Pan American Taekwondo Union ta certifica Marilu de Veer como referee di forma
ORANJESTAD (AAN)— Fin di luna pasa a tuma lugar un seminario y certificacion special di formanan (Pumse), bou auspicio di Pan American Taekwondo Union (PATU) na San Jose, Costa Rica. Durante e evento aki a tuma lugar un seminario di dos dia y un curso di tres dia mientras cu na final a tuma lugar un examen pa esnan cu kier a certifica como referee di formanan, conoci tambe como poomsae. Tabata trata aki di un curso masha intensivo pasobra e participantenan mester a entrena for di 9’or di mainta te cu 8’or di anochi, cu un tempo di descanso pa lunch di solamente 1 ora.
E conocida Marilu de Veer, kende ya ta un referee internacional pa World Taekwondo Federation a opta pa tambe pasa e examen pa por certifica su mes como un referee di formas pa e region Pan Americano. Lamentablemente e region aki a keda atras den e tecnica di forma y como tal PATU ta boga pa su refereenan actualisa nan conocemento den e tecnica aki.
E organisacion ta convenci cu si actualisa e nivel di su entrenadornan y refereenan cu automaticamente lo hisa e calidad di e deportistanan di Taekwondo den e region aki. Di e forma aki e deportistanan por scoge den bringa estilo combate of den forma.
Marilu de Veer a paticipa como referee di forma y combate durante su bishita na Costa Rica, den e Costa Rica Open, esaki tabata un competencia oficial sanciona pa tanto World Taekwondo Federation como tambe e Pan American Taekwondo Union; ta bon pa menciona cu e Presidente di World Taekwondo Fedetarion tambe tabata presente pa sigui e seminario y e batayanan di serca.
Pa tur esnan interesa, Marilu de Veer lo ta dunando les den formas tur Diasabra cuminsando dia 10 di October 2009 for di 3’or pa 5’or di atardi, na e gymzaal di Julianaschool na Oranjestad.
E lesnan aki lo ta gratis y ta destina pa tur esnan cu ta practica e deporte di Taekwondo y cu ta interesa den mehora e tecnica di forma y pa keda actualisa di tur e reglanan y formanan nobo.
