Home General Reconoce ata como un organizacion cu tin hopi experticia “Inhoud”

Reconoce ata como un organizacion cu tin hopi experticia “Inhoud”

0
0
SHARE
- Advertisement -

ORANJESTAD (AAN) — Entre e deseonan cu Oficina di Turismo tin pa gobierno nobo cumpli cu nan, entre otro, ta hopi importante pa nan, pa ATA worde reconoci como un organizacion cu tin hopi experticia riba turismo tanto local como di conocimento di Caribe y global.
Den entrevista cu señora Myrna Jansen, director di ATA y den e contexto di su encuentro no oficial cu e futuro minister di Turismo Otmar Oduber, el a menciona esey como un di e deseonan cu ATA tin pa e gobernacion nobo, na un forma integral, tene na cuenta.

“ No e minister aki so pero tur e ministernan por duna e balor aki na nan departamentonan. Mi ta kere cu tin hopi experticia ‘inhoud’ den e departamentonan mes, ademas di e hecho claro cu bo mester traha cu bo partnernan y cu e stakeholdernan di turismo, y mi ta sinti cu esey ta bay tuma lugar cu lo duna balor na e organizacion, y yuda nos tambe pa nos sigui desaroya y cumpli mehor y cabalmente cu nos obhetivo, cu ta uno economico pa trece mas turismo di calidad na Aruba y cu por tin un super bon experiencia riba e Isla, pa asina nos por promove Aruba hopi mas tambe”, señora Jansen a subraya.

Tin hopi mercado potencial di cual por trece turistanan pa Aruba. Señora Jansen a indica cu mester elegi a base di un criterio di inversion, cual tambe ATA tin y cu nan ta bay mustra e futuro minister cual ATA su criterio di inversion ta aworaki.

Jansen ta haya cu na Merca mes tin hopi potencial, pero nan ta concentra den cierto areanan pero na Europa tambe tin hopi potencial pa trece mas charter. “Manera ta conoci na December nos a cuminza trece charter for di Sweden y e ta hopi importante pa nos sigui cautiva e mercado ey. Brazil ta creciendo, Argentina tambe, pues tin potencial na diferente region di Sudamerica, Europa y Merca tambe”, señora Jansen a remarca.

El a splica tambe cu Aruba su producto ta diverso, adapta na diferente hotel y e hotelnan tambe ta determina e tipo di turistanan cu ta bin Aruba. Aworaki caba ATA ta mercadea na un tipo di turista cu ta di calidad halto y e geografia unda cu nan ta bay promove Aruba ta cosnan cu nan ta teniendo cuenta cune aworaki.

“ Un di e aspectonan hopi importante ta, pa e producto worde upgraded. Ora bo upgrade e producto na un cierto calidad tambe, esey lo trece cune cu e experiencia di e turista ta bay mehora, y e turismo di calidad cu bo mester relative, lo conoce un mehoracion tambe”, segun señora Jansen.

Aspectonan cu mester mehora den nos producto turistico ta e sushedad cu tin rond di nos Isla, den areanan turistico y ademas den pleno ciudad unda tin cierto problemanan ocasiona pa adictonan ambulante.

“ Esakinan ta algun di e hechonan cu mester mehora di e producto Aruba. E ta hopi importante cu e ta rekeri di un acercamento integral, pasobra ATA mes no tin e control pa por mehora esey.
Pesey ta hopi importante, y pa e minister nobo di turismo tambe, pa e programa di ATA worde acepta y biba den tur e ministerionan, pasobra tur e ministerionan eigenlijk tin algo di haber cu turismo.

“ Turismo ta eigenlijk e experiencia cu un turista tin ora e bin riba e isla aki. Y nan ta experiencia e manera di biba di e Arubianonan, medio ambiente y infrastructura, y tur eseynan no ta cay bao un minister di turismo ni di ATA, pero di e gobierno di Aruba. Pues, e integracion y maneho ey pa turismo ta hopi importante”, segun señora Jansen.

Ta conoci cu gobierno a pone un inyeccion di 10 miyon dollar den e fondo di turismo di un solo biaha, pero ATA ta haya cierto suma anual. DIARIO a puntra director di Oficina di Turismo, si nan ta desea aumenta e suma cu nan ta ricibi pa aña.

Señora Jansen a contesta cu nan a pidi pa den e presupuesto di ATA pa 2010, pa por incorpora e contenido di e fondo den dicho presupuesto. “Nos no sa si esey a tuma lugar of no, pero e competencia ta sigui ta fuerte den 2010; e crisis no a termina, y nos ta kere cu pa otro aña nos tambe mester tin un decision hopi grandi den e mercadonan”.

- Advertisement -

DUNA COMENTARIO

Please enter your comment!
Please enter your name here