Dr. van Leeuwen a cobra turista mil Dollar pa djis lesa resultado di un test!ORANJESTAD (AAN) – Siman pasa, dos docter Venezolano tabata na Aruba cu vacacion hunto cu nan mama. Den fin di siman, diasabra, nan mama a haya dolor na pecho y den oranan di merdia el a bay Servicio di Emergencia, unda un docter a haci un ECG y a tuma sanger di e señora, y despues a fax e resultadonan pa e cardiologo dr. Van Leeuwen.E specialista a duna orden pa e señora keda hospitaliza, y el a keda djis drumi, no a haya ni awa di bida, y no a mira e cara di e docter resto di dia, te su dia siguiente cu el a bin dune salida.
E bishitantenan a hospeda cerca un famia Arubiano, cu danki Dios ta conoce nan bon y por a duna nan un man. Esaki despues cu su diadomingo siguiente, nan a haya yamada mainta pa nan bay hospital unda dr. Van Leeuwen ta warda nan.
Ora nan a bay Hospital e docter a djis bin cerca e señora bise cu e tin gas cu e por bay cas, sin wak e ni mes. E gastonan di Hospital a worde paga, pero fuera di esey dr. Van Leeuwen a cobra nan US.$ 1000.000 (MIL DOLLAR) sin cu el a bin wak e señora mes, pero ta otro hende a controle na Hospital y ta djis manda e fax pa e specialista, y diadomingo mainta no a tuma ni diez minuut pa e docternan Venezolano subi bay ariba, bin abao pa regla e salida di nan mama.
Un di e miembronan di e famia unda e bishitantenan aki a hospeda a comenta pa nos redaccion cu e no kier pa e cos aki keda sin publica, pasobra e ta haye ta un abuso di marca mayor! Den e diagnostico mes e ta exclui “syndrome coronario agudo”, kiermen, no tin nada na curazon pa e señora worde trata, pues nada cu ta hustifica un cobranza asina barbaro.
E yiunan di e señora, cu manera nos a comenta tambe ta docter, a puntra si nan no por haya un trabao aki na Aruba pasobra pa nan hunta e placa cu e cardiologo a cobra nan, nan tin cu traha dos luna, dia y anochi, na Venezuela.
E pregunta cu ta surgi ta, si na momento cu e specialista a haya e resultadonan y a mira cu ta gas e señora tin, pakico a duna orden pa tene na Hospital? Di con no a dune un receta pa gas y ya? Anto a base di kico el a cobra mil dollar, pa djis lesa e resultado di un fax di un test cu ni sikiera ta el a haci y cu e yiunan di e pacient a paga na Hospital?
Pa colmo, Hospital a cobra e pacient un dia di mas, cu despues un miembro di e famia unda nan tabata kedando a bay reclama y el a haya e placa bek. Tambe el a haya na oficina di e specialista pa puntra ta di con e prijs exorbitante aki, anto e secretaria a draai contesta cu e tarifa cobra na Merca ta 80 mil dollar! Posiblemente esaki ta inclui operacion, pero den e caso aki e cardiologo no a mishi mes cu e pacient!
Ta di compronde cu e docter ta un specialista di curazon, pues e tin su profesion y e ta cobra pe, pero cobra un prijs normal.E yiunan di e señora mester a hasta fia placa di e famia unda nan a keda pasobra nan no tabata tin un cantidad asina na e momentonan ey. Y comosifuera poco, e docter a duna nan un “business card” cu e tin lugar na Merca y na Hulanda.
Awor por compronde pakico diferente docter specialista ta para tur consulta pa hende local ora un turista ta bin nan consulta. Claro, ta ken no si den 10 minuut y sin haci mucho cos, nan ta gana asina un dineral? Tercer parti di un salario minimo gana den un habri y cera di wowo! By the way, riba e suma aki e docter a paga belasting y BBO? Pasobra tur cos ta mustra cu e placa a bay cash den su saco.
pero te ki dia nos tin cu soporta e porkeria aki? ta basta cu e docternan abusado …. ta human people boso ta atende no cliente.
¿Que hubo La Femme? Miserable berdad? Please scirbi bo comentarionan. Ami, personalmente, tin gana di sa kiko bo ta pensa di es asunto aki.