Diario Online

Formador mr. Mike Eman: Definitivamente, BBO tabata e factor fatal pa e refineria!

Publication: Diahuebs, 15 October 2009. Categoria: Economia

ORANJESTAD (AAN)—Den encuentro cu miembronan di prensa, Formador a subraya ayera mainta, cu definitivamente BBO tabata e factor fatal pa e refineria.
Atrobe, durante e presentacionnan cu Valero a haci, por mira cu aña 2006-2007 tabata e aña crucial pa decisionnan importante, y si na e momento ey gobierno lo a yega na un acuerdo cu e refineria cu lo no bin BBO y cu nan lo bay paga un impuesto fiho di 40 pa 50 miyon Florin cu nan a ofrece e momento ey, garantiza, awe lo tabata papiando di 150 miyon den tres aña caba.

“ Nos ta na spera di 200 miyon di BBO si nos gana e caso, pero nos lo a haya 150 miyon caba si lo acepta e deal e tempo ey y cu un refineria cu na e momento ey lo a inverti 1.9 biyon dollar den su ampliacion y renovacion, y sin duda, y esey mi por bisa cu tur seguridad y el a worde confirma door di expertonan di Valero, door di Bill Klessey, y tur hende rond di e refineria, si na 2006-2007 lo a acepta e oferta cu Valero a haci pa kita e BBO y permiti nan pa traha dentro di e margennan fiscal cu nan a sugeri, awe e refineria lo tabata draai y lo nos tabata den e situacion aki.

“ Pesey, awor nos tin cu busca atrobe un escenario cu ta hacie factible, y e escenario ey no ta unicamente mara na condicionnan di Aruba awor, pero e ta mara tambe na e hecho cu door cu gobierno no a acepta e tempo ey e deal cu Valero a propone e refineria a keda e refineria cu nos conoce, cu tin poco opcion den e tipo di produccionnan cu e por realiza, cu ta hacie financieramente viable.

“ Y door di esey nos ta den e situacion cu nos ta aworaki. Tur locual nos por haci nos a hacie. Nos ta creando escenarionan atractivo pa esnan cu ta interesa pa cumpra, nos ta creando escenarionan profesional y reaccionnan rapido pa locual ta e interes di Valero mes, awor cu nan kier pa nos duna nan un contesta riba posibilidadnan”, mr. Mike Eman a indica.

Sin papia pa Valero mes, Formador Eman ta sinti cu nan ta contento cu e contesta rapido y cu e maneho pro activo di esnan cu mester bay carga responsabilidad dentro di poco, y cu ta reacciona riba e nivel cu nan mester pa por asegura cu e buskeda di opcionnan por sigui cana na un manera profesional y un ritmo acelera. Esaki ta duna nan ainda, e oportunidad pa por rescata e situacion.

“ E presentacionnan, apesar cu e animo ta grandi pa busca opcionnan tog bo ta sinti cu e mercado na e momentonan aki ta hopi dificil y pa refinerianan cu tin acceso na crudo e ta mas viable cu pa refinerianan cu no tin e acceso aki na e prijs cu nan mester pa por opera e refineria cu ganashi”, mr. Mike Eman a subraya.