Home Editorial Nel den oposicion!

Nel den oposicion!

1
0
SHARE
- Advertisement -

jossy_mansur_picBan repasa e realidad. AVP a gana cu 12 asiento y MEP a perde mahos cu 8 asiento. Den e resultado ey no tin modificacion, pero si Nel kier trece cambio den e proporcion di votonan entre e dos partidonan aki 4 aña o menos, e mester cuminza pa transforma su estilo, no esun di su humor caustico, pasobra esey ta okay, pero si esun di propina golpinan bao di faha, enfocando lo personal na lugar di lo politico! Si e ta sinti su mes bandona pa un gran parti di Pueblo, e asumi e culpa y no trata di pase pa otronan! Tabata imposible sconde pa e gran mayoria di Pueblo loke tabata obvio, o sea un Gobierno sin control y sin guia, e brazamento di e locura di Rudy pa Independencia, e introduccion di medidanan salvahe y evitable, ademas di tur e corupcionnan, nepotismo y xenofobia comproba, o sea e totalidad di desastrenan cu a ocuri cu e complacencia o indiferencia di Nel, kende tabata para por nada tras di e timon di e barco cu yama Aruba!

Cu e Ministronan nombra pa Mike no ta conta cu Nel su aprobacion ta natural y nada sorprendente, pero purba tacha nan di falta di conocementonan pa dirigi nan carteranan ta hopi temerario di su parti, pasobra esnan di dje no tabata conta ni cu preparacion, estudio o capacidad pa maneha nan carteranan. E resultado negativo di nan cuestion administrativo ta e garantia incuestionable di nan mediocridad!

Otro eror craso di Nel ta cu e kier, un biaha mas, pone riba e lomba di loke e ta yama e “poder economico”, e seleccion di e Ministronan di Mike. Mi no sa ta di cua poder economico e ta papiando, pasobra si e tira un bista rond di dje, su wowonan lo trompica cu miyonario tras di miyonario, y no pa medio di esfuerzonan propio, sino valiendo nan mes di e propiedadnan y e tesoreria di Pueblo.

Parce cu tur e miyonarionan awor ta forma parti di MEP, y no ta necesario pa mi enumera nan; Nel mes por hacie pasobra ta el a yuda crea nan cu su indolencia! Ta hopi dificil (imposible casi!) pa Nel libra su mes di e tremendo responsabilidad cu e tin pa tur loke a pasa cu su Gobierno y cu MEP!

E berdad sunu ta cu Nel a obedece por fin e mandato di Betico, aunke hopi lat pasobra el a zink Aruba caba. Y e no a haci caso voluntariamente di Betico tampoco, sino obliga pa un Pueblo cu a cansa di su abusonan y su indiferencia frente e desesperacion cu su medidanan a benta riba dje.

Nel parce di no a compronde na tempo cu dictadura na Aruba ta ser mira como un fenomeno perteneciente na e parti sur di nos continente, y cu aki e ta keda aisla den e mentenan deseoso di implante unda e no por crece pa falta di terenonan fertil pa su desaroyo. Nos ta un Pueblo cu simplemente no ta acepte bao di ningun condicion o circumstancia!

E rafaga di desercionnan por continua si Nel permiti pa dentro di su partido e figuranan di e edad di piedra triunfa riba e candidatonan hoben y nobo. E mester por a yega na e conclusion cu MEP no ta bay ta bon sirbi den Parlamento cu un Marisol completamente desprestigia, un Booshi di naturaleza guerero, un Briezen cu halanan mocha, y un Nilo cu ainda no a siña e diferencia entre cifranan real y esnan ficticio. E djis puntra e Director di Finanzanan cu a denuncie!

Mi ta supone cu tin masha hopi Mepista cu ta mira cu dolor e reciente derota di nan partido, y ta anhela ideanan dentro di cual tur reivindicacion politico ta posible y necesario, y sin nan, ta convenci cu lo bin tur e catastrofenan imaginable, inclusive e kiebra di partido.

Of Nel ta adapta su mes na presente, na actualidad, asumiendo pensamentonan politico moderno, of e lo desaparece den infamia hunto cu e partido cu Betico a funda y el a castiga durante 8 aña sigui como cabez di e gobierno mas malo cu Aruba a yega di conoce den henter su historia!

- Advertisement -

DUNA COMENTARIO

Please enter your comment!
Please enter your name here