Home Editorial Pa loke e bal…Mi opinion di e Gabinete nobo…y Evelyn!

Pa loke e bal…Mi opinion di e Gabinete nobo…y Evelyn!

1
4
SHARE
- Advertisement -

jossy_mansur_picMike a nombra su Gabinete, y contrario na loke cierto medio y periodista a insinua, el a hacie riba su mes, den consulta cu su compañeronan riba lista, y no tabata tin pakico consulta cu e hendenan cu ta bay yude carga Gobierno y para den prome linea pa defende contra e atakenan cu ta bay bin di un partido sin nobleza: MEP! AVP a gana eleccion y Pueblo a dune e mandato pa forma su Gobierno. Ta esey mes el a haci, consultando su propio experiencia y conocimento di tur e candidatonan riba su lista!
Pa loke ta trata Arthur Dowers, Mike de Meza, Otmar y Benny, pa mi nan ta e mihornan pa e puestonan ey, sin duda di ningun clase. E unico observacion cu mi kier haci ta cu DIMAS ta un parti integral di Ministerio di Husticia, y ta di dje e mester forma parti. Pa mi, un ta cana teni na e man di e otro. Bo no por dicidi riba materianan di Ley relaciona cu e tema sin tin e aprobacion, e medionan di consulta y investigacion, y e Leynan aplicable den bo man. Ta e Ministro di Husticia ta doño di e hermentnan ey. Den pasado nos a mira con Nel a separe di su Ministro di Husticia inutil, y nos a mira tambe e resultado final ora el a relegue pa Booshi. Den e vocabulario popular: “Bula di panchi cay den candela!”

Mi ta reserva mi opinion riba e otro Ministronan te ora nan proba, cu tempo, loke nan bal na cabez di cada Ministerio. Lo ta bon pa mi specifica un biaha mas cu mi no ta forma parti di ningun partido politico, kedando cu mi privilegio di dedica mi mes na e unico partido cu por conta cu mi apoyo incondicional: Aruba! Lo demas lo sali na cla durante e lunanan, y mi ta spera añanan venidero.

Awor cu e pasionnan politico a mengua, pasobra tempo ta suaviza tur herida, mi ta supone cu e tarea principal di MEP ta pa reorganiza partido y duna e hobennan capacita cu e tin, e oportunidad di forma parti di un partido den ascenso, no decadencia. Ta cu un limpieza so, si e ta posible, por logra e meta ey. Si MEP haci loke e mester haci, o sea presenta un cara diferente na Pueblo, cu hendenan cu bal e respet y apoyo di poblacion pa nan forma decente y corecto di actua, e por tin e oportunidad pa conta cu un futuro politico confiable.

Entre nan tur, mi ta escoge Evelyn Wever Croes como mi candidato pa drecha partido, te unda cu e por, sin tuma na cuenta sea loke sea su tata Hendrik ta representa den partido. Mi ta sigur cu Hendrik tambe lo respalda su yiu den e proyecto politico cu e lo encabeza independientemente! Ta Evelyn mester demostra su carácter y metanan propio, pero semper dentro di e mistica di partido, pasobra un no ta exclui e otro. Durante campaña e no por a hacie pasobra e tabata mara na e lineamentonan improductivo di Nel. Si di berdad Evelyn kier, e tin e carácter y carisma, ademas di e boluntad y conocimentonan pa conduci e partido Geel pa un campaña aceptable aki 4 aña. Ta su enfoke riba e solucionnan cu tin mester pa logra e mayor bon pa e mayor cantidad di hende, y no pa un grupito so, ta bay conta hopi na su fabor o contra dje.

Como un persona cu a cana hopi cu Betico, a viaha cune pa diferente pais en busca di obhetivonan pa Aruba, a participa den e convencionnan di MEP como orador, mi a respalde totalmente den su gestion politico. Hunto nos a logra e Status Aparte cu tanto hende cu a keda para canti caminda durante e fragor di combate contra podernan hopi mas grandi cu esnan di nos, ta pregona como “nan” logro. Pesey ta logico cu mi a conserva cierto simpatia pa e partido, pero no pa su dirigentenan actual. Awe mi ta mira esnan cu no a participa den e lucha gigantesco ey haciendo comosifuera ta nan a logre y nos cu a participa den e prome linea di combate tabata simplemente mironnan! E simpatia a keda, pero no pa esnan cu a haci di nan lucha un odio implacable contra ami, mi famia y tur e otronan cu no ta pensa mescos cu nan.

Banda di dje, mi ta mira e Gabinete nobo cu bon wowo, y ta confia cu e no ta bay hiba nos pa e avenidanan di “dejá vú”. Sin embargo, con cu bo mire, y sea cual sea e partido na mando, bo ta yega na e conclusion cu e unico cos duradero cu tin ta Aruba. E tey semper, invariable, invocando tur su yiunan pa demostra na dje un respaldo y lealtad categorico. Politica ta keda loke e ta, un laman yen di olanan bruto o manso, cu ta bay y bin, cu scuma o sin dje, causando felicidad o estrago den un poblacion cu ta elegi su representantenan cada cuatro aña, y djey mester para warda cu su santo pasenshi e paso di tempo pa determina si su escogencia tabata bon o malo. Den e caso aki, conociendo Mike Eman hopi bon, mi tin e confianza absoluto cu e escogencia tabata esun corecto. Mi no ta spera decepcionnan na caminda, aunke como un practico den e mundo di politica, mi ta laga semper un porta chikito habri pa cualke eventualidad.

Despues di eleccion, ata nos awor para na e encrucihada di varios caminda: un di nan, y e mas importante, ta esun cu lo conduci nos na e rescate di Aruba, di su finanzanan publico, di su clima di paz y trankilidad, di su balornan di etica y decencia, o sea un conhunto di cosnan cu ta forma e weso di lomba di cualke comunidad cu ta respeta su mes. Cu AVP, mi ta sigur cu e lo ta e caminda cu nos ta bay cana pa logra tur e metanan deseable ey!

- Advertisement -

4 COMMENTS

  1. Loke ta duna e tema di ‘Antillen’ hopi forza na e partido di Geert Wilders ta; e declaracion di e maximo experto riba tereno di Structura Esatal di partido MEP, respetable sr. Hendrik Croes haci na e radio emisora MAGIC FM na Oranjestad riba e fecha 13 di maart 2006 en coneccion cu e 20 aña di Status Aparte: “E Status Aparte a dura di mas, e INDEPENDENCIA TA IDEAL PA ARUBA!! Wilders sin duda lo sa di mara consecuencia na e declaracion aki den total desventaha di e masa cu yama ‘pueblo di Aruba’.

DUNA COMENTARIO

Please enter your comment!
Please enter your name here