Home Estilo WEB Aruba NV a duna beca via Aruba Scholarship Foundation

WEB Aruba NV a duna beca via Aruba Scholarship Foundation

3
0
SHARE
- Advertisement -

web1Reconociendo contribucion di Jossy Lacle….
ORANJESTAD (AAN): Conseho di Comisario di W.E.B. Aruba N.V. riba diabierne ultimo 11 di september a tene un mainta oficial pa reconose ing. J.M. (Jossy) Laclé. Esaki na oficina principal di W.E.B. Aruba N.V. na Balashi. Den presencia di Gobernador Fredis Refunjol y miembronan di Conseho di Comisario di W.E.B. Aruba N.V. bou presidencia di Sr. Efraim de Kort. Invitadonan special tabata: Director di Utilities Aruba N.V. Sr. Harold Henriquez.


A habri e mainta cu discurso di Sr.Efraim de Kort kende a splica su experiencia ya for di 1997 como e tempo ey diputado di Finanzas encarga cu W.E.B.; con e tempo ey tabatin problemanan cu produccion di Awa y Electricidad na Aruba cu despues a conoce un cambio grandi na 1990 ora cu a busca ing. Jossy Laclé pa converti e servicio di gobierno W.E.B. den un compania di gobierno awor conoci como W.E.B. Aruba N.V.

Sr. De Kort ta elogia e gran trabao di ing. Laclé pa a converti e compania aki den un modelo di eficiencia y desaroyo. Un compania cu ta cumpli cu e necesidad di pais Aruba pa cu Awa y Energia di calidad halto, cu un staf y personal bon prepara y cu un organizacion eficiente pa logra su metanan y pa sigui cu su desaroyo den futuro.

Ta sigui cu un discurso di Sr. Harold Henriquez kende tambe ta elogia su experiencia cu ing. Jossy Laclé y ta reitera e gran labor di a desaroya e compania aki te na unda cu e ta awe; un ehempel di un bon trabao haci na interes di nos pais y sin duda a mustra riba e dedicacion cu ing. Laclé a hinca den su trabao y ta desea e director nobo e mesun dedicacion pa su tarea nobo den W.E.B. Aruba N.V.

Den nomber di gerencia, staff y personal di W.E.B. Aruba N.V. ing. Lufrido Croes ta hiba un discurso eloquente caminda ta specifica algun di e logronan grandi di e compania bou liderazgo di Ing. Jossy Laclé manera e reorganizacion di e servicio di gobierno W.E.B. pa un compania cu structura di un NV, esta W.E.B. Aruba N.V.

Despues ta sigui e logro tecnologico di a renova gran parti di e instalacionnan di e compania durante cu ta sigui produci awa y electricidad pa nos comunidad, ta sigui cu e fase di modernisacion y expansion di generacion di electricidad y awa cu plantanan nobo y finalmente ora cu a caba cu tur e trabao extensivo aki y cu a kere cu por a tuma un sosiego, ata e crisis mundial di prijs di crudo carisimo a drenta cerca nos y bou liderasgo di Jossy Laclé a traha riba enfrenta e crisis aki cu tecnologia nobo y un plan strategico pa garantisa e futuro desaroyo di awa y energia pa pais Aruba den e siguiente 25 aña.

E conocido Plan Strategico: “Energia Aruba 2025” a worde formula y a / ta sirbi como e guia pa e desaroyo di W.E.B. Aruba N.V. unda a introduci tecnologia nobo di motornan “RECIP” pa genera electricidad na un manera mas eficiente y tambe a introduci tecnologia nobo di “Seawater Reverse Osmosis” pa desalina awa di lama na un manera mucho mas eficiente. Ambos tecnologia a hiba nos riba e caminda di “Menos Fuel Oil y Mas energia”,

un caminda cu a sigui cu e proyecto di Molina di Biento na Vader Piet cual ta den desaroyo completo actualmente y cu prome cu fin di aña lo genera electricidad for di un fuente duradero cu ta nos biento excelente cu tin na Aruba.

Pero esaki no ta tur, tambe W.E.B. Aruba N.V. lo sigui traha riba busca alternativa pa Fuel Oil segun e plan “Energia Aruba 2025”. E caminda indica ta pa busca fuentenan di Gas Natural pa remplasa nos fuente di energia di combustibel di Crudo. Lamentablemente Jossy ta bay prome cu nos por a logra esaki, cual sigur ta un di su deseonan pa Aruba.

