Aeropuerto ta adkeri un equipo sofistica pa por garantiza un operacion sigur
ORANJESTAD (AAN): Aruba Airport Authority N.V. (AAA) tin e responsabilidad di garantiza un operacion sigur pa tur usuario di aeropuerto. Un responsabilidad primordial di aeropuerto ta pa garantiza cu avion por ateriza y subi na un manera sigur haciendo uso di e pista di aterizahe. Ora cu un avion ta ateriza y e rubber di e tirenan di avion ta topa cu e asfalt di e pista di aterizahe esaki ta crea friccion cu ta causa cu e rubber aki ta smelt drenta den e asfalt di e pista.
Consecuentemente despues di varios aterizahe e rubber aki ta cuminsa acumula riba e asfalt.
Den tempo di yobida y ora hopo awa acumula riba e pista e pida rubber nan aki por crea un situacion peligroso cu ta worde yama “hydroplanning.”
Hydroplanning kiermen cu un laag di awa ta acumula meimei di e tirenan di e avion y e rubber riba e pista, causando cu e avion ta perde grip cu consecuencia cu e ta preveni e avion di brake efectivamente.
Door di esaki, Organizacion Mundial di Aviacion Civil (ICAO) ta prescribi cu tur aeropuerto regularmente mester haci un asina yama “friction test” di nan pistanan di aterizahe pa midi si e cantidad di rubber deposita riba e pista ta den e margen aceptable pa garantisa un operacion sigur.
Pa por cumpli cu e rekisito aki AAA a adkeri e equipo necesario di un compania yama Scandinavian Airport and Road Systems (SARSYS) un di e lidernan mundial di equipo di friction testing pa aeropuerto situa na Zweden .
E friction tester cu a worde cumpra ta inclui tur cos y ta bin den forma di un trailer cu mester worde lastra over di e pista na un velocidad di mas di 90 km pa ora, mientras cu awa ta worde gespuit riba e pista y un wiel cu ta midi ta pasa riba e pista y ta graba tur e datonan obteni di “friccion” den un computer. Na final di e midimento aki e computer ta duna un printout cu tur e informacion exacto di e test cu a worde haci.
AAA tambe a adkeri cimico special pa kita e rubber, cual hunto cu e sweeper nobo di aeropuerto tin e capacidad pa kita e rubber di e lugarnan indica door di e friccion tester.
E friccion tester y e sweeper ta worde opera pa personal di AAA mes cu a ricibi training specializa y ta certifica pa opera ambos machin conforme cu specificacion di e fabrica.
“Nos ta orgulloso di ta un di e prome aeropuertonan (si no ta e prome) den e region pa tin un equipo asina pa por duna tur usuario di aeropuerto e siguranza cu nos facilidadnan ta di acuerdo cu e standard mas halto den e mundo di aviacion” Managing Director di AAA, Sr. Peter Steinmetz a comenta.
