Drs. Ben Marapin: Inflacion na aruba a cuminza crece bek!
ORANJESTAD (AAN) – Prome cu gobierno nobo sinta y cu e cumpli cu su promesa di kita BBO, ya caba tin cierto supermercado y tiendanan cu a hisa prijs atrobe di nan productonan. Den entrevista cu Economista drs. Ben Marapin, DIARIO a pidi su opinion tocante e desaroyo aki.
Drs. Marapin a confirma pa nos cu inflacion a cuminza crece back. Esaki ta algo cu e mes a anticipa, cu despues cu nos comunidad a conoce un bahada di prijs riba productonan, casi 4% durante luna di Augustus, pa September caba costo di bida a crece levemente, y pa October por mira cu prijsnan a sigui aumenta.
Aunke tin un supermercado ta mas caro cu otro, e parti mas doloroso ta, segun drs. Marapin, cu e prijs di energia cu tambe a baha den cierto temporada, a bolbe subi un poco y ora e economia mundial y di Aruba pick up atrobe, locual ta costo di crudo lo aumenta back y nos lo haya un tarifa pa consumo di luz y awa sumamente halto.
E servicionan aki, ya caba riba su mes ta costoso pa nos poblacion y asina mes por spera cu prijs lo bay subi hopi halto mes.
