Chofer a rasca tire pasobra ” accidentalmente” su braza a dal den handrem
ORANJESTAD.(AAN):– Tabata pasa di mey anochi cu polisnan atento y cu bon oido, na haltura di Oriental Bar Restaurant, a scucha cantamento di tire. Chofer di un auto ta rascal tire riba caminda publico bayendo direccion pariba den L.G. Smith Boulevard. Despues di un rato e mesun polis a bolbe scucha rascamento tire y a wak tambe con e auto a zig zag bay na man robez, subi, para mitar riba acera. E polis a acerca e chofer pa atende riba su irresponsabilidad pa e forma cu e ta stuur su auto riba caminda publico.
Ora cu polis a hala atencion di e chofer esaki a puntra e agente si e tin problema. Polis su bista ta cay riba un boter di biña den e auto y a atende e compai riba su comportacion. Locual a hala polis su atencion ta e declaracion di e chofer indicando cu ta su “braza” acidentalmente a dal den “handrem”. Polis no a kere e version aki cu a parce parti di un cuenta di “Compa Nazi” .
Locual si polis a constata tabata cu e chofer tabata cansa y e agente a dicidi di detene y a hibe warda.
Fiscal auxiliar a ordena pa e chofer di inicialnan C.H. di 31 aña keda deteni pa tanto su seguridad den traficio y pa seguridad di otronan, ademas pa e detenido sosega curpa cu tur tranquilidad den un espacio di cuater muraya.
