Home Editorial E disparatenan di MEP!

E disparatenan di MEP!

2
4
SHARE
- Advertisement -

jossy_mansur_picTa increible constata con e derota mahos den eleccion a descontrola severamente esnan cu durante tanto tempo a abusa di nan posicionnan gubernamental pa castiga o molostia nan contrincantenan politico mientras nan tabata faborece nan grupitonan privilegia. Bo ta haya un Nel cu a perde tur clase di nocion di loke por y no por for di e boca di un Prome Ministro, un Booshi cu a duna un demostracion claro di un falta di proporcion causa pa e maldadnan incontrolable cu ta core den su sanger, un Ramon Lee cu a kere cu su participacion den un acto condenable contra un dama, y su responsabilidad directo den tur e bagamunderianan cu a tuma lugar den Lotto ta bay keda sin investiga, y banda di nan un Marisol cu a sorprende cu su demostracion di un tiki di clase.

E ta e unico cu a digna su mes di haci un traspaso di su cartera na su seguidor, elegi cu votonan preferencial pa e mesun Pueblo cu e no a sirbi durante su termino cu e mesun grandeza di espiritu.

Mientras Mike ta duna un demostracion categorico cu e ta e berdadero lider di Pueblo, y ta usa e tempo intermediario aki pa tuma un inventario di tur e departamentonan di Gobierno, pa dibuha un estrategia di coreccion y remedi, e ex-representantenan di Pueblo a probecha di pone delaster obstaculo cu ta existi pa stroba e Gobierno nobo di saca Aruba for di e crisis severo den cual nan mes a hinke.

Ey bo ta nota e diferencia di mentalidad: esun di Mike y acompañantenan pensando seriamente riba Pueblo y nan isla, y esun di Nel y su gang di malandronan haciendo tur loke nan por pa carga e Gobierno nobo cu gastonan innecesario, djis pa stroba y perhudica e proximo gobierno, nan mesun Pueblo y nan isla! Un ta e mentalidad pro-Aruba, e otro un mentalidad pro-partido, comosifuera pa nan partido ta mas importante cu Aruba o su Pueblo!

Esaki ta e abismo den cual e perversion di criterio di un man yen di asaltantenan di e tesoreria di Pueblo a cay. Loke ta haci nan dolor no ta e perdida di Gobierno riba su mes, sino e perdida di e instrumentonan di enrikecimento cu cual ya nan no por sigui yena nan saconan y e saconan di friends and family.

E rabia di a perde poder como tal no ta afecta nan mes tanto cu e perdida di e poder di hinca man den e fondonan y propiedadnan di Pueblo pa pasa nan como botin pa nan mes y esnan mes o mas inescrupuloso cu nan.

Durante 8 aña felonia a impera den e pasiyonan di Gobierno cu un impunidad askeroso, obra di un MEP decadente desde cu e cuadriya di delincuentenan actual a pasa man pe! E no tin ningun clase di parecido na e MEP glorioso di Betico, tempo cu nos a lucha hunto pa logra un status di suma importancia pa nos isla.

Awor tur felonia y delincuencia ta bay desaparece, apesar di tur e obstaculonan cu e mal perdedornan di MEP ta pone riba e caminda di e recuperacion financiero y moral di Gobierno. Actua bao e impresion infantil cu Aruba ta un cunuco di MEP y cu ta nan so por goberna nos isla, ta mes eroneo cu kere cu e investigacion no ta bay tuma lugar! Keremi, e ta na caminda y e ta bay spanta tur e puyitonan cu ta scondi bao e macuto di maldad di Nel y su MEP y nan ta bay sali core den tur direccion, pero lo ser alcanza y husticia lo bolbe impera unda impunidad tabata Rey.

Pueblo por keda trankilo, ademas, cu nos lazonan cu Hulanda ta bay conoce otro trato, uno civiliza y respetuoso, pa garantiza Pueblo cu nos ta bay keda cu nos nacionalidad Hulandes, cu nos pasaporte y tur e otro beneficionan cu Madre Patria semper a brinda nos.

- Advertisement -

4 COMMENTS

  1. Danki na Dios, sr. Mansur (Diario Aruba/Internashonal) ku boso tei, de lo contrario no lo tabatatin CAMBIO ni Pueblo di Aruba no por bai Fiesta diabierna awor y ta F&F Oduber/Croes y su legion di demoñonan so lo a keda DJADJA ku Patrimonio di Pueblo di Aruba.

    Mas claro no canta el GALLO. Razon sr. Oslin Benito Sevinger (Benny Sevinger) AVP no. 2 tin, ku INVESTIGASHON ta bin ku HULANDA of sin HULANDA!

    Mester bin Investigashon contra e lidercito fracasa Nelson Orlando Oduber MEP (Nel Oduber Nayostraat Ponton) y su LEGION di DEMOÑONAN ku a sakia Aruba y su Pueblo. E uniconan y berdadero Domkopnan, Mentirosonan, Corruptonan, Ladronnan, Violadornan di Derechonan Humano, Falsificadornan di Documento, Manipuladornan di Ley y Husticia, Borache Stinkinan di e HISTORIA POLITICA di Aruba.

    Atte.
    Carlos Severino Tromp
    Den Haag. NL

  2. Sr.Mansur bon tardi, mi ta ful di acuerdo di lokenen Sr, Mansur ta agrega,eigelijk e hendenan aki no mag di goberna Aruba nunca mas,paso e nomber di MEP tabata di nos Sr, Betico Croes cu alucha berdaderemente pa nos pueblo y pa nos Aruba en general,y e hendenan aki a mal uza Aruba y su pueblo bao di nomber MEP
    E investigacion mester tuma lugar mas pronto posibel,pa Aruba por hanja su bienes nan bek,pa asina nos gobernantenan actual por sigi desarolla
    nos Isla ariba tur tereno cu ta den situacion
    deplorable, y e chollerhouse na playa mester somenta,pa nos hendenan na playa,pa nos turistanan
    pa comerciantenan y e pueblo en general,pa nos por sinti nos liber feliz,y di e ladronisia enmenso cu ta tumando lugar tambe,si cada un di nos sea alerta y apoya nos polisnan nos por sana nos Isla.

  3. Danki pa semper defende e lazo cu Aruba tin cu Hulanda. Kiko mas mi por bisa, semper bo ta to the point. Mi ta forever agradeci na nos frernan y meneernan hulandes cu a duna nos isla tanto pero tanto. Mi ta spera cu tur cos por wordo tresi na claridad relaciona cu irregularidadnan na Aruba bou di e gobiereno anterior, and let the chips fall where they may. Mi ta bibando afo di Aruba pa hopi tempo, pero tur dia mi pensamento y curazon ta na Aruba. Un cordial saludo for di Merca.

    Tico Suarez
    Ridgewood, Y.N. 11386

  4. Corda cu e disparatenan di MEP a cuminza for di 1985 y mester investiga desde e aña ey !!! Placa di pueblo malversa mester bin bek den caha di gobierno cu pueblo ta pone na poder y asina duna contenido na: VOX POPULI VOX DEI !!!

DUNA COMENTARIO

Please enter your comment!
Please enter your name here