli!

Ta e mesun hendenan cu el a martiriza cu su medidanan impopular (y innecesario den e panorama macro-economico di Aruba) e ta purbando di convence un biaha mas, pero e biaha aki cu puro mentira! Otro di su lemanan, o di su partido, o di su ayegadonan ta e cuestion di e futuro estatal di Aruba, cu su Ministro ‘sans’ cartera ta propaga tur caminda.

Aki atrobe e y su seguidornan ta pretende cu e eleccion aki ta un voto pro o contra cualke un di e opcionnan riba mesa, loke ta completamente falso! E eleccion aki ta un exigencia di Pueblo pa Aruba ser poni back riba e bon caminda, pa Gobierno bolbe riba e berea di honestidad y cumplimento cu e tareanan na fabor di e mayoria di Pueblo, no di e grupito di privilegiadonan conoci como “friends and family” di MEP!

Asina nos ta yega na e conclusion cu e verdadero crimen di Nel no ta su arogancia, ni su maldad, y ni sikiera su sed incontrolable di venganza, sino su insensibilidad pa e sufrimento di un Pueblo cu el a condena pa biba den necesidad. Politicamente, na lugar di busca paz, Nel a declara guera cu un boycot impotente contra e matutino di Pueblo y otro organizacionnan adverso na su manera di pensa y actua.

Ni cu tur e adulacionnan di su prensa, o su corte di comerciantenan comprometi, y rondona pa hendenan sin carácter, sin fe o sin seso, y e coruptonan den su Gobierno, e por a logra convence e mayoria absoluto di Pueblo pa kere den su gañamentonan.

Pesey e mesun Pueblo cu el a castiga asina severamente, ta bay pase su factura dia 25 di September, pasobra e ta harta caba di su insensatez y e depravacion iredimible di su pandiya di coruptonan.

- Advertisement -

DUNA COMENTARIO

Please enter your comment!
Please enter your name here