12 luna di cual 2 luna ta condicional, pa exportacion di 1316 gram di cocaina
ORANJESTAD(AAN): Gina H.A.D a presenta dilanti di huez di corte di husticia Diabierna, debi na e hecho cu el a wordo acusa di exporta un cantidad di cocaina riba 21 di Juni 2009.Huez a puntre si ta berdad y el a bisa cu si.Den rapport di polis ta para cu riba 21 di Juni na aeropuerto, ora a revisa maleta di G.D, a topa cu un pakete cu tabata contene 1316 gram di cocaina.E acusado a splica polis cu el a purba bay Hulanda cu e droga, pasobra e tabata tin problema financiero.
El a splica cu un anochi na Mambo Jambo el a puntra un homber Colombiano si e conoce hende cu tin droga cu e por transporta pa Hulanda pa e gana placa.
Huez a puntre pakico el a puntra e homber ey y el a bisa cu ta pasobra e ta Colombiano.
Huez a bise cu no ta tur Colombiano ta deal den droga.G.D despues a bisa huez cu e homber a regla e droga pe y a paga su pasashi pa e bay Hulanda.Si e lo a logra yega Hulanda, e lo ricibi 10.000 florin.
E muher a conta cu na Aruba e homber Colombiano a saca su potret y esaki lo wordo manda via email pa Hulanda y eynan e persona cu a ricibi e portret, lo a bay topa e muher na aeropuerto pa ricibi e droga.
Ora e muher a wordo deteni, e tabata tin 400 Euro riba dje y esaki a wordo confisca.
El a bisa sinembargo cu e placa ey ta loke el a spaar y cu e no tabata placa di droga.
Huez a puntre dicon e tin problema financiero y el a bisa cu ningun hende den su cas ta traha.
Den e cas tin 3 adulto ta biba y 5 mucha y ningun tin trabao.
E kier a uza e placa pa su yiunan. Huez a trece dilanti cu ta prome biaha cu G.D a haya su mes den problema cu husticia.
Fiscal a hasi e muher algun pregunta, entre otro si e ta corda na cua banco el a bay busca placa, pasobra e muher a bisa cu e no ta corda.
Mirando cu e muher ta biba mas di 5 aña caba na San Nicolas, fiscal a indica cu ta straño cu e no por a bisa exactamente ta cua banco na San Nicolas el a bishita.
Segun fiscal e muher no a duna mucho informacion tampoco riba e hendenan cu a dune e droga etc., manera cu e ta scondiendo informacion.
Fiscal a exigi un castigo incondicional di 14 luna y el a pidi pa e 400 Euro keda confisca.
Abogado Schwengle representando e acusado a pidi huez pa tene cuenta cu e hecho cu ta prome biaha cu G.D ta haya su mes den problema cu husticia y pa e tene cuenta cu e hecho cu e tin dos yiu.
Huez na final a dicidi di duna e acusado 12 luna di cual 2 luna ta condicional. Ademas di esaki e tin cu hasi 80 ora di trabao pa comunidad.
Huez tambe ta haya cu e placa haya den su posesion ta placa di droga y pesey e mester keda confisca.
