Home Deporte SV Britannia ta golea SV Estrella 6 – 1 cu tres gol...

SV Britannia ta golea SV Estrella 6 – 1 cu tres gol di Sebastian Cano

6
0
SHARE
- Advertisement -

futbol1ORANJESTAD (AAN)— Diadomingo atardi nos a presencia e clash entre Britannia y Estrella den un wega cu mester a bira un electricitante, a caba den un humiyacion pa e naranjadanan di Sta Cruz, mirando cu nan ta ser golea cu e score final di 6 – 1. Ta bon bisa cu un carchi cora pa Estrella y e cambionan tempran den e prome tempo ta pone un peso enorme ariba e hungadornan di Estrella, esaki dor di no por a haya e ritmo desea y tabata hunga constantemente bou di presion cu e situacion di homber menos ariba tereno,

riba dje tabata reina un ambiente no agradabel, e frustracion ariba banki y cerca e hungadornan tabata bisto, hopi critica ariba e arbitrahe, na lugar di hunga bala. Ora cu e equipo tabata completo nan tabata bon den e wega y ta ataka bon. Mester bisa cu e wega riba su mes sigur den comienso tabata uno bon, un Britannia den e minutnan inicial dominando esaki por completo, despues di e gol di Estrella, e naranjadanan ta bini un rato bon bek den e ritmo, na algun ocasion nan tabata cerca di e gol.

Di otro banda Britannia a cuminsa trankilo, tocando e bala bon rond, hungando posicion di bala, na unda cu e atakenan tabata ser haci coordina, principalmente na banda robez cu Junel Sanchez den su dia, yudandu su companeronan den atake y lorando balanan peligroso dilanti e gol di Estrella.

Na di 9min, Jonathan Lake ta haya un bon bala di Junel Sanchez, na unda e ta kita e defensa bon for di su curpa y ta remata duro pa bati portero Dayron de Cuba pa e 1 – 0 pa Britannia. Na di 20 min Chando de Lande ta anota un bon gol cu canti pia pa e 2 – 0, tras di un tremendo cruse casi perfecto di Junel Sanchez, kende ta mira su dos asist nan drenta gol.

Na di 30min Jonathan Lake ta dal un bala den palo di gol. Na di 34min, Estrella ta corta ventaha, ora cu Anuar Kock ta duna un tremendo paso cu ta pasa den centro di defensa di Britannia, aki e delantero di Estrella esta Diego Quintero, kende a drenta wega, ta tira lasta duro den skina drecha pa bati portero Arthur Werleman pa e 2 – 1, asina tambe e prome tempo ta bai aden.

Den segundo tempo no por a mira casi mesun patronchi di wega manera den e prome tempo, un Britannia dominando y un Estrella tog purbando y armando su atakenan poco poco, pero sigur. Na di 53min, un mal bala pasa bek dor di Nino Nunez(ex-Estrella) ta pone Estrella avansa riba gol na unda Kendrick Lopez ta faya na remata di cerca y asina Estrella ta perde e oportunidad di bini bek den e partido.

Na di 59min e defensa drechi di Britannia esta Jeffrey Rolsten ta avansa ta drenta e area penal di Estrella y ta los un tiro ariba gol cu portero de Cuba ta tapa bon, pero den e rebound, e alero Cano ta fusila portero De Cuba pa e 3 – 1.

Aki ta caminda e frustracion a sinta cerca algun hungador di Estrella cu ya caba a ser alerta pa referee Angela pa hungadanan duro. Na di 60min, Anuar Kock ta mira su di dos carchi gel saca den su direccion, automaticamente carchi cora, despues di un infracion duro ariba Rolsten, esaki ta debilita e equipo di Estrella por completo.

Remarcabel ta cu depues di e carchi cora di Annuar, un dirigente riba banki di Estrella, tambe ta ser expulsa despues di un serie di palabra no mucho bunita usa. Na di 64min, portero Werleman di Britannia ta salba su gol na dos ocasion despues cu Diego Quintero ta tira dos biaha bon ariba dje.

Na di 72min den un situacion tres contra dos Cano, ta score un biaha mas pa e 4 – 1, despues cu Jonathan ta duna Chando y esaki ta su turno ta pone den teblachi pa Cano, kende cu canti pia ta anota facilmente.

Algun minut despues pa ser exacto na di 78min, den un contratake relampago Cano ta faya na anota su di tercer tanto despues di a haya un bala morto pasa di Jonathan. Na di 81min Mark Mackay ta duna un bunita pase na Chando kende ta crusa di biaha pa Cano y e biaha aki si e no ta hera y ta hinca su di tercer tanto pa e 5 – 1.

Ta bon pa bisa cu nos a mira awe un Chando de Lange manera antes, usando su liherez, crusando bon, poniendo e bala pa su companeronan, manera debe ser. Den e minutnan di descuento Carlos Geerman ta subi na banda drechi y ta crusa un bala pa Jonathan, kende ta haci un bunita hugada kitando e defensa y e portero for di su curpa pa despues deposita esaki facilmente den gol pa e 6 – 1. Cu e victoria aki Britannia ta subi bek na di promer lugar cu 15 punto, mientras e narajadanan ta drenta den un posicion critico cu e derota aki, nan ta keda den sotano cu solamente 4 punto.

- Advertisement -

DUNA COMENTARIO

Please enter your comment!
Please enter your name here