Compara cu Republica Dominicana cu ta un isla mas grandi:
Representante di Hogares Crea a mustra su preocupacion!ORANJESTAD (AAN): Manera ta conoci caba, pa algun tempo Hogares Crea Dominicano ta brindando ayudo na e comunidad arubano pa loke ta e problema di adiccion.Aruba ta confrontando un problema hopi grandi cu e adictonan ambulante y esaki a bira un asunto basta alarmante mirando e cantidad di fechorianan cu ta worde cometi pa algun di e personanan aki pero mas cu tur cos pa e sufrimento cu esaki ta nifica pa nan famia y te hasta pa e adictonan mes cu na dado momento ta realiza kico nan a perde pa via di nan adiccion.
Representante di Hogares Crea Dominicano kende na e momento aki ta na Aruba, Sr. Osiris Frias, a laga sa cu e problema di adiccion na Aruba ta hopi alarmante teniendo cuenta cu Aruba ta un isla hopi chikito compara cu Republica Dominicana.
A bisa cu for di su experiencia na Aruba, cual ta e pais cu cual e tin un vinculo mas fuerte, el a realiza cu tin hopi necesidad di inversion den comunidadnan terapeutico.Pesey Hogares Crea a haci enfasis den reitera nan posicion di duna Aruba un man amigo y na tur esnan cu mester di un charla preventivo como tambe den e parti di tratamento.
A agrega cu su experiencia na Aruba ta hopi constructivo ya cu na Santo Domingo e ta traha cu e personanan cu ta yega di Aruba pero no tabata tin un bista real di e problematica cu ta existi na e isla cu e chollernan y adictonan.
Segun Frias, e ta considera cu na Aruba, e parti di tratamento y prevencion mester haya mas character. Cu esaki kiermen, bisa e structura interno di e comunidad cu ta duna terapia.
Na Santo Domingo, a agrega, nan ta traha cu un ekipo di profesionalnan cu ta consisti entre otro di Psicologo, Psiquiatra, Terapeutanan cu ta esnan cu ta interveni den e parti di e rehabilitacion.
Finalmente, Osiris Frias a remarca cu e situacion di Aruba ta alarmante. Den un isla asina chikito, a bisa, ya caba Fundacion Adopt an Addict den un aña a manda 96 persona y 60 ta den tratamento.
“Mi ta sigur cu e cantidad aki no ta ni un cuarta parti di e poblacion cu ta adicto y di esnan cu no ta adicto, pero cu ta den factor di riesgo of di muchanan y adolescentenan cu tin un pre-adiccion y cu ta relaciona cu un problema di conducta”, a manifesta.
Si no ta traha di un forma structura poco poco e situacion ta bay cuminza bira mas y mas alarmante, a subraya.
