PDR no ta contra eliminacion di BBO….
Pero responsablemente via un concepto di ley
ORANJESTAD (AAN) — Lider di PDR, mr. Andin Bikker a worde puntra, den entrevista cu DIARIO, tocante un carta cu e por a haya for di mr. Mike Eman, recientemente, tocante riba cierto puntonan di preocupacion cu AVP kier sa su opinion.“ Loke mi ta corda ta, ta cu nos a haya constantemente cartanan di fraccion di AVP, por ehemplo, tocante conceptonan di ley riba cual nos ta den e mesun frecuencia. Entre otro esun pa duna derecho di voto na Arubianonan Hulandes cu ta biba den Hulandes. Mi ta gradici hopi na esey, y aunque nos no tabata pafo di Parlamento nos a worde consulta y pidi pa nos opinion. Mi ta corda di varios carta asina, pero mi no ta corda riba un carta reciente di Partido AVP cu puntonan di preocupacion den cual PDR mester a duna su puntonan di bista riba dje. Si ta asina cu el a manda un carta mi tin gana di haya un copia di dje, pasobra e carta ey no ta sona mi”, mr. Bikker a expresa.
Relaciona cu e mocion den Parlamento cu Minister Presidente kier presenta pa elimina BBO awor mes, DIARIO a puntra mr. Bikker su opinion.
“ Tocante esaki mi a caba di expresa mi preocupacion na Gobernador, cu mi a tuma nota cu diripiente e prome minister actual señor Oduber, ta haciendo yen di saltonan straño cu no ta pas cu un gobierno cu ta den un fase transitorio di apenas un par di siman.
“ Gobernador a expresa mi cu ya caba nan a manda un carta pa señor Oduber pa atende riba esaki. Pa loke ta trata BBO mi kier a aclarea cu nunca nos tabata contra pa kite. Nos a djis bisa cu BBO lo por worde kita pero na un manera responsable, pues si bin cu un concepto di ley, vooral mirando loke mi a caba di tuma nota di dje, y loke mi a bisa Gobernador, cu pais Aruba ta den un situacion economico y financiero precario. E ora ey nos mester wak den Parlamento con ta bay atende cu kitamento di BBO, y nos tarea como representante di pueblo ta pa wak e responsabilidad den cualkier concepto di ley pa kita BBO”, mr. Bikker a subraya.
Bikker a comenta cu ta via telefon cu el a papia cu mr. Mike Eman, ora cu el a yame pa felicite y cu e tambe a haci mescos. Den e conversacion ey lider di AVP a puntre pa nan topa y papia riba cooperacion mutuo, pa confronta tur e retonan grandi cu tin pa hiba nos pais Aruba dilanti.
Señor mr. Bikker a bisa cu e ta dispuesto pa nan topa y papia tocante e asuntonan aki.
