Home General Promocion di bon relacion trabao via dialogo cu rep. di trahadornan

Promocion di bon relacion trabao via dialogo cu rep. di trahadornan

2
0
SHARE
- Advertisement -

magaly_brito04SEPPA ta señala:
ORANJESTAD (AAN): Segun Sindicato SEPPA, e importancia di e relación di trabao mester worde reconoce como un medio pa ofrece protección huridico na trahadornan y e nificacion special di derechonan fundamental, kiermeen, e libertad di asociación y libertad sindical y e reconocimiento efectivo di derecho di negociación colectivo entre otro.
Reconociendo cu balornan fundamental di libertad, dignidad humano, husticia social, seguridad y no discriminación ta esencial pa un desaroyo y un eficacia sostenibel den materia económico y social.

NOS TA DILANTI CAMBIONAN FUNDAMENTAL DEN E ORDENANZA DI LABOR
Cambionan positivo pero tambe algún negativo. Trahadornan mester ta vigilante pa cu e pensamentonan di partidonan político riba e asunto aki. Esnan cu ta aspirando pa bira un próximo gobernante mester duna su posición bon cla riba ki cambionan e mes lo enfoca y tambe con e ta mira e participación di sindicalismo den e proceso aki.
Lamentablemente, e ultimo añanan ningún sindicato tabatin bon experiencia cu e gobierno actual. Tabata visto un acuerdo sincronisa entre e gobernantenan pa no sinta scucha, ni discuti menos ainda yega na acuerdo cu sindicato riba asuntonan di trahador.
Ta pesey mes, esaki ta e momento crucial pa tur esnan cu ta aspira pa bira gobernante posicióna nan mes riba: con nan ta mira e rol di Sindicatonan den e próximo gobernación y di ki forma nan ta pensa cu por fortalece e relación di trabao.

DIALOGO SOCIAL
Pa Aruba unda nos Florin ta mara na e dolar, sigur lo tin consecuencianan grandi. Ta tempran pa bisa con fuerte e crisis lo bay desaroya. Nos tur sa cu e lo ta negativo pa nos turismo for di USA. Pues lo tin cambionan grandi. Akinan mester haci un apelación pa cuminsa ariba e dialogo social entre e partnernan social.
E trahador mester ta conciente awe cu después di un maneho contra e clase Trahador den nos status aparte, awe e ta haye confronta cu crisis fuerte ora 2008 a sera y 2009 a habri. E trahador mester sali na defensa di su propio interes.
Dialogo social y e practica efectivo di tripartismo entre gobierno y organizacionnan representativo di trahadornan y di empleadornan ta pertinente pa logra solucionnan y fortalece e cohesion social y un estado di derecho. Esaki pa adapta obhetibonan strategico na e necesidad y circunstancia di cada país.
Na Aruba hopi no conoce e cultura di dialogo of no kier dialoga. E gobierno na mando na e momentonan aki sigur den su ultimo añanan di gobernacion no a respeta ningun gremio, a haci y deshaci. E hecho di tabatin mayoria absoluto a sushi cabes di goberantenan nan un forma mahos y e consecuencia di esaki ta pueblo mes a carge.
Clase trahador a ser trapa, ningun forma di dialogo y hunto cu esaki tambe nos a haya Intimidacion, un Promer Minister cu ta e prome yama pa mantene ordo ta kita petchi awe y ta bisti otro, instigacion formal contra esnan cu no ta pensa mescos..
Pues claramente bo ta mira con mientras un parti grandi di pueblo ta boga pa Dialogo cada partido ta trece posicion of pensamento dilanti, ta scucha otro y ta purba di haya otro e otro banda, esta gobierno tabata haci uso di otro medionan pa por haci y deshaci.
Dialogo ta e forma di comunicacion directo entre dos of mas persona/instancia, unda cada instancia ta trece su opinion, su pensamentonan, ta scucha otro bon y despues cu tur sinceridad ta purba di haya otro ariba un pensamento comun.
Dialogo ta e mihor forma pa soluciona cualkier conflicto of pa evita conflicto.
Di otro banda dialogo tin tambe un otro meta, cual ta pa reparti e riquezanan di e pais na un manera mas hustifica teniendo cuenta cu husticia social.
Crea un cultura di dialogo ta hopi halto ariba e agenda di sindicalismo.
Si no tin un dialogo sincero no tin sentido pa sinta na mesa cu Gobernantenan of hefenan di servicio, pasobra bo no ta yega na nada.
Cu Gobierno ta adopta y amplia medidanan di protección social y pa trahadornan. Ampliacion di seguridad social, incluso medidanan di ingreso básico pa responde na e necesidadnan e incertidumbre genera pa e rapidez di e cambionan technologico, social, demográfico y económico.
Traduci e desaroyo económico den progreso social y e progreso social den desaroyo económico.
Awor mas cu nunca nos ta wak con serca Gobierno e empleado publico, e trahador di fundacionnan no ta hayando oido. Mas peor ainda, nos ta mira claramente un descontento grandi reinando den nos sociedad.
Y ta e conflicto aki entre Gobierno y e sociedad ta loke ta cabando cu e posibilidad di consolidación di un democracia y hunto cu esaki e perspectiva di e proteccion di derechonan humano.
E repercusionnan social di e politica di ahustacionnan hopi biaha ta refleha den aumento di indicadornan cu ta mustra cu situación social’ y e seguridad personal di nos ciudadanonan ta ser gravemente menaza. P.e. aumento di delicuencia, matamento,etc..
Tur esakinan ta signonan di debilitacion di e structura social y di e buraco grandi di desigualdadnan den materia di ingreso y rikeza, e aumento di desempleo, mayor consumo di alcohol i/o vicionan, etc…
Y aunke hopi biaha nos no ta relaciona esaki cu otro, e cantidad di hobennan den problema of condena pa un of otro motibo tambe ta creciendo den forma impresionante.

- Advertisement -

DUNA COMENTARIO

Please enter your comment!
Please enter your name here