A cuminsa palabra caba riba un stuur groep dirigi riba esnan cu ta cria bestia na aruba y haci agricultura
Minister di Turismo a reuni cu Minister hulandes encarga cu agricultura, cria y pesca:
Meta ta pa yega na un protocol entre Aruba y Hulanda!
ORANJESTAD (AAN): Minister di Turismo Otmar Oduber tambe tin un agenda basta druk e siman aki cu a pasa. E mandatario tabata tin diferente bishita e dianan aki y a base di esaki a logra acerke pa puntra con tur cos ta bayendo. Segun minister Otmar Oduber e dia tabata uno sumamente positivo. El a habri diahuebs mainta ta reuni cu ATA Europa pa duna informacion riba e forma cu kier diversifica e mercado di turismo Europeo.
Nan a delinea y mustra tambe ariba e hecho cu kier diversifica economia di Aruba y e mercado turistico cu na e momentonan aki tin un presencia hopi fuerte na Merca y cu lo wordo intensifica y manteni, a bisa.
Lo haci un esfuerzo mas amplio ainda pa loke ta trata e mercado europeo, a enfatiza.
Durante e encuentro aki, Prome Minister Mike Eman tambe a uni su mes pa mustra cu pa Hulanda cu ta e mercado principal den Europa, esaki ta bay significa relacionnan nobo cu a base di tur e reunionnan cu tabata tin e siman aki lo mester bay transmiti tambe den e forma cu ta promociona Aruba na Hulanda, a agrega. Den e caso aki Oficina di Turismo (ATA) ta bay ta fundamental den esaki.
Mas despues a reuni cu e minister encarga cu asuntonan di agricultura, cria y pesca di Hulanda. A indica cu e reunion aki a bay hopi peculiar pa motibo cu Aruba pa hopi aña no a haci uso di e ayudonan of e interesnan cu por tin en comun dentro di Reino, entre Aruba cu Hulanda ariba e tereno aki.
Pa e minister hulandes mes tabata un sorpresa ora cu Minister di Turismo a pidi e encuentro aki. Den un schedule hopi druk nan a bay topa cune na un evento cu e tabata tin.
A base di tempo cu Aruba a separa y a haya su Status Aparte, e tempo ey tabata tin un acuerdo di cooperacion entre Hulanda y Antiyas ariba tereno di agricultura, cria y pesca.
Pa e ultimo 24 aña cu Aruba ta bay haci di nos Status Aparte nunca Aruba a regla e posicion aki cu Hulanda pa tin un tipo di relacion pa loke ta trata e tereno aki, a manifesta.
A cuminza e proceso ey ayera, e minister a laga sa.
Segun minister Otmar Oduber a cuminsa palabra caba riba un stuur groep dirigi riba esnan cu ta cria bestia na Aruba y haci agricultura. Un grupo di Hulanda lo bin Aruba pa haci un inventarizacion di nos criadornan di bestia na Aruba como tambe esnan cu ta practica agricultura.
Na e momentonan aki ta mirando ki tipo di cooperacion por existi di ayudo pa e ora a base di un protocol cu lo mester bay cera entre Aruba y Hulanda.
