Post Aruba a produci stampia cu imagen di nos Dolfijn rond di Aruba
ORANJESTAD (AAN): Un di e mamalnan cu semper a causa fascinacion na hopi persona ta e dolfijnnan. E dolfijn ta un animal nobel y fuerte, pero di personalidad amabel. Aki na Aruba nos conoce dos tipo di dolfijn cu ta biba y reproduci rond di nos isla. Door di esaki Post Aruba a dicidi di emiti un emision di stampia cu nomber “Dolfijn rond di Aruba”. E dos tipo di dolfijnnan aki ta:
Stenella Frontalis: Stenella Frontalis, anteriormente conoci como Stenella Plagiodon, ta mas bien un dolfijn chikito cu mancha y cu un snuit largo.
Fundamentalmente su colo ta shinishi lila, pero for di un distancia e ta parce di ta preto. Mas tanto e dolfijn tin hopi mancha chikito blanco of shinishi na banda.
Generalmente e dolfijnnan aki ta biba na un distancia for di costa den awanan tropical y cayente di Oceano Atlantico. Sinembargo, ta bon conoci cu e especie aki di dolfijn ta biba y reproduci rond di isla di Aruba, debi na temperatura di e awa.
Por mira grupo di te hasta 50 dolfijn hunto, pero gruponan mas chikito di 6 te 10 ta mas comun. Nan ta come pisca chikito, incluyendo haring, anchovis, tapatapa (sobra di Dios) y sekat bulado.
E dolfijnnan aki ta produci un variedad di zonido, uza den ecolocalidad y comunicacion.
E zonidonan aki ta describi como “fluitmento largo, chipchip, intensidad abou di un sorto di trein, pip pip, blafmento, gruñamento y crakmento”.
Steno Bredanensis: E dolfijn cu diente mas grof, Steno Bredanensis (G. Cuvier den les, 1828), ta yama asina pa e 20 te 27 dientenan cu randnan cu lomba cu e tin den su cacumbeinnan di ariba y abou.
Colornan di e especienan ta varia segun region, pero na Aruba e dolfijn ta shinishi scur cu mancha cla. E parti di su abdomen, su cacumbein di abou y su lip ta blanco y e tin un marca mas scur cu ta extende riba e wowonan te na e parti ariba di su custiya.
Steno Bredanensis ta un especie gregario, esta cu e ta mezcla cu un otro especie sin distincion, cu nos ta haya den grupo promedio di 10 pa 30 dolfijn, pero tambe nos por haya nan den un grupo di te 160 dolfijn, consistiendo di te 8 grupo mas chikito.
Dolfijnnan Steno Bredanensis hembra cu djente grof ta yega madurez sexual ora nan tin mas o menos 10 aña y e macho ora e yega 14 aña.
Stampia di 125 cent: E stampia aki ta ilustra un bista di cerca di e dolfijn Stenella Frontalis. Di e manera aki por mira detaye di e dolfijn.
Stampia di 200 cent: E stampia aki ta ilustra un bista di cerca di e dolfijn Steno Bredanensis. Asina por mira e dolfijn aki den forma detaya.
Stampia di 300 cent: E stampia aki ta mustra dos dolfijn Stenella Frontalis. Un di nan ta landando lomba abou. Tin e creencia cu ora un dolfijn ta herida of cu e no ta sinti bon, cu otro dolfijnnan ta landa di e forma aki pa brind’e alivio.
Stampia di 325 cent: E stampia aki ta ilustra un grupo di dolfijn cu ta consisti di 4 adulto y uno recien naci landando ariba ‘bou mientras cu e mama ta cria e chikitin. Esaki ta un comportamento social, cu no solamente ta inclui famia hopi cerca di e chikitin, pero tambe otro dolfijnnan di henter e comunidad.
Despues cu nan caba di pari, constantemente dolfijnnan mester landa bin costa, loke indudablemente ta algo cu ta produci hopi cansancio. Otro miembronan di e grupo ta yuda den e proceso di criamento.
E emision aki di stampia ta obtenibel na Oficinanan di Post na Oranjestad, San Nicolas, Santa Cruz, Port of Call y na Palm Beach Plaza Mall, cuminsando dia 30 di september 2009 te dia 29 di september 2010, pa tur cliente cu ta desea di tin e edicion special aki.
