Home Economia Formador y su team trahando 24 ora pa haya un solucion pa...

Formador y su team trahando 24 ora pa haya un solucion pa mantene e Refineria!

1
0
SHARE
- Advertisement -

24oraORANJESTAD (AAN) – Ayera mainta, Formador mr. Mike Eman, a contesta preguntanan di prensa relaciona cu su encuentro cu autoridadnan di Valero.
Formador mr. Eman a duna di conoce cu den diferente ocasion e dianan cu a pasa, e tabata den contacto cu Valero, tanto cu sr. Bill Klessey na Merca como cu e gerencia na Aruba.

 


“ Mi mester bisa cu di parti di Valero, tanto pa loke ta e corporacion na Merca mes pero tambe esnan na Aruba, ta haciendo ehercicionan hopi grandi pa mira kico ta e posibilidad pa e refineria por permanece na nos Isla, bao di e bandera di Valero mes.

“ Ayera, nan a presenta nos algun escenario. Uno mas atractivo cu otro, y cada un lo nifica un reduccion den e operacion, un hopi mas grandi cu otro. Esun unda e operacion lo ta mas grandi cu e esun cu ta bay bira practicamente cu efectonan hopi minimal pa economia di Aruba, ta esun cu naturalmente nos ta mas interesa den dje, unda cu Valero lo por mantene su permanencia na Aruba cu un operacion aceptable, maske cu no na e nivel cu nos a conoce durante e ultimo añanan” mr. Mike Eman a splica.

El a sigui bisa cu e parti aki di un operacion un tiki mas aceptable ta den estudio na e momentonan aki y nan ta duna e proximo gobierno di Aruba un “fifty fifty chens” cu esey lo por logra, segun Formador mr. Eman.

“ Si esey no logra, otro escenario ta esun di benta of di un partnership. Pa loke ta trata benta y eventualmente partnership, esun cu na e momentonan aki ta demostrando hopi interes, ta Petro China, cu probablemente awe lo ta bishitando Valero tambe y nos tambe lo tin un reunion cu nan, caminda cu nos lo scucha di nan con nan ta mira e posible compra of partnership cu Valero”, Formador mr. Eman a duna di conoce.

El a splica tambe cu den e dianan aki e hunto cu sr. Mike de Meza, a haya e oportunidad di conversa cu Minister di Finanzanan saliente, ken a hiba negociacionnan cu Valero y Petro- China y esaki sigur ta un contribucion pa sa unda e gobierno saliente a keda cu ambos instancia y kico tabata e puntonan cu a dificulta e proceso y cu gobierno no a logra, prome cu eleccion, un convenio apesar cu intentonan a worde haci.

“ Y kico ta e asuntonan cu nos por haci diferente pa nos si por, eventualmente, logra un resultado cu un Petro China of otro empresa grandi, por bira un partner of e operador di e refineria. E ta keda un situacion delicado, nos ta trahando 24 ora riba e topico aki, banda di e proceso di Formacion.

Nos a drenta den contacto tambe cu Minister di Relacion Exterior di Hulanda, cu ta bayendo riba un viahe di Estado, hunto cu su Mahestad Reina Beatrix, na Mexico, caminda cu nos a puntra nan tambe pa yuda den e proceso di cultiva e interes di PeMex, pa forma parti di un eventual partnership cu Valero of un eventual compra di e refineria, pa asina cu nos tin mas opcion, pasobra manera Valero ta pinta e situacion, a base di e situacion economico aworaki e ta hiba perdida grandi y si no bin un solucion rapido nos ta teme cu Valero lo drenta den un otro fase di reduccion di operacion y di mantencion di e empleadonan.

Pesey, nos tin cu move hopi rapido y di nos parti nos a pone tur cos moviendo, pa en todo caso, Aruba ta pro-activo buscando un solucion pa e situacion”, Formador mr. Mike Eman a subraya.
Pa tene e refineria riba e situacion cu e ta awor e ta costa Valero 8 miyon Florin pa luna. Pues, un perdida di 8 miyon pa luna y mirando e desaroyonan internacional ta hopi dificil pa mantene un perdida asina sin cu tin perspectiva di compra, partnership, of di un reapertura.

Pa tal motibo e gobierno cu ta bay sinta tin cu move hopi rapido, si no nan ta teme cu Valero lo bay den un fase di reduccion di mas empleado, locual mester evita, aunke nan ta poco. “Pero un perspectiva pa futuro mester bin rapido si no nos tin un situacion hopi complica. Valero ta poniendo su parti, nos ta poniendo nos parti, y tin partinan internacional cu mester worde convence pa bira parti di un futuro nobo pa e refineria”, Formador mr. Mike Eman a subraya.

- Advertisement -

DUNA COMENTARIO

Please enter your comment!
Please enter your name here