Acusado a declara cu polis a drumi cu su muher
Lista di acusacion tin riba Cayman
ORANJESTAD(AAN): Diabierna na corte a tuma lugar un caso den cual Marcelo V.P a
wordo acusa di intencionalmente tuma bida di un persona, di a staca varios biaha cu cuchu den direccion di pecho di e persona aki riba 9 di Juni 2009 y/of cort’e varios biaha cu cuchu na su man y/of pia y/of draai cuchu den pia di e persona. El a wordo acusa tambe di a menaza un persona cu un crimen contra su bida riba 9 di Juni 2009, dor di bise (entre otro) pa cera su boca y no haci nada pasobra e no tin miedo di bay KIA y/of cu el a yega di hinca un muher nuebe biaha caba cu cuchu.
Alavez el a wordo acusa di intencionalmente a destrui bentana di un autobus riba 9 di Juni 2009, dor di dal e kibra cu su man.
P. ta wordo acusa tambe di transportacion y/of posesion di cocaina riba 9 di Juni 2009.
P. a wordo acusa ademas di hunto cu un otro of otronan, a menaza un y/of un di dos y/of un di tres persona cu un crimen contra nan bida y/of maltrato severo y/of maltrato cu arma riba 15 di October 2008.
Esaki dor di saca un of mas cuchu na un forma intencionalmente menazante y grita nan cu lo mata nan y/of grita nan: “Abo ta e proximo” y/of “Ban mata e guynan aki awor” y/of “Ki mi ta worry cu polis, mi ta drenta sali” y/of “Ban mata e muhernan Dominicano aki” of palabranan semehante.
Huez a repasa rapport di e caso, den cual tin para cu polis a wordo manda pa Pos Chikito pa un hincamento.
Ora polis a yega na e sitio, a wak un van di cual e bentana di pasahero tabata kibra.
Tabata tin sanger tambe riba e stoel.
Polis na un cas eynan a topa cu un homber cu corta na man y den su pia (bil).
E homber a bisa polis cu un tal “Cayman” a hinke.
E victima kende ta chofer di e taxi-van a declara cu Marcelo “Cayman” V.P kende ta biba tras di cas di su difunto ruman homber, a bin puntre pa placa y ora el a nenga e homber, e homber a kibra e glas y a cuminza hinca cu cuchu den su direccion.
El a tene e cuchu pa defende su mes, pero Cayman a trek esaki bek, cortanto su man.
Despues Cayman a hinke den su pia.
E homber a grita un muher cu tabata cune pa yama polis y e ora ey Cayman a menaza e homber y e muher.
E muher a confirma loke e taxista a bisa.
Huez na corte a puntra Cayman pa conta loke a sosode e dia ey y el a bisa cu e taxista tabata debe 6600 florin pa un generator y el a bin puntra pa sikiera 200 florin di e placa pa e paga huur di un otro apartamento, debi cu e mester a sali for di cas di ruman homber di e taxista.
Segun Cayman, ora el a puntra e homber pa e placa mientras cu e homber tabata sinta den e van, e homber a saca un machete chikito pe.
E homber a manda e machete den su direccion y door di esaki e bentana a wordo kibra.
Cayman e ora ey a dicidi di saca un cuchu cu e tabata tin riba dje y el a manda esaki den direccion di e taxista.
E homber a purba para esaki y asina el a wordo corta den su man, net prome cu e cuchu a hinke den su pia.
Huez a confronta e acusado cu e hecho cu polis a indica cu ora cu Cayman a wordo deteni, el a bisa polis cu ta den garganta e kier a hinca e homber.
E acusado a puntra huez e ora ey si huez ta kere cu e ta asina idioot di bisa polis algo asina, cu lo dune mas culpa den e caso aki.
Polis a bisa tambe cu Cayman a bisa cu su intencion tabata pa pone e persona aki bira handicap.
Un biaha mas e ora ey Cayman a bisa huez cu e no a declara esaki.
Huez a puntre di con el a firma e declaracion y el a bisa cu e agente policial kende tin algo contra dje no a lage ni lesa e declaracion, pero asina mes e mester a firma.
El a splica cu e agente policial aki kende e conoce for di basta tempo te hasta a yega di tene relacion sexual cu su pareha, ora e polis aki tabata duna e muher les di core auto.
Pa loke ta e caso di menaza di 2008, huez a lesa parti di e rapport cu ta mustra cu un señora a entrega un denuncia contra Cayman door cu el a aparece cerca di su cas hunto cu un amigo y eynan nan a menaza miembronan di e famia.
Yiu muher di e señora di cas na dado momento a wordo fula pa un di e hombernan y e ruman homber a bay reclama.
Ta e ora ey tanto Cayman como su amigo a mustra nan cu nan tabata tin cuchu.
A surgi un problema unda cu e señora di cas tambe a saca machete pa e hombernan, kendenan a bisa cu nan tabata bay mata e Dominicanonan aki.
Na dado momento durante tratamento di e caso huez a dicidi di para esaki, pa un rapport psicologico wordo traha riba e acusado. E caso pesey a wordo posponi te cu dia 26 di Februari 2010.
