Polis acusa di maltrato y falsificacion, a perde trabao y a haya castigo condicional di Huez
ORANJESTAD(AAN):Recientemente na corte di husticia a tuma lugar un caso den cual un agente policial a wordo acusa di maltrata su pareha, menaza su bisiña y falsificacion di un procesverbal.
Ta asina cu O.D durante un shift di anochi e agente policial lo a gana su wachtcommandant cu el a bay cumpra cuminda, pero el a bay para cu su auto na veld cerca di warda di polis di Santa Cruz cu un mucha muher cu no tabata sa pareha.Tabata alrededor di 3:30 di marduga cu e polis tabata cu e muher na e veld y otro muher a pasa wak e auto di polis cu luz paga eynan y a haya esaki straño.
Ora cu e muher a bay mas cerca pa wak, e auto di polis a core bay sin cende luz y a dal den un heki na e veld.E muher a yama warda di polis pa puntra tocante e accidente y a pensa cu quizas e asunto aki lo wordo tapa.
Tin hende cu tin e impresion cu polis ta tapa pa polis, pero fiscal a indica cu den e caso aki e tabata contento pa mustra cu KPA a investiga e asunto aki.E polis cu tabata cu e auto den un rapport a pone cu el a dal e auto den un muraya na otro caminda.
Polis a uza e informacion di e muher y a bay cu e auto riba e veld, pa wak si e rastronan riba e veld ta cuadra cu esun di e auto y esey tabata e caso.Despues O.D a declara cu enberdad e tabata eynan cu e mucha muher, pero tabata djis pa papia como amigo.Fiscal a indica cu el a haya esaki straño, mirando cu tabata marduga.
E polis a wordo suspendi y actualmente el a wordo kita for di cuerpo policial.Den rapport di e caso tabata tin para cu e anochi cu el a maltrata su pareha y su coleganan a bay na e sitio, e tabata bao di influencia di alcohol, a bira hopi agresivo y a perde cabez.El a wordo deteni y a sinta 10 dia den detencion preventivo.
Huez na final a duna un castigo di 240 dia, di cual solamente e 10 dianan cu el a sinta ta incondicional. E resto di dianan ta keda colga riba su cabez como castigo condicional.
Banda di esaki e mester cumpli cu training di regulacion di agresion, tene su mes den contacto obligatorio cu reclasering y hasi 200 ora di trabao comunitario.
Fiscal for di un principio a elogia KPA pa e manera cu nan a actua den e caso aki, pasobra tin hende tin e impresion cu semper un polis of KPA ta tapa asuntonan cu tin di haber cu fayonan di agentenan policial.
Den e caso aki KPA a hasi un bon trabao den e manera cu nan a investiga e asunto y a haya un claridad riba kico a sosode.
