Home General Oficina pa Prevencion di Desaster ta urgi comunidad:

Oficina pa Prevencion di Desaster ta urgi comunidad:

5
0
SHARE
- Advertisement -

bibiarendsPa ta extra alerta pa cualkier eventualidad climatologico den luna di october
ORANJESTAD (AAN): Hefe di Oficina pa Prevencion di Desaster, Sr. Bibi Arends a manifesta cu manera a worde pronostica, e temporada di horcan di 2009, te awe, a transcuri cu masha poco actividad di horcan. No obstante e hecho aki, Oficina pa Prevencion di Desaster ta urgi nos comunidad pa ta extra alerta pa cualkier eventualidad climatologico severo cu por surgi durante luna di Oktober, no obstante cu e temporada di horcan ta termina te dia 30 di November. E alerta aki ta pa e siguiente motibonan:


Primeramente, nos mester observa cu ta exactamente pa e hecho cu den nos region Caribense, practicamente no tabata tin actividad di horcan, temperaturanan halto y sofocante cu nos a sinti durante luna di September, a haya chance di sigui comula nan mes, keintando e superficie di e laman Caribense te na nivelnan faborabel y te hasta ideal pa formacion di horcan.

No lubida cu naturalesa ta usa horcan pa baha e energia di e temperaturanan halto aki door di transforma esakinan den biento fuerte y awacero pisa.

E di dos motibo ta pa e hecho cu nos climatologia (historia di nos clima) ta mustra nos cu mayoria di e actividad climatologico severo cu nos islanan (abao) a conoce, a tuma lugar den luna di Oktober.

Por ehempel e awaceronan pisa di Omar (anja pasa), e bientonan fuerte di Felix (2007), horcan Hazel (1954) y e ultimo horcan grandi di 1877, tur a tuma lugar den luna di Oktober. Ademas e ultimo horcan grandi di 1877, cu a afecta Curaçao severamente, a tuma lugar na final di un temporada di horcan di hopi secura.

E di tres motibo di preocupacion ta e actividadnan di e Zona di Convergencia Inter Tropical. Esaki ta e area caminda e rayonan di solo ta cay recht ariba mundo y ta forma un renchi di maltempo rond mundo ariba e equator di mundo.

E area aki cu ariba e continente Sur Americano ta colga normalmente ariba Amazona (Brasil), na comienso di temporada di horcan ta move (“hunto cu e solo”) bay nort y ta yega te ariba Venezuela, pero ta bolbe sak bay zuid ora e temporada di horcan ta yegando su fin.

Ora e area aki bira hopi activo ariba e costa Venezolano den nos zona directo, nos por observa atardi, weitando den direccion di Venezuela, bendabalnan grandi (celnan di maltempo) cu hopi actividadnan di lamper.

Si e bendabalnan aki durante nan activacionnan move bin nort (direccion Aruba) sea e mesun anochi of den e dia(nan) siguiente, nos por haya strena cu lamper, acompanja cu awacero pisa. Ta e zona di convergencia aki a causa e maltempo cu a ocaciona e desliso di lodo di Hooiberg cu consecuencia fatal ariba e marduga di 13 di Oktober di 1990.

Oficina pa Prevencion di Desaster e aña aki, saliendo di e preocupacionnan refleha den e encuesta cu e oficina a laga tene aña pasa, a intensifica su programanan di concientisacion pa nos comunidad.

Esaki e Oficina a haci, door di reanuda su distribucion di e bukinan di horcan na e postkantoornan di Playa y San Nicolaas. E aña aki por ehempel na e Postkantoornan a worde distribui mas buki di horcan cu e dos añanan anterior.

E aña aki e Oficina a haya bon cooperacion tambe di diferente cas commercial cu a promove nan productonan den forma di concientisacion. Esaki a tuma lugar na varios hardware, supermercado y botica.

Tambe tabata tin programanan di concientisacion en cooperacion cu e Oficina y diferente radionan. Ademas nos por a weita hopi mas programa di concientisacion na television ariba iniciativa di entre otro, Meteo, Crus Cora, Papia Cla, Ban Combersa y di Sr. Hoek cu su programa Prevenshon.

E Oficina mes a tene hopi charla y a drei un programa di concientisacion semanal pa 8 siman largo na TeleAruba diaranzon y ATV diahuebs.

E programa aki por cierto ta den su ultimo simannan y pa cual lo worde pasa un checklist di e accionnan mas importante y urgente pa tuma prome y durante di un alarma di horcan. Un aviso ta bay na nos televidentenan pa no bay confundi e proximo programanan aki cu un alarma di berdad.

Finalmente e Oficina ta gradici Biblioteca Nacional Arubano, cu a compila e diferente programanan di television. Oficina pa Prevencion di Desaster ta spera cu Dios por bendiciona nos isla cu un fin di aña un tiki muha.

- Advertisement -

DUNA COMENTARIO

Please enter your comment!
Please enter your name here