Lufrido ta finalisa cu algun aspecto di Jossy su maneho durante 19 aña di liderazgo, manera: Atencion pa e ser humano y importancia di e trahado (recurso humano), seguridad den y na trabao (safety), training y desaroyo di e empleado, relacion cu Prensa y Comunidad, cambio di Cultura y Valornan Nucleo corporativo, desaroyo di liderazgo den e compania, e proceso pa hiba W.E.B. Aruba N.V. na excelencia, importancia di dialogo y relacion cu diferente Sindicato, relacion y atencion special pa partners y stakeholders di e compania: suppliers, contratista, financiadornan, Consehonan di Comisario, Utilities Aruba N.V., Parlamento y Gobierno.
Tambe Lufrido a toca algun aspecto di Jossy su persona:

Cu ta conta hopi bon chiste, seriedad y dedicasion na trabao, tin talento pa comunica y ta alegre. Ta termina cu felicita y gradeci Jossy su señora y famia, ta yame un bendishon y dese’e un penshun cu bon salud y cu Aruba por sigui conta cu su experiencia y sosten den futuro.

Na final Jossy ta tuma palabra y ta gradeci pa tur e palabranan di elogio y di su banda ta afirma cu e team di gerencia y empleadonan cu a keda atras lo ta un sosten grandi pa e director nobo y e ta convenci cu W.E.B. Aruba N.V. lo sigui riba un caminda di desaroyo positivo.

E mainta a continua cu duna honor na ing. J.M. Lacle cu e dedicacion oficial di e sala di reunion di gerencia di W.E.B. Aruba N.V. unda esaki a keda re-inaugura despues di un renovacion / modernisacion extensivo den “Sala di reunion ing. J.M. “Jossy” Laclé” asina reconociendo e logronan grandi di e prome director di W.E.B. Aruba N.V.

E inauguracion a worde ehecuta pa su excelencia Gobernador Fredis Refunjol den presencia di Jossy su señora y famia y demas miembronan di gerencia.

Despues a pasa den e gang dilanti di e sala unda su nieto “Kyle Arends” a toca e honor pa devela un pintura di potret di Jossy pa nos “Galeria di directornan” di W.E.B. Aruba N.V.

Despues cu Jossy a kere cu nos a caba eynan a bini e sorpresa mayor, ora cu nos a guia e y su famia pa e sala di recepcion pa e recibi for di man di Sr. De Kort e Becaa: “W.E.B. Aruba Scholarship ing. Jose M. Laclé Scholarship, Excellence in Technology” cu ta worde otorga pa prome biaha na un studiante pa e aña 2010-2011.

E beca aki ta carga e nomber di ing. Laclé p’asina conmemora su dedicacion na innovacion den tecnologia y specialmente tecnologia di Awa. Ing. Laclé ta bay laga un Compania atras cu a crece y a florece bou di su maneho y cu a marca paso innovativo como Compania di produccion di Awa y Energia.

Durante e dedicacion, Sr. Efraim de Kort a reitera cu e beca aki lo stimula educacion profesional specialmente riba e tereno tecnico y cu asina W.E.B. Aruba N.V. ta contribui na engrandece nos comunidad di e manera cu sr. Laclé tambe den su maneho a dedica atención na comunidad di Aruba.

E beca aki ta basa riba decision di gerencia di W.E.B. Aruba N.V. fecha 19 augustus 2009, pa den cuadro di su strategia corporativo di “Good Corporate Citizenship” desde e aña di school 2010-2011 otorga un beca di studio na un studiante arubano pa su studio avansa riba tereno tecnico.
Meta di e beca aki ta:

(A) Na prome instancia, duna un contribucion riba tereno di educacion di profesionalnan hoben den comunidad arubano;
(B) Pa di dos un contribucion na crecemento di specialista tecnico riba mercado laboral local;
(C) Pa di tres, stimula e scohencia pa studionan tecnico specificamente riba tereno di produccion di awa y energia.

Ing. Laclé a expresa cu mas cu tur e reconocimentonan cu el a haya e ta aprecia e ultimo aki como esun di mas valioso; semper el a boga pa promove studiamento den tecnologia aki na Aruba y esaki ta realisacion di un soño di dje. Cu hopi placer el a pasa e decreto over na Sr. Clyde Harms presidente di Aruba Scholarship Foundation cu a keda invita pa administra e scholarship aki den nomber di W.E.B. Aruba N.V.

Pa clausura e mainta oficial aki, Señora Lidia Beukenboom den nomber di W.E.B. Aruba N.V. a presenta un rama di flor na esposa di ing. Laclé, señora Bertha Laclé como agradisimento pa e sosten di famia durante e trayectoria di Jossy na W.E.B. Aruba N.V.

- Advertisement -

DUNA COMENTARIO

Please enter your comment!
Please enter your name here