Home Politica Formador mr. Mike Eman impacta

Formador mr. Mike Eman impacta

1
0
SHARE
- Advertisement -

avpmikeemanCu negligencia di Gobierno saliente pa cu tereno di enseñanza
ORANJESTAD (AAN) – Ayera mainta, Formador mr. Mike Eman a tene su conferencia di prensa cu e ta bin ta yamando tur siman, pa e tin pueblo na haltura di e desaroyonan cu tin rond di formacion di e gobierno nobo. “ Den e proceso aki nos a scoge pa inverti hopi tempo den dialogo cu Departamento, y Institutonan hopi importante, pa aspectonan constitucional di nos pais, y tambe cu gremionan social, tanto esnan cu ta representa e doñonan di trabao como esnan cu ta representa e empleadonan”, mr. Mike Eman a splica.


Locual a resalta den e proceso di formacion y di dialogo cu gremio y departamentonan, e fin di siman aki, segun mr. Eman, tabata e punto di enseñanza na Aruba.

“ Tanto den conversacion cu Directie Onderwijs como cu SMOA (cu ta esun cu ta maneha Colegio Arubano) y SKOA, a resalta cu enseñanza di Aruba, manera cu nos a pone tambe den nos plan ‘Aruba ariba’ ta cu tin aspectonan cu ta rekeri atencion urgente.

“ Tin di e institutonan aki cu ta den crisis financiero; SKOA, por ehemplo, ta maneha 46 school y ora bo mira e rapportnan cu nan a entrega na nos riba nan stimacion di estado fisico di e schoolnan cu nan ta maneha, ta algo hopi grave y serio.

Rond di tur aspecto, tanto dak como plafond y cura di school ta den un situacion hopi grave y hunto cu esaki e rapport ta mustra cu SKOA, mescos cu otro stichtingnan y naturalmente otro schoolnan, ta core cu deficitnan financiero enormemente grandi”, mr. Eman a relata.

Pa AVP como partido cu lo tuma e mando di nos pais, ta incomprendible con gobierno a laga e situacion aki deteriora na e estado aki, pasobra e schoolnan aki nan unico entrada formal y oficial ta e subsidio di gobierno y normalmente esaki tin cu cubri e gastonan mas importante di school.

“ Ora bo mira den e pronostico di likidez, por ehemplo di SKOA, cu un luna ta core cu 1.8 miyon florin pa ta mas exacto, di deficit di likidez financiero. Nos ta puntra nos mes con nos a yega na e situacion aki, cu institutonan masha importante den e proceso di educacion di nos yiunan, a yega den e estado aki”, Eman a remarca.

El a subraya cu esaki ta un confirmacion di un situacion cu AVP a mira durante e proceso electoral, cu nan a para dilanti varios school. Tambe nan a papia cu hopi maestro y cu mayornan durante e añanan cu a pasa, y unda durante diferente awacero nan tabata presente na momento cu schoolnan a confronta cu caida di plafond, kiebro di dak, etc., cu ta aspectonan conoci, den cierto sentido, pero e magnitud y gravedad di e deterioro y negligencia di parti di gobierno, ora mire den un rapport completo, manera a worde presenta, ta hopi preocupante.

“ Pesey, mi tin cu bisa cu e proceso di dialogo aki, cu nos a cuminza cu gremio y organizacionnan social di nos pais, hunto cu departamentonan, ta pone gobierno nobo den un posicion unda por crea un union hopi grandi pa bay logra, conhuntamente cu henter Aruba, atende e crisis aki.

Kiermen, apesar di e situacion dificil y di e deterioro bisto financiero y tecnico di tur aspecto di nos pais, nos tin hopi confianza cu mirando e compromiso di tur e gremionan y departamentonan a haci, cu for di momento cu e trabao di e gobernacion nobo inicia, Aruba ta bay conoce un union hopi grandi unda nos tur ta bay tin un vision cu un direccion, pa bay atende cu tur e retonan aki y dentro di algun luna y poco aña nos lo bay mira resultado di e compromiso y cambio di direccion aki”, mr. Mike Eman, Formador, a señala.

- Advertisement -

DUNA COMENTARIO

Please enter your comment!
Please enter your name here